Fesiligia Faipule fa’aletonu tula’i mai tautua a ni isi Ofisa malo

I le aso lona lua talu ona tatala aloaia le tauaofiaga lona 2 a le Fono Faitulafono, na fesiligia ai e afioga i Faipule le tele o fa’aletonu o lo o alia’e mai i tautua a ni isi o Ofisa o le malo, lea ua fai ma to’atuga i finagalo o ni isi o le atunu’u, ma ua mana’omia vave ai se tali ina ia mafai ai ona vave foia nei fa’afitauli.

O ni isi o ia fa’aletonu o totogi o uta mo Manu’a, faiga le fa’amaoni i laisene o ta’avale a le aufai pisinisi Asia, tuai ona maua o lafoga a tagata, taugata o le totogi o pili a le falema’i, atoa ai ma le mataupu o loo vavao ai le to’atele o le atunu’u i totogi mo le lesitalaina o ta’avale i le Ofisa o Ta’avaleafi (OMV) a le malo i Tafuna.

Na taua e le afioga i le ali’i faipule ia Faimealelei Anthony Fu’e Allen le to’atele o tagata mai le itumalo o Manu’a ua fa’ao’o atu fa’asea ia te ia, i le tulaga o le totogi o uta mo le itumalo i le taimi nei, ona e tutusa lava le totogi e ave ai le kula o loo i ai le uta i Manu’a, ma le totogi e toe fa’afo’i mai ai le kula lava lea i Tutuila, tusa lava pe le o i ai ni oloa i totonu.

Na lagolagoina e se tasi o faipule mai Manu’a le mataupu i le oi o le itumalo ona o le maualuga o le totogi o uta, toe fa’aopoopo atu ai ma le taugata o le tau o oloa i totonu o Manu’a.

Saunoa Fetui Fetu Jr e fa’apea, atonu e le o manatu mamafa i ai le to’atele o tagata o loo alala ma papaaao i le Faleagafulu nei i le tulaga pagatia o loo fetaia’i ma Manu’a, ae o le mea moni lava, “e $3.50 le tau o le pusamoa o loo fa’atau ai i Tutuila nei ae $12.50 o lo o fa’atau ai i Manu’a, ma o se tulaga lea e lagona ai le fa’anoanoa o le loto pe a mafaufau atu i le tulaga pagatia o loo feagai ma tagata o le itumalo”.

O le itula e 8:30 i le taeao o le aso Faraile o le vaiaso nei, lea ua fa’atulaga e faia ai le iloiloga a le Komiti o le Pulega o Uafu ma Malaevaalele, e fesiligia ai le Fa’atonusili o le Ofisa o Uafu ma Malaevaalele a le malo ia Taimalelagi Dr. Claire Poumele mo le fa’amaninoina o lenei mataupu.

I le mataupu o ta’avale o lo o lesitala i laisene mo tagata taito’atasi (private licence), ae o lo o fa’aaoga e ni isi o pisinisi Asia e la’u ai uta ma fa’aaoga mo a latou pisinisi, o se tasi lea o mataupu na fesiligia e le afioga a Faimealelei.

“Ua manino le tulafono, e i ai lava le lafoga e totogi e tagata mo ta’avale mai fafo e fa’aaoga e aiga, e i ai fo’i le lafoga e totogi mo ta’avale e fa’aaoga e pisinisi, peita’i o le faiga le fa’amaoni lea ua molimauina e ni isi o le aufaipisinisi Asia, ua fa’aaoga ta’avale o loo lesitala i laisene a tagata ta’ito’atasi e la’u ai uta ma galuega tau pisinisi, ma ua foliga mai ua le maua ai e le malo le tupe e tatau ona ao mai le lafoga”, o le saunoaga lea a Faimealelei, ma ia fautuaina ai le tatau lea ona fesiligia le Ofisa o Leoleo o loo latou fa’amalosia lenei tulafono mo le fa’amaninoina o lenei mataupu.

