Fesoasoani Komiti Faiga Faiva toe fa’alautele uafu mo va’a fagota tetele

E $184,000 se vaega tupe ua fa’amatu’u mai e le Komiti o Faiga Faiva a le Pasefika mo Amerka Samoa, e fesoasoani i le toe fa’alauteleina o le uafu mo va’a fagota tetele i totonu o le atunu’u, i le vaega o lo o i ai le uafu i le Malaloa Marina i le taimi nei.

O le fonotaga lona 170 a le Komiti o Faiga Faiva a le Pasefika o lo’o usuia i Honolulu i le vaiaso lenei, ua fa’aalia ai le talia e le Komiti o se talosaga sa tu’uina atu e le Pulega o Uafu ma Malaeva’alele a le malo o Amerika Samoa, mo se fesoasoani i le tulaga laititi o lo o i ai le uafu mo va’a fagota tetele i le taimi nei.

E pei ona taua i le ripoti a le Pulega o Uafu ma Malaeva’alele a le malo o Amerika Samoa, mo se fesoasoani i le tulaga o le vaega tupe e pei ona pasia e le Komiti o le a fesoasoani lea i le fausiaina o le isi vaega o le galuega, ma le fa’amoemoe o le a fa’atupe e Amerika Samoa le isi vaega tele o lenei galuega mai vaega tupe o Atina’e Tetele (CIP).

E pei ona taua atili i le ripoti, ua i ai le fuafuaga a le malo o Amerika Samoa, o le a aofia i totonu o le lisi o galuega e ave i ai le fa’amuamua mai le vaega tupe o le CIP, le fa’atupeina o le galuega e toe fa’alautele ai le uafu mo va’a fagota tetele, ona o se tasi lenei o lu’itau ua tele tausaga o fetaia’i ma le aufai faiva, o le laititi lea o le avanoa e maua e i latou i luga o le uafu tele mo a latou gaioiga.

E pei ona manino i le lisi o galuega ua fuafua le malo o Amerika Samoa e fa’atupe mai i tupe fesoasoani mai le CIP, e tusa ma le $54 miliona le vaega tupe ua fuafua e tu’uina atu i le Pulega o Uafu ma Malaeva’alele e faatupe ai ana galuega fa’atino eseese.

Mai lea aofaiga tupe tele e pei ona taua, e $15 miliona ua fa’amoemoe e fausia ai le ‘air traffic control tower’ fou mo le fa’atonutonuina o va’alele e ulufale mai i totonu o le atunu’u, $15.8 miliona ua fa’amoemoe e fa’aleleia ai tulaga o mea e fa’aleagaina i lologa ma tafega, $5 miliona ua faamoemoe e fausia ai le uafu i Aunu’u, $5 miliona mo le fausiaina o se ala sese’e mo va’alele i le motu o Swains, $4 miliona mo le toe fa’alolotoina o le uafu i Faleasao, Manu’a, $2.5 miliona mo le fausiaina o le Ofisa fou o le Pulega o Uafu ma Malaeva’alele, $1.8 miliona mo le toe fa’alauteleina o le uafu i Ta’u, $1.8 miliona mo le toe fa’alauteleina o le uafu i Ofu, $1.8 mo le tusiaina o le ata o le galuega mo le uafu i Aunu’u, $856,000 mo le fa’aleleia o le vaega e teu ai container i luga o le uafu, $350,000 e fa’aaoga e fa’afetaui ai tupe a le FAA, ma le $200,000 mo le fa’apipi’iina lea o moli i le vaega o lo o teu ai container i luga o le uafu tele i Fagatogo.

A o fuafua ai le fausiaina o le galuega mo le fa’alauteleina o le uafu mo va’a fagota tetele, ua fautuaina e le konekarate o le a fausiaina le galuega le malo o Amerika Samoa, i le mana’omia lea o se isi vaega tupe fa’aopoopo e fa’atupe ai le faia o se su’esu’ega i le vaega o le a fa’atino ai le galuega, ina ia mautinoa e lelei ma malosi.

O le masina o Aperila o le tausaga nei na fono ai le Pulega o Taulaga ma Malaeva’alele, ma ua tula’i mai ai loa le taofia o le galuega mo le taimi nei, ona e le o gafatia e le malo o Amerika Samoa le tu’uina atu o se isi vaega tupe fa’aopoopo e pei ona talosagaina e le konekarate.

O le fonotaga mulimuli sa faia i le masina na te’a nei, na fa’aalia ai e sui o le Komiti Fautua a le malo le tatau lea ona fa’agaioi le galuega ma fa’amae’aina loa, ona o se tasi lenei o galuega e sili ona taua ma aoga.