Tala o Ta’aloga Kirikiti

E muamua ona momoli atu le fa’afetai i le kamupani o Feso’otaiga a le Blue Sky, i le tatou tautua lea o le itulau o “Tala o Ta’aloga Kirikiti’ i le tatou nusipepa.

Ia avea pea ia le nusipepa e momoli atu ai le fa’afetai fa’ale’au’au ma le fa’alelava i lea kamupani, mo lenei tautua i le atunu’u e ala i ripoti o kirikiti fa’asamoa i lea vaiaso ma lea vaiaso.

E fa’amanatu atu i tusi ‘ai a le tele o ‘au, e tusi fa’asa’o lelei mai le igoa o teine o nai a tatou tagata ta’a’alo e mana’omia e le tusitala ona fa’aaogaina, ia le sasi fo’i le auaunaga ma fa’ate’ia ai nisi i le ma’ema’ea o i latou ona ua sasi suafa.

O le vaiaso lenei ua toe vaaia ai fo’i le toe sui o le alualu i le luma o tamaita’i ma a ali’i kirikiti i a latou taumafaiga, i le aso Tofi na toe ausia ai fo’i le isi matati’a.

I le fa’ate’a i le itupa o tamaita’i, ua tula’i mai le tamaitai fa’ate’a a le I’a Vai, o Tauia Pati, ua ia toe ausia fo’i le iva (9) ‘olo i le ta’aloga ma le Moso’oipala.

I le itupa o ali’i ua ausia e le ali’i ta a le Pisisami o Marcus Ufuti, le lima sefulu iva (59) ‘ai, i le ta’aloga na faia i Pago Pago i le malae kirikiti i Gagamoe, ma le ‘au a Tama o le Lega mai Poloa.

Ia o ‘au ua mae’a a latou ta’aloga ma ua atoa a latou faiaina e fa (4) i le ta’amilosaga ua fa’apea fo’i ona mae’a a latou ta’aloga i lenei tausaga, i le itupa a ali’i, ua aofia ai Sinapati mai i Tafuna, o le Mea’ese mai Alofau, ma le ‘au a le Tuna’ula mai i Fagaitua.

O ‘au nei o lo’o lelei pea lava a latou ta’aloga e le’i i ai lava ni faiaina, ma e foliga mai, o i latou lava nei e i ai le avanoa e oo ai latou taumafaiga e su’e le siamupini o le itupa a ali’i ma tamaita’i.

O le itupa a ali’i, o le I’a Vai mai Malaeloa (4-0), Fetulele mai i Tula (4-0), ma le Seaula mai i Aoa e tolu (3-0) malo i ana ta’aloga, ae leai se faiaina. O lo’o i ai fo’i ‘au a le itupa o ali’i, na’o le ta’itasi faiaina e aofia ai le Pisisami, ma le Mosiula.

O ‘au uma nei, e le’i ta’a’alo, o lona uiga, o tu’u i se isi ituaiga faiga, e i’u lava ina faiaina le tasi i le isi, ona toe amata loa lea o le latou ta’amilosaga, ae ofi atu ai ‘au nei e ta’itasi faiaina.

Ou te talotalo lava ia fa’apena se mea e tupu, ona toe fai ai lea o le ta’amilosaga i ‘au nei e tutusa, aua o le ta’aloga e fitifiti le polo, e maua le polo e tau-le-fiti, e fiti-feoloolo, e matua fiti le polo, pea o’o lava ina tafiti.

O le itupa a tamaita’i, e fa a’u nei e le’i maua ni faiaina, o le I’a Vai mai i Malaeloa ((3-0), o Teine o le Asaga mai i Aunu’u (3-0), o le Lupelele mai ‘Ili’ili (3-0) ma Teine o le Aeto (2-0).

O nei lava a’u e tula’i mai e lelei lava a latou a’u kirikiti i tausaga uma, i le sefulu tausaga talu ai se’i o’o mai i le taimi nei.

