E LE O OE O SE SULI MONI

Vaega 66

“Sei o tatou mapu ane teisi i luma o le pa lea, sei fai sina koma ona toe vaavaai ai loa lea i se isi la’asaga e tatau ona tatou aga’i atu i ai”, o le talanoa fiafia atu lea a le tamaloa o Meki i lona to’alua faiaoga o Lucy, fa’apea le teineititi meauli o Ianeta lea ua avea lava ma ona afafine, fa’apea ai lana auauna e to’atasi lea ua totoe mai, ma le ali’i meauli pologa na la sosola ese mai i totonu o le malo o le tupu saua o Eteuati II. Na vaaia e le tamaloa o Meki foliga fiafia o lana au malaga, ma ua atagia mai ai le lagona o le fa’asaoina mai lea mai lima o fili saua sa taumafai e lamatia lo latou ola. E lei umi ona paka le ta’avale a Meki ma lana au malaga ae tatagi loa ma lana telefoni, fa’atoa toe tatagi lava lea o lana telefoni talu ona latou aga’i ese atu ma le aai o loo latou nonofo ai. “Talofa o Meki lea”, o le tali fiafia atu lea a Meki, ae na te’i ina ua fa’alogo atu, o le leo o lona Ta’ita’i lea o loo talanoa mai i le telefoni. “Talofa Meki, ou te lei talitonu e mafai ona ou toe fa’alogo atu i lou si’ufofoga, ae o lea ua ou maua uma le fa’amatalaga e fa’atatau i le tulaga o la outou solaaga atoa ai ma le toe fa’aolatia mai o le ola o le tama’ita’i meauli ia Ianeta sa oulua pulunaunau i ai ma si ou to’alua e toe fa’asao mai, ae o le a tatou teiloa’i i lo tatou ofisa autu i le itula e 10 nei i le taeao”, o le talanoa ane lea a le Ta’ita’i aoao o le Vaega o Leoleo nana i totonu o le aai lea o loo galue ai le tamaloa o Meki

O Meki, o ia lea o le Ta’ita’i o le isi lala o Vaega o Leoleonana i totonu o le tama’i aai lea o loo latou nonofo ai, lea o loo latou galulue ai ma ni isi o lana vaega fa’apitoa e to’a 6, ma o se tasi o i latou lea sa maliu ao taumafai Meki ma le ali’i pologa meauli e saili mai le laau lea e mafai ona fai ai le vai e togafiti ai le ma’i faigata sa a’afia ai le teineititi pologa o Ianeta, ona fa’asaoina mai ai lea o le isi to’atasi, ma le to’a 4 o lo o totoe pea i le Ofisa i le taimi atoa na malaga ese ai Meki ma taofia fa’apagota ai o ia i totonu o le malo o tagata pologa mo le silia i le 4 vaiaso. O totonu la o le aai lea o lo o nonofo ai Meki ma lona to’alua, lea fo’i ua fa’aopoopo atu i ai ma le teineititi pologa o Ianeta, e i ai fo’i le nofoaga e fa’amautu i ai sui o isi vaega fa’atupu fa’alavelave, i latou ia na latou ave fa’agaoi le teineititi o Ianeta mai le fale o le fafine saua o Mekala sa nofo ai ae auina atu i le nofoaga autu o tagata pologa.

E malama ane loa le taeao ae vaaia loa e Meki ma lana au malaga se ta’avale ua afe i totonu o le lotoa o le fale a le ulugali’i o Mekala ma lona to’alua o Pulusi. “Pei lava o se ta’avale lea a le vaega lea sa latou ave fa’agaoia oe Ianeta i le taimi muamua lava na aveese atu ai oe mai lenei nofoaga”, o le musumusu atu lea a le tamaloa o Meki i le teineititi meauli o Ianeta, lea o loo fa’alagolago i le tioata o le fa’amalama ma fa’atau pupula i le ta’avale lea o lo o aga’i atu i totonu o le lotoa ma paka tonu lava i luma o le fale a le ulugali’i o Mekala ma lona to’alua. E lei umi ae vaaia loa le matala o le faitoto’a ma latou vaaia ai se ali’i meauli talavou ma ona laei mama, ua savali atu ma tu i luma o le fasitepu o le fale ona ia taumafai lea e valaau pe i ai se isi e tali ane. Pe tusa o ni nai minute talu ona tu tu lea ali’i ae vaaia loa e Meki ma lana au malaga le savali ane o se tagata mai luga i le foga fale i luga ma talanoa ma le ali’i meauli lenei i luma o le ta’avale. E lei umi ae vaaia loa le savavali o le to’alua lea i luga o le fale e foliga mai o lea ua fa’aulufale le ali’i na malaga atu i le ta’avale. O le silia ai i le itula talu ona fai le talanoaga, na manatu ai loa le tamaloa o Meki e sili pe a latou aga’i sa’o atu loa i le latou fale e sauni ai mo le feiloaiga ma le Ofisa lea ua fa’atulaga e faia i le itula e 10 i le taeao lava lea. Ma o se tulaga na matua fa’afiafiaina ai le Ta’ita’i o le Vaega o Leoleonana i totonu o le aai, le taimi na matala ai le faitoto’a ae ulufale atu Meki, o lona to’alua, o le teineititi meauli o Ianeta, o le isi auauna na totoe mai ma le ali’i meauli pologa sa latou malaga fa’atasi mai.