Fa’asala e le Fa’amasinoga ia Daniel Taufua i le toese mo le 28 masina

E 28 masina i le toese lea ua fa’asala ai e le Fa’amasinoga Maualuga le ali’i o Daniel Taufua, ina ua fa’amaonia e le fa’amasinoga moliaga mamafa 3 o le gaoi sa tu’uaia ai o ia e le malo. I le tali ioe ai o Taufua i moliaga mamafa e 3 o le gaoi, sa ia ta’utino ai i luma o le fa’amasinoga e fa’apea, i le va o le masina o Tesema 2016 ma le masina o Fepuari 2017, sa ia osofaia ai ni faleoloa ma ave fa’agaoi se tinoitupe e silia i le $3,000.

E 2 mataupu tau solitulafono mamafa na ulua’i tu’uaia ai e le malo le ali’i o Taufua, e mafua mai i fa’alavelave lea na ia osofa’ia ai ni faleoloa ae ave fa’agaoi tupe ma ni isi o meatotino taua. I le tagi muamua sa faila fa’asaga ia Tautua, na tu’uaia ai o ia i moliaga mamafa e 2 o le talepe fale i le tulaga muamua, ma moliaga mamafa e 3 o le gaoi, ae i le tagi lona lua, sa tu’uaia ai o ia i moliaga mamafa e 3 o le gaoi, tasi le moliaga o le faomea i le tulaga muamua, tasi le moliaga o le talepe fale i le tulaga muamua, ma le moliaga mamafa e tasi o lona fesoasoani i lea i le solitulafono a le isi tagata.

I lalo o se maliliega na sainia e Taufua ma le malo, lea fo’i na talia e le fa’amasinoga, sa ia malie ai e tali ioe i moliaga mamafa e 3 o le gaoi, ae talosaga ai loa le malo i le fa’amasinoga ina ia solofua uma isi moliaga o lo o totoe ai i le pepa o tagi sa latou fa’aulu, lea fo’i na talia e le fa’amasinoga.

Ina ua maua le avanoa o Taufua e fa’atoese ai i le fa’amasinoga, sa ia ta’utino ai lona salamo moni e tusa ai o lana solitulafono sa faia, atoa ai ma lona talosagaina o se isi avanoa mo ia se’i toe fo’i atu ai i tua e saili sana galuega e tausi ai lona Tina fa’apea lona aiga atoa.

“O masina e 5 ma aso e 6 lea na taofia ai a’u i le falepuipui, ua ou a’oa’oina mai ai se lesona taua mo lo’u olaga, ma ua ou iloa ai le leaga o le mea sese sa ou faia, ua ou lagona ai fo’i lo’u salamoni moni mai la’u solitulafono sa faia”, o le ta’utinoga lea a Taufua, 30 tausaga le matua o le soifua.

Na fa’ai’u lana talosaga i lona fa’atoese lea i aiga e ana pisinisi sa a’afia i lana solitulafono, ina ia alolofa ma fa’amagalo o ia. Na taua e lona Tina i lana molimau i luma o le fa’amasinoga e fa’apea, o lana tama e le o se tagata leaga o ia, ae o se tagata e galue malosi ma loto alofa i le aiga.

O suiga e pei ona a’afia ai lana tama, na alia’e mai i le taimi ao tautua ai o ia i totonu o vaega ‘au a le malo o Amerika mo le 3 ma le afa tausaga, ma mafua ai loa ona ia naunau e toe fa’afo’i mai si ana tama i ona lima na te tausia, ona o a’afiaga ua tula’i mai i lona mafaufau.

Atonu o le tele o fa’afitauli sa fetaia’i ma Taufua i lona olaga e pei o le taimi na alu ese mai ai i totonu o vaega ‘au, valavala le la ulugali’i ma lona to’alua, ma le tele lava o isi tulaga fa’aletonu sa la fetaia’i, o iina lea ua mafua ai ona tutupu mai ai suiga e pei ona a’afia ai o ia i lenei solitulafono.

Na taua atili e le Tina e fa’apea, ina ua atoa aso e 5 e le i toe oo atu le ua molia i le fale, sa ia fa’afesoota’i ai loa le Ofisa o Leoleo mo se fesoasoani, peita’i sa fa’ailoa ane e Leoleo ia te ia, e le tatau ona tau sailia fua lana tama, e le o ia o se tamaititi laitiiti, ae o ia o le tagata ua matua, peita’i na taua e le Tina i lana molimau lona naunau pea ina ia saili si ana tama, ona o tulaga fa’aletonu e pei ona a’afia ai lona mafaufau, peita’i na fa’ateia o ia ina ua logoina o ia e Leoleo e uiga i le mataupu e pei ona ta’usala ai nei o ia.

Na ta’utino le Tina i le fa’amasinoga e fa’apea, o le a ia taumafai malosi e saili se polokalame Fa’a-le-agaga i fafo e ave i ai si ana tama, ina ia fesoasoani ai i le fa’afitauli o loo a’afia ai o ia.

E ui na finau le loia a Taufua ia Michael White ina ia fa’asala le ua molia i se fa’asalaga fa’anofovaavaaia, e aunoa ma le toe tu’uina atu o se isi fa’asalaga fa’a falepuipui na te tuliina i le toese, peita’i na finau le loia a le malo ia Gerald Murphy ina ia fa’asala o ia i se fa’asalaga pito sili ona mamafau e pei ona fa’atula’i mai e le tulafono.

Na fesili le afioga i le ali’i Fa’amasino ia Elvis P. Patea ia Murphy poo le a le ituaiga fa’asalaga mamafa o loo mana’o le malo e fa’asala ai Taufua, ae na tali le ali’i loia, talu ai o le moliaga o le gaoi e mafai ona fa’asala ai se tasi i le toese mo le 7 tausaga, e mana’o le malo ina ia fa’asala Taufua mo le umi e 7 tausaga i le falepuipui.

O le itu e pito sili ona matuia ai le gaioiga sa faia e Taufua e pei ona saunoa Patea, pe ana fa’apea e alu atu lana osofaiga i totonu o faleoloa ae o loo tali mai fo’i tagata e ana meatotino na gaoia e ala i lo latou fa’aaoga o ni a’upega, lona uiga e sili atu ona matuia fa’alavelave e tula’i mai, ma e ono oo atu ai lava i le maliu o se tasi.

O ni isi o tuutuuga o le nofovaavaaia a Taufua mo le 7 tausaga, o le fa’asa lea ona ia toe soli se tulafono, faasa ona ia toe alu i faleoloa e lua sa ia osofaia, a ia avea o ia ma tagatanu’u e tausi i tulafono a le malo i soo se taimi.

E 28 masina lea ua poloaina e taofia ai o ia i le toese, totogi le salatupe e $2,000, ma ia toe totogi tupe i faleoloa e 3 sa ia osofa’i ma gaoi - $180 mo le Fale Tamea i Iliili, $130 i se faleoloa i Nu’uuli, ma le $3,000 i se kamupani i Fagaima.

Ua mae’a fo’i ona lau fa’asalaga a ali’i e to’alua ia sa fesoasoani i le solitulafono a Taufua, le susuga ia Nassan Tupuola ma Aki Leke Jungblut.

O le afioga i le ali’i fa’amasino ia Elvis P. Patea sa iloiloina le fa’aiuga a Taufua, fa’atasi ai ma le lagolagosua a afioga i ali’i Fa’amasino Lagolago ia Su’apaia Pereira ma Satele Lili’o Ali’itai.