Ua maua fo’i le tala i le fa’amavaega a le a’u lea a Alao, ua taua mai e le Ofisa tau Samoa, ua fa’amavae atu le a’u lenei i le vaiaso ua te’a mai le ta’amilosaga o lenei tausaga.

LIKI A TAMAITA’I O LO’O FAIA LEA I FAGA’ALU

I’A VAI, MALAELOA (3-0) v MOSO’OIPALA  (*1), (0-2).

I le ta’aloga lenei na vaaia ai le teine o Tauia Pati, ua pei lava e na’o ia lea e fai le ta’aloga mo teine tata a le Moso’oipala, i lana fa’ate’a i lena aso.

Na ia mauaina ‘olo e iva (9) i lena ta’aloga, ma ‘olo i te’a na fesoasoani atu ai ia Fia, Lela ia ma Rosie na o ane e sui fa’ate’a a le I’a Vai.

Fai mai Tauia, “Ou te musu tele ae fai mai le nusipepa o maua na tutusa a Omeka i le tele o ‘olo, e ‘ese’ese ‘au na maua ai o ma ‘olo ma Omega, ia mafaufau i a’u nei e lua, o le Autalavou a Fagaalu, lea na fai ai faiga a le teine o Omeka, ma le ‘au a le Moso’oipala lea na ou mauaina ai le iva o ‘olo.”

“O lenei ta’aloga e fa’ato’a iloa lava lea o le auro i le afi. Oute te le fa’amaualuga ae ou te te fa’amoemoe lava i le malosi ma le atamai, na aumaia e le Atua ia te a’u. E fa’amoemoe mai le matou ‘au ia te a’u, ou te fa’amoemoe fo’i i ai i le taimi o ta’aloga. E tofu lava matou ma le mea e fai, le mea lena e manumalo ai i le tele o ta’aloga.” O se fa’asoa lea o manatu ma lagona o Tauia i le alii tusi ‘ai.

Na tata muamua le Moso’oipala maua ‘ai e lima sefulu fa (54) ae 19 le pe, i le vaai atu fo’i i le talitua’a a Teine o le I’a Vai, i le matua mataalia mai pei lava, se’i vagana ai polo e tau fetuli ma sapo mai, e fa’ailoga fesili i le sapoina.

Ae a alu atu le polo, ma e alu atu sa’o lava i le tagata, ua mautinoa lava le maua mai e le talitua’a.

Na o ifo loa le I’a Vai e tuli ‘ai nei a le Moso’oipala *1, e i ai fo’i le mea malie lava na tupu i le ‘auta a le I’a Vai, o faiga a fa’ate’a a le Moso’oipala, e le lelei mai o a latou te’a ile amataga o le ta’aloga.

E lima pe (5), ae fa’atoa sefulu lua (12) ‘ai, ona ua lelei mai le pauuga a fa’atea tuai o le Moso’oipala o Mellisa, Ana, Ali’itasi ma Sovita, ma na maua lelei pauuga o tea i le amataga, na mafua ai le ta gata o le I’a Vai i le amataga .

Na sui uma ina ua tula’i mai Lilly & ‘the gang’ lea na sefulu valu ‘ai (18), na gasolosolo atu loa i luga ma le ‘auta a le I’a Vai, ta uma ‘ai e lima sefulu fa (54) a le Moso’oipala *1.

E maua ifo ‘ai, ae ua tigaina le ‘au a le I’a Vai i le taumafaiga o fa’ate’a nei a le Moso’oipala.

Ua tele lava ina maua avanoa e sao ai teine ta a le I’a Vai ina ua le lelei mai le talitua’a a le Moso’oipala, ua fa’aumiumi ai ma toe maua a latou avanoa e ta ai fa’alua.

O teine o le Moso’oipala *1 na maua ‘ai, o Asuetege 14, Mellisa 8, Ali’itasi 7. Fa’ate’a o Mellisa (5), Ana (3)  Ali’itasi ma Sovita.

ASO FARAILE.

SEAULA, AOA (1-2) v AUTALAVOU FAGAALU, (1-2).