O le itula e 11:00 i le taeao o le aso Tofi o le vaiaso nei, lea ua faatulaga e faia ai le iloiloga a le Komiti o le Puipuiga o le Saogalemu Lautele a le maota o sui, lea la’a fesiligia ai le Komesina o Leoleo e uiga i le mataupu lenei, atoa ai ma le mataupu e fa’atatau i le tupe lea e lesitala ai ta’avale a tagata to’atasi i le Ofisa o Ta’avaleafi i masina ta’itasi, lea ua fa’aitiitia mai le tulaga maulauga sa i ai.

Na taua e le afioga i le Taitaifono o le Komiti ia Manumaua Wayne Wilson i luma o le maota, le to’atele o le atunu’u ua latou fesiligia le suiga ua faia e le Ofisa a le OMV i le lesitalaina o ta’avale a le atunu’u, e pei ona fa’aitiitia mai ai i le $80 sa i ai i le $41.

O le Komesina o Leoleo ia Le’i Sonny Thompson lea ua fa’amoemoe e molimau i lenei mataupu, atoa ai ma le Pule o le Ofisa a le OMV i Tafuna.

O se tasi o mataupu sa fesiligia i luma o le maota i le taeao ananafi, o le tulaga maualuga ua i ai pili a le falema’i a le LBJ mo tagata mai fafo.

Saunoa Fetui e fa’apea, i le taimi o le malologa a le Fono ua tuana’i atu, na o ai ma se tasi o ona tei mai Samoa e vaai le foma’i, ma mana’omia ai le faia o le tui e siaki ai le toto o le ali’i na gasegase, ae ina ua mae’a ona faia le tui e siaki ai le toto, sa fautuaina loa i laua e le tama’ita’i tausima’i la te toe fo’i i le fale, ae tu’u atu le 2 vaiaso e fa’atali ai le fa’aiuga o le suega, ona toe valaau atu loa lea e ta’u atu le fa’aiuga o le suega pe a maua mai.

I le masina na sosoo ai ina ua fiu e fa’atali se toe telefoni atu a le tausima’i e ta’u atu le fa’aiuga o le suega, na la toe malaga ai lona tei mai Samoa e fai mai sana kilia mai le falema’i mo le toe fa’afouina o lona pepa nofomau i le Ofisa o Femalagaaiga, ae na fa’afuase’i ina ua taunu’u atu, o lo o i ai le pili e $521 e tatau ona totogi muamua fa’atoa mafai ona fai le kilia.

“E na o le tui e siaki ai le toto na fai ae aumai le pili e $521, ae lei maua atu fo’i se fa’aiuga o le suega sa faia, a o lenei ua fai mai e totogi lenei tupe tele, o se tulaga e ofo ai le mafaufau”, o le saunoaga lea a le sui fofoga fetalai, ma ia talosagaina ai le Komiti o le Soifua Maloloina a le malo ina ia fa’atulaga se iloiloga mo lenei mataupu.

O le itula e 11:00 i le aso Faraile o le vaiaso nei lea ua faatulaga e faia ai le iloiloga, e fesiligia ai le Pulesili o le LBJ ia Taufete’e J. Faumuina ma le Foma’i Sili ia Dr. Iotamo Saleapaga e uiga i lenei mataupu.

Saunoa le afioga Lavea Fatulegae’e Palepoi Mauga e fa’apea, o lo o manino le tulafono sa pasia i tausaga ua mavae, e $10 e totogi e vaai ai le foma’i i taimi faigaluega, ae $20 e vaai ai le foma’i pe a tuana’i taimi faigaluega, peita’i o lo o taua pea e ni isi o le atunu’u le tutusa o le totogi i taimi faigaluega ma le tuana’i ai o taimi faigaluega pe a fia vaai le foma’i i le $20.

O le agaga atoa o iloiloga e pei ona sauni atu i ai komiti eseese a le maota o sui, o le taumafai lea ina ia saili ni auala e tali ai fesili ma fa’asea a le atunu’u e tusa ai o mataupu eseese e pei ona fesiligia.