Tala Vaifanua

FA’ATASIGA AUAIGA TUATO’O I ALOFAU —

Na tatala le ulula’i mafutaga fa’aleaiga a le Aiga Sa Tuato’o i le latou Maota Talimalo o Faleteine i le Malae o Aloitafuna i Alofau i le afiafi o le aso  Sa na te’a nei, i le sauniga o le Feiloa’iga o Aiga i ona fuaiala e 9, o alo na soifua mai i le Fa’atama o le Aiga Sa Tuato’o, le afioga le Usoali’i Muagututia Aigafealofani Taulau Milo Young Tuato’o i Alofau lava.

E lua usuga a lenei tua’a, ma ua fa’apea fo’i ona manatu i latou uma na tupuga mai ia te ia, e ao ina faasilisilia le mau sa totoina ia i latou e lo latou tua’a, “ia fealofani aiga.” O le ‘auga o le ulua’i fa’atasiga, ia fa’atino se miti na alia’i i le finagalo o Tuato’o Reese, lea e tula’i nei i le suafa.

Sa ia fa’ailoa, “O lenei fa’amoemoe ia mafai ona fa’atasi le Aiga Sa Tuatoo o lo’o soifua ma papa’a’ao i so’o se vaipanoa o le lalolagi, ma ia o’o mai e va’ai i le latou nofoaga ma le aiga na tupuga atu ai!”

O le sauniga fa’afetai sa fa’afeiloa’ia ai le Auaiga na tupuga mai ia Muagututi’a Aigafealofani Milo Young Tuatoo, ma sa tutula’i ai sui ta’itasi matutua o soifua mai pea, ina ia tutuina moli sela e fa’amanatu ai pea a latou mafutaga pele ma mamae a’o le’i motusia le mafutaga i le oti. O lea le valga faigata o le sauniga, aua sa iloga ona tutulu i latou sa tutula’i mo lea faiva.

“Ua toe aumaia uma i lenei sauniga le tiga o le oti i o matou loto, se mea a faigata o le toe fo’i mai i aiga ae ua leai matua sa fai ma va’aiga i se aiga fiafia,” o se tala lea a se tasi o tina sa tutu e ia le moli mo lona tama ua maliu.

O le susuga le faifea’u AOG Rev. Papu Lafiti na saunoa, “O outou fanau, ia outou fa’alogo i o outou Matua i le Ali’i, aua o le mea tonu lava lea.” Na ia fa’ailoa ai le aoga o lea lava fuaitau o le Tusi Paria, aua o le aiga lava e amata fafaga atu ai le ola fa’aleagaga o le fanau. “O outou Tama fo’i, aua tou te fa’aonoono i a outou fanau.”

O lana toe tima’i, “Ia outou iloa, po’o a lava le poto o le palagi ma ana polokalama o lo’o taumafai e fa’aleleia ai le soifua o fanau talavou, ae o le filemu moni ma le Amio e amata mai i totonu, e le amata atu i fato. O le agaga o le tamaititi ma lona mafaufau e ao ina muamua fafaga, ona poto lea e ola ma fa’avasega mea uma e alia’i ane e fa’asagatau i lona tagata taumafai ia ola lelei ma amio tausa’afia.”

“Ia tasi le fatu tasi le loto! Le auau lena o lea mafutaga fa’aleaiga fealofani, ia tatou tutu fa’atasi ona maua lea o le tasi le fatu, tasi le loto. Ia tatou o mai fa’atasi i le mafaufau e tasi, ia fealofani, ona faia lea o le manatu o Iesu ia i tatou uma, aua a fealofani ua fusia i tatou uma i le Alofa!”

O le aso ananafi na fa’avasega mo ta’aloga fa’asamoa, ma tiute fa’asamoa e ao ina popoto ai le fanau.

Aso Lua ua fa’atulaga ai le o i le Malae o Suigaula i Utulei mo ta’elega ma isi ta’aloga ma tu’uga a’au. A o’o i le afiafi, o le Bingo. O le Aso Lulu ua fa’atulaga e alu ai le malaga ta’amilo e maimoa Tutuila nei, ma fa’ai’u ‘aiga fiafia o le Afiafi Fa’aleaiga i le Sadies by the Bay i Utulei.

E toe mavae lava i latou i le Maota o Faleteine i Aloitafuna i le toe aso o le mafutaga, ma fa’atofa ai.

MALIU TAMAITA’I SAMOA I SE PULUFANA I WASHINGTON

O le tama’ita’i sa lavea i se pulufana ma ave i le falemai, ua maliu i le aso Tofi ma ua fa’amaonia mai e le falema’i sa fa’ataotolia ai o ia mo togafitiga, e pei ona lipotia mai i le setete o Uosinitone.

O lona suafa o Fa’avale Aiga Muipu mai le afio’aga o Aua. Ua fa’ailoa mai e le’i umi ona i ai lenei tama’ita’i i Uosigitone.