O le ta’aloga lenei ua ta le iloa, po’o o le a le mafuaga ua fa’apea ai ona fai, poo le mea ua manatu mama le ‘au a le Seaula i le a’u a Fagaalu.

Po’o le mea ua vave ona sui le a’u a Fagaalu i le taimi pu’upu’u lava, i le lua vaiaso a’o lenei ua tele le suiga o le latou ‘au, e leai se fefefe e ta’a’alo ma ‘au lelei nei.

O le ‘au a le Seaula, lea e tele i teine ua leva fo’i ona kirikiti i isi ‘au kirikiti ua iloga fo’i i le ta’aloga.

A’o ‘au lea a le Autalavou, e pei a na’o le to’atolu i le to’afa teine ua maitauina na ta’a’alo muamua i isi fo’i ‘au a isi afioaga. A’o le mea lea ua i ai, ua pei lava le ‘au lea a le Autalavou o le isi ‘au ua leva ona fai mai i tausaga ua te’a.

Toe pau lava le mea lea e vaai atu ai ma alofa i le fa’ate’a a le Autalavou, ‘e leai se’i fa’atalitali i le talitua’a po’o teine polo mamao ia, ma le taloto.

Na ona maua lava o le polo, e le isi fa’ate’a alu loa i le atoa e aunoa ma le va’ava’ai i tua i ana polo mamao ma totonu o le taloto, e fai lava ia. Fa’atoa fa’ali’i lava i polo mamao pe a alu atu se polo i luga, e le’i sauni mai le talitua’a.

Ua na’o nai fautuaga, e le’o silafia le mea o lo’o matau atu e le komiti ma tagata maimoa ae maise o le tapua’iga a le afioaga peita’i o nai lape ia i totonu o le malae ta’alo, e fa’ailo mo se aga’i i luma o le taumafaiga.

E aoga fautuaga, ma le tu’ualalo a tagata e maua ai se lesona o lou faiva-alofilima lena o lo’o e naunau e fa’aleleia atili.

Na tata muamua le Autalavou, maua ‘ai e valu sefulu (80) ae fa’ato’a 13 pe, ona o le tulafono a le liki a tamaita’i, e 80 loa ‘ai ona tuli loa lea e le isi ‘au.

Na tuli loa lea e le ‘au a le Seaula, maua le valu sefulu ona fa’aauau lea ona a latou ‘ai fa’asili, lea na maua ai le 45, tu’u fa’atasi o latou ‘ai, e selau lua sefulu lima (125).

Ia ae se paga lea, ua o’o mai le fetu o le aniva, ae ua le tu’u le malae i Vaovai i le manaia o le ta’aloga. Ona maua ai lea o le fa’aiuga a le komiti, ‘o le a taoto ai fa’apea se’i sau se malama, ona toe fa’aauauina lea o lea ta’aloga matagofie ma le finau.

ASO TO’ANA’I:

 I’A VAI (4-0) v TEINE O LE MANULELE TAUSALA (0-3)

Na vaaia le naunau a le ‘au lea a le Manulele Tausala, i le fia maua o se malo i le latou fetauiga lea, ae se paga, e malolosi uma a’u nei e fetaui ma le Manulele Tausala.

E leai ou te te fai atu e vaivai le Manulele, ae o lena e filo ai ma teine laiti lena e vaaia ua amata ona o mai e a’o a latou kirikiti, a’o le tele o a’u na e malolosi mai, e leai ni teineiti e tau a’oina a latou ta’a’alo.

O isi a’u, se’i iloga lava ua lelei le ta’alo a se teineiti pe auai fo’i i se ta’aloga ae fa’atonutonu atu lava e teine matutua, ae ua lelei i le ta ma le talitua’a. E laiti la mea e tau fa’atonu atu i ai, ae ua lelei i le tele o mea.

Na muamua tata le ‘au a le Manulele Tausala ina ua manumalo i le viliina o le tupe, na vaaia ai le malosi o le talitua’a a le I’a Vai, ae vanaga ni polo e tamomoe  teine e tau sapo, ona maua lea i le mea lena e fa’ailoga fesili.

