To’avalu sui tauva o le a saili tofi i le tauvaga Tausala Amerika Samoa 2025-2026

Pago Pago - AMERIKA SAMOA

O le aso To’ona’i o loma nei, Iuni 7, 2025, o le a faapea ona fa’ataunu’uina ai le sailiga lona 31, mo se Tausala a Amerika Samoa, aua se tasi e sui tulaga pe se’e iai le pale o le Tausala a Amerika Samoa,  lea o lo’o faapaleina ai nei le tamaitai o Pauliana Angel Felise Vitale.

E to’avalu ni tamaitai talavou ua fa’auluina o latou suafa, e avea ma sui tauva mo le tauvaga.  O i latou ia e aofia ai Esethi Taito, o Nu’u Letoe, o Malialole Hafoka, o Tofoi Unutoa, o Salavatia Lauvao, o Fuamailelagimanuiaolenu’u Tago, o Hermione Simanu ma Taputailo Fe’a.

O le manulauti o le sa’iliga Tausala o lenei tausaga, ua fa’aautuina e faapea, “O le ua Fa’alanuma’ave’ave”.

O le aso Toonai sa fa’ataunu’uina ai se tauvaga ta’avale teuteuina, lea na amataina mai i luma o le Veteran Stadium i Iliili, ma aga’i atu i Iliili, ona liliu mai lea ma agai atu i Pago Pago, ma toe liliu mai ai ma fa’amae’aina i le maketi i Fagatogo.

Ma sa faapea ona lagolago malosi i lea fuafuaga, ia nisi o autalavou, na aofia ai alo ma fanau a’oga mai i le aoga maualuga a Samoana, o le OLD BOYZ Crew, o le Caleb’s Creationz, o tamaitai o le Amu’ula mai i le afioaga o Aua, o le autalavou a le EFKAS Vaitogi ma Nu’uuli, faapea le a’oga Aso Sa a le EFKAS Pago Pago, ma le Autalavou mai i le uarota a Faleniu 3, o le Ekalesia a Iesu Keriso o le Au Paia o Aso e Gata Ai.

Ma i lea tauvaga, sa manumalo ai le Tausala #8, ia Taputailo Fe’a, lea o lo’o lagotalagoina e, le kamupani a le Vailu’u & Sons.

O le aso Sa na se’i mavae atu, na auai atu ai sui tauva ma a latou ‘sponsors’ faapea ma le pulega a le MASI Inc., i se sauniga lotu po o se Misasa, i Fatuoaiga. 

O le sui tauva #1 ia Esethi Sialeipata Akesa Toomalatai Sialeipata Taito, o lo’o lagolagoina o ia e le “Le Maimoaga Designs” faapea aiga ma uo.  E 19 tausaga o lona soifua, mai i afioaga o Aoloau ma Aua.  Ma o lo’o a’oga i le Iunivesite a le Western Governors i Lawton, Oklahoma, ma galue i le YMCA, e fesoasoani i fanau talavou.

O le sui tauva #2, o le tamaitai 19 tausaga, o Nu’u Kailia Kealeo’okalani Letoe mai i afioaga o Tula, Sa Mauga, Leone ma Lalomanu.  Ma e ui ina sa fanau ma soifua mai lenei tamaitai i atunu’u i fafo, ae peitai, e pele lona atunu’u ma lana aganu’u, i lona fatu.  O Nu’u, o lo’o a’oga i le Kolisi a Snow i Sandy, Utah ma o se totino o le ekalesia a le Assembly of God.  O lo’o lagolagoina lana taumafaiga e Tausala America/Nafanua Foundation.

O le sui tauva #3, o le tamaitai o Malialole Talavou Hafoka mai i le afioaga o  Mapusagafou ma Faleniu i Amerika Samoa faapea Faleasi’u ma Nofoali’i i Samoa.  O lo’o a’oga nei o ia i le Kolisi Tu’ufaatasi a Amerika Samoa (ASCC) ma fesoasoani i le tausiga o lona tama ma tina matua.  O Malia e 20 tausaga o lona soifua ma o lo’o lagolagoina lana taumafaiga e le Malialole Polynesian Cultural Arts Ensemble/Alofa Samoa ma An Whut.

O le sui tauva #4, o le tamaitai o Tofoipupu Unutoa mai i le afioaga o Aua.  O se alo tamaitai e faasino ia Matamatafua Tuailevaoola Unutoa ma Asinate Tuimafuiva Fuimaono Pine.  E 24 tausaga o lona soifua ma sa fa’au’uina mai i le aoga maualuga a Samoana.  Ma sa fa’au’u mai i le Iunivesite a Southern Oregon i le 2022 ma lona fa’ailoga o le ‘Bachelors’ ma o lo’o galue o ia i le Ofisa a le ARPA.  O lo’o lagolagoina lana taumafaiga e le Kailani’s Design.

O le sui tauva #5, e malaga mai i afioaga o Tafuna, Ottoville, Aunu’u, Tau, Savaia-Lefaga ma Malaeloa.  O le tamaitai o Salavatia Khlois Lauvao e 24 tausaga o lona soifua ma o ia o se alo e faasino ia Sisifo Jr ma Gwendolyn Lauvao.  E ui ina sa fanau o ia i Honolulu, Hawaii ae sa tuputupu a’e o ia i Amerika Samoa.  O lo’o lagolagoina lana taumafaiga e Steven & Sons.

O le tatou sui tauva #6, o le tamaitai o Fuamailelagimanuiaolenu’u Ulugaono Siaosi Ativalu Tago, mai i le afioaga o Nu’uuli, Vaitogi ma Faga-Savai’i.  O ia o se alo tamaitai e faasino ia Tipesa ma Ativalu Tago Jr. (ua fa’ilagi le folauga).  Sa fa’au’uina mai lenei tamaitai i le aoga maualuga a le Matata Ese’ese i Nuuuli (NVTHS) ma o lo’o fa’aauau ana aoaoga i le Kolisi Tu’ufa’atasi a Amerika Samoa (ASCC).  O lo’o lagolagoina lana taumafaiga e le kamupani a le Moana Taro Chips. 

O le sui tauva #7 e suafa ia Hermione Olioli Simanu mai i le afioaga o Pago Pago ma Fagasa, ma e 21 tausaga lona soifua.  O Hermione o se alo e faasino ia Jacob ma Olioli Tupua.  O se tamaitai e fiafia i so’o se ta’aloga ma o lo’o saili lona fa’ailoga Tausima’i i le kolisi.  O lo’o lagolagoina lana taumafaiga e le Pule Pule Creative Arts.

Ma le sui tauva lona valu, o le tamaitai e 27 tausaga, o Taputailo Josephine Fe’a mai i le afioaga o Faleniu ma Iliili.  O se alo e faasino ia Tauamo Fe’a Jr., ma Omeka Magale’i Fe’a.  O Tapu sa fa’au’uina mai i le aoga maualuga a Tafuna ma sa fa’aaluina le 18 masina o lona soifua, i sana misiona fa’aletalalelei, i Samoa.  O lo’o galue nei o ia i le Ofisa o le Soifua Maloloina.  O lo’o lagolagoina lana taumafaiga e le kamupani a le Vailu’u & Sons.

O le tauvaga tausala o le a faataunu’uina i le Fale Laumei i Utulei, i le 7 i le afiafi.