Fa’aitiitia tupe e fa’aalu i kesi o ta’avale a le malo

A o taumafai ai le faigamalo a Lolo ma Lemanu e tau fa’asoasoa ma fetu’una’i manaoga uma o lo o fa’atupe i tupe lotoifale a le malo, o le vaiaso nei lea ua fa’alauiloa aloaia mai ai se tasi o suiga ua faia ina ia fa’asoasoa ai le fa’aaoga tatau o tupe, e ala i le fa’aitiitia lea o tupe e alu i kesi a ta’avale a le malo.

O lenei mataupu na laga e le afioga i le ali’i kovana ia Lolo Matalasi Moliga i le fonotaga a le Kapeneta i le vaiaso ua te’a, peita’i o se tusi sa tu’uina mai e le Fa’atonusili o le Matagaluega o Galuega Lautele a le malo i le amataga o lenei vaiaso, ua saga fa’amausaliina ai loa lenei suiga.

E pei ona taua e Faleosina Voigt i lana tusi sa tu’uina atu i Fa’atonusili ma Fa’auluuluga o Matagaluega uma ma Ofisa a le malo, le amata lea ona fa’aitiitia i le afa vaega tupe uma sa fa’aalu e Ofisa uma a le malo o lo o fa’atupe kesi o a latou ta’avale i tupe lotoifale, seia toe i ai se isi fa’asilasilaga i se taimi o i luma.

“Talu mai le fonotaga a le kapeneta i le aso 9 Iuni, lea na fa’ailoa ai e le kovana le tatau lea ona fa’aitiitia tupe e fa’aalu mo kesi o ta’avale a ofisa eseese a le malo, o lenei tusi e fa’ailoa aloaia atu ai le amata aloaia i le taimi nei ona fa’amalosia lea suiga mo le masina lenei o Iuni. O matagaluega uma a le malo o lo o fa’atupe i tupe lotoifale le totogiina o kesi mo a latou ta’avale, o le a amata ona fa’aitiitia i le afa lea vaega tupe sei vagana ua toe tu’uina atu se isi fa’aaliga lata mai”, o se vaega lea o le tusi a Voigt sa tu’uina atu i Fa’atonusili uma a le malo.

E le o aofia ai ofisa uma a le malo o lo o fa’atupe i tupe feterale kesi mo a latou ta’avale i le suiga lenei, ae o lo o fa’aauau pea tulaga e pei ona masani ai ofisa uma a le malo o lo o fa’atupe i tupe mai le feterale kesi mo a latou ta’avale.

Na fa’ai’u le tusi a Voigt i lona talosagaina lea o afioga i Fa’atonusili, i le mana’omia lea o le latou galulue fa’atasi mo le fa’amalosia o lenei suiga mo le manuia o le malo.

Na taua e Lolo i lana kapeneta le tatau lea ona latou galulue fa’atasi i le tau fa’asoasoaina o tupe a le malo, ma vaavaai i auala e sefe mai ai tupe o lo o vaaia le soona fa’aaoga i auala le tatau.

“E le afaina le malo pe afai e tutu ta’avale e le feoa’i, ae afaina le malo pe afai e feoa’i solo ta’avale a le malo ae leai se aoga e feoa’i solo ai fua, e fa’apena fo’i i va’a a le malo, e le afaina le malo pe afai e tutu va’a e le feoa’i, ae afai loa e soona feoa’i va’a e aunoa ma se aoga, ona vaaia loa lea o le afaina o le malo i le tele o tupe e alu i kesi e utu ai va’a ma ta’avale”, o le saunoaga lea a le ali’i kovana i luma o lana kapeneta.

I tulaga o malaga a le va’a a le malo o Manu’a, na fautuaina e Lolo le tatau lea ona lava le malaga e tasi i le masina, pe afai e le tele ni uta ma ni tagata e malaga i Manu’a, ina ia sefe mai ai le tele o le tupe e alu i le kesi e utu ai le va’a, ae le o i ai se mafua’aga taua e ala ai ona lua malaga i le masina.

“O le agaga atoa o le malo ua mafua ai ona taumafai nei suiga, ina ia tau fa’asao mai tupe e fa’atino ai manaoga e pito sili ona taua ma mana’omia i le taimi nei, ae se’i fa’atalitali le taimi e toe lelei mai ai tupe ao fa’alotoifale i le lumana’i, ona mafai loa lea ona toe fo’i le malo i le tulaga masani sa sau ai”, o le saunoaga lea a Lolo i lana kapeneta.

I ni isi o fonotaga a le kovana ma lana kapeneta ua mavae atu, e fautuaina ai lava e Lolo ana fa’atonusili ina ia silasila toto’a i auala e fa’asao mai ai tupe a le malo mai le soona fa’aaoga i auala e le tatau, e pei o malaga mo fonotaga i Amerika o lo o molimauina pea le fa’aauau pea ona totogi e le malo mai tupe lotoifale.

Ona o le naunau lava o le kovana ina ia taofi le toe soona fa’atupe e le malo o malaga a tagata faigaluega mo fonotaga i fafo e aofia ai ma Amerika, sa ia fautuaina ai Fa’atonusili ina ia taofia le toe soona o a latou tagata faigaluega i fonotaga i fafo, ae fa’aaoga fesootaiga faaonaponei e fesootai ai mo mataupu taua e talanoaina i taimi o fonotaga i fafo, sei vagana o ni fonotaga e tatau ai lava ona auai tagata faigaluega ona fa’atoa talia lea e malaga, ona o loo taumafai pea le malo e taofiofi tulaga o malaga o lo o fa’atupe i tupe lotoifale, ona o lea e tulaga fa’aletonu tupe lotoifale a le malo i le taimi nei.