Ia ua amata le ta’aloga ma le fia momoe o teine ta’a’alo, talu ai, e silafia loa e le komiti e lua ta’aloga i lena aso Toana’i, ia ona amata loa lea i le 8:00am.

Afai e silasila a’e e tolu ta’aloga, ona amata lea i le 7:00am ta’aloga, o se tu’ualalo atu lava i le Komiti mamalu, aua le aga’i i luma o isi aso Toana’i lea o lo’o totoe nei a’o le’i faia le liki.

Sa maua e le Manulele Tausala ‘ai e ono sefulu (60) ina ua uma a latou pe, ona tuliina lea e le I’a Vai. O se mea malie na tupu i lena ta’aloga.

Na o fa’atasi ‘ai ma pe, tasi le pe ae fa’atoa 2 ‘ai, na o’o mai lava i le ono pe, ae fa’atoa 15 ‘ai, ona fesuia’i loa lea o teine ta a le I’a Vai, ua toe fesuia’i i teine e lelei a latou ta i le te’a e sosolo i lalo.

Pei a o te’a lea e fa’aaogaina e Teine o le Manulele Tausala, na o mai loa mai loa teine na e lelei o latou ta i lea ituaiga te’a, sui ai loa ma le ‘tala o le vai ma le usuga’.

E le’i umi se taimi na tata ai le ‘au a le I’a Vai, ae maua ‘ai nei e 60 a le Manulele Tausala, i le fa’atoa sefulu tasi (11) pe. Ma o teine nei a le Manulele Tausala na ‘ai silia: Orepa 15, Sofi 9, Moana 7, Mele 7. O fa’ate’a; Sofi, Orepa ia ma isi na fesoasoani mai i ai.

O le I’a Vai ‘ai silia: Tauia 15, Lela 13, Fia 5, Tiva 7. O fa’ate’a a le I’a Vai, o Tauia (4), Fia (4) Lela, Rosie.

LUPELELE: ‘ILI’ILI (3-0) v TEINE O LE MOLI: NUA/SE’ETAGA (2-1).

O’i na fa’aalia ai le le mafaufau o le ‘au lenei a le Lupelele, se ua outou faia lava le mea e fa’agata ai le fiafia a Teine o le Moli, e tou te iloa pe silafia ea le mea e igoa o le faifailemu, po’o ta’a’alo fuafua i ‘au na.

Ia sau ia oe si o’u te’i o Se’etaga/Nua po’o teine o le Moli, fai atu lava ia te oe, e ‘ui ina e utia i se ‘au e matutua le latou ta’alo ia outou.

Ia afai fo’i ua so’ona fai oe i le mafaufau lena a le ‘Lupe’ ia soia ia, lena na laki ua pe ile se’e, ana e pe i le ‘olo oute fai atu a oute le leiloa po’o o lea le mea e o’o ia outou.

Na malo lava le Lupelele i le ta’aloga faitaulia lea ma Teine o le Moli mai Nua ma Seetaga. Ma ua see atu ai manual o Lupelele i le 3, leai se latou faiaina, ae o le teine o le Moli ua atoa le lua o manumalo ae tasi le faia’ina lenei.

MALAE I GAGAMOE, PAGO PAGO: TA’ALOGA ITUPA O ALI’I

LUPELELE, (2-2) v MEA’ESE, ALOFAU (1-4).

Le ta’aloga mulimuli lea a le ‘au a Alofau, lea na faiaina ai i le ‘Lupe’, ma o i foi na taua e se tasi o le komiti fa’afoe a Pago Pago, “Ia ua maua ‘ai laiti i le latou malae lea e i Gagamoe, 44.”

Ua vaaia le alu i luga o tamaiti lea e ta’a’alo mai i lenei tausaga a le Mea’ese, ua iloa atu lava o tamaiti nei, o le a taumafaia mai le ‘au i tausaga a sau.

