800 fanau aoga ua auai i le polokalame o le SYEP i lenei tausaga

E 800 fanau aoga mai aoga eseese a le malo ua auai i le polokalame lea e galulue ai fanau aoga i galuega a le malo ma kamupani tua (Summer Youth Employment Program-SYEP), lea na tatalaina i le taeao ananafi i le maota o Tupulaga Talavou i Pago Pago.

O se sauniga lotu puupuu e tatala aloaia ai lenei polokalame, na saunia lea e le susga i le ali’i Faifeau ia Rev. Fouvale Asiata, o le Ekalesia EFKAS i Matu’u/Faganeanea, lea na fa’amamafa ai e le susuga i le ali’i Faifetau le taua o avanoa e maua e fanau e avea ai i latou ma tagata e fa’atinoina galuega lelei mo le atunu’u.

O le mae’a ai o le sauniga lotu na sosoo ai loa lea ma le saunoaga autu o le polokalame, le afioga i le ali’i Kovana, ia Lolo Matalasi Moliga, ma ia fa’ailoa ai le fa’aauau pea lea o fuafuaga a le malo ina ia fa’ataua pea avanoa mo tupulaga talavou a le atunu’u.

Na fa’ailoa e Lolo i fanau aoga sa auai i lenei mafutaga aemaise ai ni isi o Fa’atonusili ma sui o Matagaluega ma Ofisa Tumaoti, fa’apea ai Pisinisi ma Kamupani tua sa auai, le naunau pea lea o le malo e saili avanoa faapenei e maua ai e fanau aoga le auala e tautua ai i soo se galuega mo le fa’aaogaina o lo latou tomai sa a’oa’oina ai i latou i faleaoga.

Saunoa Lolo e fa’apea, e ui i le tau fa’asoasoa pea e le malo o tulaga tau tupe, ae le taofia ai lava le faia o le mea sa’o, o le tatala lea o avanoa i fanau aoga ma tupulaga talavou latou te molimauina ai auala o lo o fa’atinoina ai galuega i vaega eseese o le malo ma pisinisi tua.

Sa ia fautuaina fanau aoga, ina ia fa’aaoga tatau le avanoa ua latou maua e saili ai se mea aoga ma le taua mo le lumana’i, ae aua ne’i avea o se auala e naunau ai e mafuta i isi uo ma tafao solo ai.

Ae mo Ofisa uma a le malo atoa ai ma pisinisi tua o le a latou fa’a faigaluegaina fanau aoga e to’a 800 e pei ona lesitalaina i le polokalame o lenei tausaga, na taua ai e Lolo le taua tele o le latou pito laau o le a fa’atinoina nei, o le aoaoina lea o fanau aoga ma tupulaga talavou i auala e fa’amasani ai i le fa’atinoina o galuega.

Sa ia fautuaina fo’i Ofisa o le malo ma kamupani tua, ina ia aua ne’i o latou fa’aaogaina fanau aoga i isi feau le aoga e pei o le tunuina o le kofe poo le fetulia’i solo fo’i e fai mai feau a le Ofisa poo le Pule, ae tatau ona fa’aaoao i latou i le fa’atinoina o galuega i totonu o le Ofisa, o le mafua’aga tonu lea na ala ai ona auai i latou i le polokalame.

Na fa’ailoa atili e le ali’i kovana e fa’apea, talu lava ona tula’i mai le la faigamalo ma Lemanu i le 2013, o lo o ave pea lava le fa’amuamua i auala e fa’ataua ai fanau aoga ma tupulaga talavou, ona e i ai lo laua talitonuga o fanau aoga ma tupulaga talavou, o le lumana’i lea o le malo, aiga ma le atunu’u, ma, afai e lelei ona tapu’e lo latou olaga aoaoina atoa ai ma le fa’amasani i auala e fa’atinoina ai galuega, o le a fa’a faigofie ona ulufale atu i latou i totonu o fale faigaluega ma latou fa’atinoina galuega i se taimi vave ma faigofie.

E ese mai o sui o ofisa o le malo ma pisinisi tua sa auai, sa fa’apea fo’i ona auai ni isi o matua o fanau aoga, i lo latou fia molimauina lea o le amataina o lenei polokalame.

Na taua e le Tina o Margrett Liua o Aua e fa’apea, o le taua o le polokalame lenei mo fanau aoga, e le gata e sui ai fo’i le isi si’osi’omaga e ulufale atu ai o ia i le taimi lenei o le tuua o aoga, ae o se la’asaga e fa’atosina ai le mafaufau ina ia fa’amae’a le aoga ae fo’i mai e galue mo le atunu’u.

“O le to’atolu ai lea o la’u fanau ua auai i le polokalame lenei a le Kovana talu mai le 2013, o tama’ita’i matutua e to’alua ua galulue nei i ofisa o le malo fa’apea ai ma le ali’i e 16 tausaga lea ua lesitalaina nei, ou te fa’afetaia ai le kovana ma le faigamalo ona o lenei polokalame ua mafai ona maua e fanau aoga e aoaoina ai isi lesona fou mo le olaga i le lumana’i, ae o se auala lelei fo’i e maua ai sina tupe e fesoasoani ai i le tapenaina o meaaoga mo le toe a’e o aoga ia Setema”, o le saunoaga lea a Liua.

Ae na taua e le tama’ita’i aoga ia Lilly Tonumaipe’a, 17 tausaga le matua mai Vaitogi lona fiafia ina ua maua le avanoa e auai ai i lenei polokalame.

“O se polokalame taua lenei mo matou fanau aoga, e le gata o se la’asaga e fa’amasani ai i le fa’atinoina o galuega i totonu o le ofisa, ae o se auala fo’i e lu’itauina ai mafaufau o fanau aoga ina ia fa’amaoni i le aoga ona maua ai lea o le galuega lelei”, o le saunoaga lea a Tonumaipe’a.

E 6 vaiaso lea ua faatulaga e fa’agasolo ai lenei polokalame, ma le fa’amoemoe e mae’a i le aso 8 Aokuso, 2017, e pei ona fa’amaonia mai e se sui o le Ofisa o Tagata Faigaluega a le malo i le Samoa News.

Saunoa lea sui sinia e fa’apea, e na o le 600 avanoa sa mafai ona gafatia e le malo ina ua fa’atoa tau toe afuafua mai lenei polokalame i le amataga o le masina nei, ae na toe faia suiga ina ua toe taliu mai le malaga a le kovana mai fafo i le vaiaso na te’a nei, na mafai ai loa ona toe maua isi avanoa e 200 e pei ona i ai le aofaiga atoa e 800, ma ua fa’amoemoe o Ofisa o le malo ma Kamupani tua e to’a 63 lea ua sauni latou te fa’a faigaluegaina fanau aoga.