Ua le mautinoa le mafuaga, peita’i ua fa’ailoa mai ua mae’a lokaina lana uo tama i le King County, ona ua molia o ia sa fa’ao’oina lea solitulafono ua maliu ai Fa’avae. O ona manu’aga o lona ulu i le itu taumatau sa fa’amanu’alia ai o ia. Ia fa’amaise le Atua i le aiga loto fa’avauvau, ae ua tele fa’amaisega ua fa’ao’o mai fo’i e uo mamae a Fa’avale i si ona aiga atoa ona o lenei mea ua tupu.

Ua taua e le tama’ita’i leoleo i Federal Way, ia Uosinitone ia Cathy Schrock e tusa o le 9:30 i le taeao na maua ai le aveai mo se fesaosoani a Leoleo i le atugafale Mautotogi a le Club Palisades i South Star Lake Road.

O le fa’amaumauga a latou leoleo na o atu, lea ua fa’amauina se tama’ita’i talavou ua fa’amanu’alia i le fana ma e tuga lona mana’uaga. Ua fa’amauina fo’i o se ali’i Samoa foi e 23 fausaga le matua, ua taofia fo’i e leoleo ona o lea fa’alavelave. Ma o ia o se uo tama a Fa’avale.

Ua le mautu se tala o se mafuaga na tupu ai lenei mea, e molimauina fo’i e le to’atele o uo a i la’ua nei, e le o se tamaititi ulavale pe fa’alogogata le uo a Fa’avale.

I le tele o lipoti e afua mai i le taimi o lenei fa’alavelave e le’i ta’ua uma ai suafa o i laua nei , peita’i, i le tele o fe’au fa’amaise ua tusia ma fa’asalalauina, ua mafai ai ona fa’afesiligia nisi o sui o aiga na lua ma ua fa’ailoa patino mai ai o la’ua igoa.

O nisi ua fa’ailoa mai, “E leai se iloa o le a tupu mai lenei mea ia te oulua, e te lua fiafia ma talie i taimi uma, aisea ea lava lenei mea?” “E momoe lava i manu, ae sau mala e atai’e!”

LIPOTIA SE TASI MASALOMIA PULE I LE OLA

O lo’o masalomia ua mafua ona maliu se taule’ale’a e 30 tausaga le matua sa alaala i se nu’u i le itu i sasae o Tutuila, ona sa pule i lona lava ola.

O se tasi o ona tausoga sa asiasi i ai lenei atali’i ma sasa’a i ai lona fa’agau le malie, ma i’u ai ina toe fo’i i lona aiga, ma maua atu ai ua maliu I le taeao na soso’o ai.

O lenei talavou, ua fa’ailoa mai o se tasi e aga fiafia, ma e le’i leva fo’i le la’ua mafutaga ma si ona to’alua ma le fanau lea e nofo ai o ia i le aiga o lona to’alua.

E to’alua o la’ua alo, ae o le mafutaga fo’i na amata lava o a’o’oga i la’ua. O lo’o taofia e le Samoa News i le taimi nei le suafa o le ua maliu, se’i oo i se taimi o i luma, ona o lo’o fa’agasolo pea suesuega i lenei mataupu.

Na faailoa mai e se tasi o ona tausoga, “O le ola maumau lava o lenei atali’i, o lona toe aso sa matua fa’asua’ava lava, ma tele ana tala e atagia ai sa fa’aisaisa le mafutaga, ae naunau lava i si ana fanau. Fautua atu lava i ai, e alu i le fale, onosa’i o mea lava e tutupu, ae toe malu lava le tai.”

DR. TEARIKI PUNI - TOFIA KOMISI FOMA’I OCEANIA (ONOCMC)

O le ali’i foma’i e tupuga atu i Samoa, ae alaala ma faigaluega i le Atu Kuki ua filifilia nei e avea ma se tasi o alii foma’i e sailia agava’a o tama ma teine ta’a’alo i ta’amilosaga a le Oceania Games.

O Dr. Teariki Puni o se tausoga o se tasi o tatou faiaoga mo ta’aloga eseese lea sa  galulue fa’atasi i le tatou teritori nei, e tapena ‘au ta’a’alo i le vaitau na talimalo ai Amerika Samoa i ta’aloga Laiti a le Pasefika i le tausaga e 1997.

Sa ia saunoa e fa’apea, “Ona o lo ua maua lenei avanoa lelei e faia ai tiute patino i le Oceania, ae o se isi fo’i avanoa e fautuaina ai tatou tagata ta’a’alo mai malo fa’aatumotu o le pasefika i ala e tausia lelei ai o latou tino a’o fa’atauva i ta’aloga. O le tele o nisi mea ua maua, e le o mailoa e tagata ta’a’alo a’afiaga o latou mea’ai ma vaiinu a’o koleni, peita’i o le tu’ufa’atasiga o nei mea uma, e ono lamatia ai le agava’a o i latou e tauva ai.”

Ua aofia nei Dr. Puni i le vasega o foma’i fa’apitoa mo le Oceania National Olympic Medical Commission.