O le isi mea lelei lea e fa’aaoga mai e le Mea’ese, ua maua tala ua tau leai ni tamaiti e fiafia i le kirikiti, ua tele lava e isi ta’aloga.

I le maimoa atu i le ta’a’alo a le ‘au laiti a le Mea’ese, aua ne’i ofo se isi ae mautu se siamupini i lea ‘au le tausaga fou i se latou taumafaiga.

Manaia tele le ‘au mulumu, ma nai tamaiti na e fa’ate’a, o le toaga lava e te’a ma e mafaufau i lea pauuga ma lea pauuga.

Lea e faifai fiafia le tatou taleni, o lena e i ai tama matutua a le tou ‘au, fesili i ai ona latou ta’uina atu lea o le mea e again ai i luma la outou ta’a’alo.

O le Lupelele, o le a outou fa’asolo atu nei i isi ‘au e malolosi i le taimi nei, mea sili lava ua tou faiaina ia Fetulele ona o le fa’atamala lava o outou ia.

 Ae semanu ana lelei le tou talitua’a, fa’apenei ua tasi le faiaina a le Fetulele ia te outou.

Lena la ua i ou lima le fa’amaloloina o le Mea’ese, aua po’o a isi faiaina a le Mea’ese, a’o outou lea ua fa’amaloloina o le ‘au a Alofau.

Lona uiga la e lua mea o le a outou o’o nei i ai; (1) O le a alualu ai a le tou ‘au, i le lelei lena ua i ai (2) a le vave fo’i ona tou fa’atofa mai i le komiti ma le liki.

A lelei ma manuia le ‘au, ia manaia…a te’i ua fai atu i le vaiaso lenei, ae tou o atu fo’i e pe’i o le Mea’ese, ia o aga lava o le ta’aloga, e se’e lava lenei mea o le Malo.

TAMA O LE LEGA (2-2) v PISISAMI (2-1)

O le ta’aloga lea, ua toe fa’asao mai i le gutu o le faiaina le Pisisami i faiga a Tama o le Lega, e le iloa o le fai ai nei Marcus ma ’tupu’ o lea ‘au i le aso Toana’i. E selau ma le tasi (101) ’ai a le Lega ae 17 ona pe, lea la na tuliina loa e le ‘Pisi’.

E lua sefulu iva (29) ‘ai, ae ua atoa pe e 7 a le Pisisami, na vaaia le mananaia o te’a a le Lega i le amataga, maua lelei lava pauuga, e tele lava i le pa’utasi ma afu uma ai le ‘autata a le Pisi.

Le lelei o le fa’ato’ato’a atu e Reupena o le isi itu ‘olo ae fa’apena fo’i le isi (i le pito i le Plaza) a isi fa’ate’a na e i ai.

E fitu pe, ae fa’atoa lua sefulu iva (29), o le mea ua matou maitauina le faiaina leaga  le Pisi i le aso lea, ae savalivali atu loa Marcus i luga o le malae.

I le te’a muamua lava, o le afa na taumafai Marcus e ta fa’alava, ae sese lona taimiina, lea la na tau tonu lava le polo i lana ‘autafa o le mata, sa taofia loa le ta’aloga ae taufai le fofoga a le tama ta’alo.

Fa’apea ai o le alu nei i lalo, se’i tau fai lana fofoga, ae leai ua tete’i tagata i le va’avaai atu, o le la e toe fa’aauau lava le ta’aloga e Marcus.

I le faiga la a le tama o Marcus ina ua uma na lavea lona mata, ta i ‘i, ta i ‘o, ta i luga, ta fa’alava, ta aga’i i tua, toe toe lava ana mafai ona ta i lalo i le palapala, ai ua mafai ona ta ai.

Ua uma fa’ate’a, a’o le la e ‘ata’ata mai lava Marcus ma ta le polo, a le solasola solo te’a a Tama o le Lega, e lavea lava i le ta a le tama.

Fai mai Ta’ita’i Malae o Toilolo ma Letele, “Ua mama le ‘au te’a e te’a atu i luga, ma taumafai ai e ‘alo’alo mai le ta. Ia o le isi mea o le tulafono, e lua te’a e alo, tau loa ‘ai a le ‘au lea e tata.”

Fai mai tamali’i lea, “Po’o le a le mea e le tami atu ai le te’a i Fagasa, ta’amilomilo a’e i mauga, tami mai ai i le maketi i Fagatogo, totolo mai i le Plaza i Pago Pago, ma maulu mai ai i le mea lea e tu atu ai i le ‘olo, ae o le la e fasaga mai Marcus i’inei, te’i lava i le pa’u o le ‘olo.”

E uma lelei ‘ai a le Lega e 101, o la lava e tu ia Marcus, toe ta latou ‘ai fa’asili, ma uma lelei a latou pe, e le’i pe lava le tama i le tataga atoa o le ‘au.

Lea na maua ai ‘ai e 118, ae 19 pe, a’o le ‘au a le Tama o le Lega, toe lua (2) pe, ae ua atoa ana ‘ai e 101, na toe tata e fa’auma le latou ‘au-tata, lea na o le 7 ‘ai fa’asili, ae pe le isi o le masaga.

Na manumalo ai le Pisisami, i faiga a le tama lea o Marcus, ana le vave uma le latou ‘autata, e le iloa pe o’o lava i le 100 ma ona tupu ‘ai.

Tama ‘ai-silia a le Lega: Alafua 18, Sapati 10, Manulele, 15, Faiva’a 10, Fa’atoga 9; O fa’ate’a o, Alafua, Reupena, Sapati ma isi fa’ate’a a le Tama o le Lega.

O tama na ta ‘ai a le Pisisami; Marcus 59, JR Sitau 10, Mao 11, Ricky 11. O fa’ate’a; Marcus, Mao ma isi tama e sui te’a.

PYCCT, PAVAIA’I (1-4) v MOSIULA (3-1)

O lenei ua fa’auma ta’aloga i le aso Toanai i le va lea o PYCCT mai i Pavaia’i ma le ‘au a le Mosiula mai i Masefau, ia na tata muamua ai Pavaia’i, ma o le mea e lelei ai, o le Faifeau a le EKFAS i Pavaia’i e susu mai i Masefau.

O le mea la lea na tupu, tiga le fa’asao o le Faifeau e tama o le Mosiula, e le ita lava i ai le kapeteni o Loia, fa’apea ta ita ai o le ‘ava’avaau i le tama lea na nofo fa’apau le polo i lalo, ae fa’asao le latou tama.

Ta te fiu e tilotilo i le kapeteni po’o a ana uiga e fa’aalia mai, ae ta te vaai atu, ‘o le a OK’ mai lava le kapeteni o Loia.

Ae o le faiga fo’i o le sapo a le tamaitiiti lea o Jeffery, e tolu lelei ana polo sapo i lena aso.

Na maua ‘ai e 91 a le Autalavou mai i Pavaia’i, i le tele o le alofa ma agalelei o le ‘au lenei a le Mosiula i lena ta’aloga na faia, e faigata le vaai i Lupe Fa’alelei a le Afioaga o Masefau, lea ua i ai nei i Pavaia’i.

Le manaia ia o le tele o ‘au lea e ta’a’alo mai ai le ‘Au-Faigaluega, e taofiofi mai ai le ote i nai tulafale e ‘aveina ‘au, a’o le leaga faia ia.

A tu mai ma le pate, e te fefe fua atu ai fua i le tu mai, ae a sasau nei, e alu ifo i lalo le ulu  o le pate, ae ova i luga le alu o le polo.

Ae a ote mai i nai isi tama o le ‘au, sole ua laki o le mamao lava o le masina, semanu e fa’alogo mai i ote a tama ia.

Ua atoa nei fagiana a Pagaiai, ae ua se’e atu Mosiula mai Masefau i le ta’i 3 o malo ae tasi lava le latou faiaina.