$46,000 aofai sikolasipi Bluesky mo fanau a’oga

O le taeao ananafi na fa’atasia ai matua ma sui ua agava’a mo sikolasipi e 4 na ofoina e le kamupani a le Bluesky Communications mo le fanau fa’au’u mai a’oga maualuluga, ma e ulufale atu i ni kolisi po’o iunivesite i fafo ma iinei fo’i. O le lona tolu ai lenei o tausaga, o ofoina pea e lenei kamupani avanoa sikolasipi.

O i latou ua filifilia e to’afa mo lenei tausaga e to’atolu i latou e ulufale atu i Iunivesite i fafo, ae to’atasi o le a a’oga i le Kolisi Tu’ufa’atasi a Amerika Samoa.

O le to’atolu mo Iunivesite i fafo ua aofia ai: Ms. Tedy Barber ua fa’au’u mai Fagaitua High ae ua fa’amoemoe e ulufale atu i le St Martin’s University mo le isi tausaga a’oga fou. Ms. Gabriella Langkilde ua fa’au’u mai i Fa’asao Marist High ma ua fa’amoemoe e ulufale atu i le Harvard University. Ms Farah Young ua fa’au’u mai Tafuna High peita’i ua fa’amoemoe nei e ululale atu i le Arizona State University. Ae o le tama’ita’i o Ms Casidhe Mahuka ua mae’a fa’auu mai Fa’asao Marist High ma ua fa’amoemoe e ululale mo ana a’oa’oga i le tatou Kolisi Tu’ufa’atasi.

O le fa’ailoga ua ofoina mo i latou e aga’i atu i Kolisi ma Iunivesite i fafo ua fa’atulaga ai e le Bluesky Communications le sikolasipi ta’i $14,000 mo le 4 tausaga peita’i o le a tuuina atu na’o le ta’i $3,500 i tausaga ta’itasi. O le fa’ailoga mo i latou e ulufale i le Kolisi i Amerika Samoa, ua fa’atulaga ai le $4,000 mo tausaga e lua, peita’i ua fa’atulaga fo’i e toina atu tai $2,000 i tausaga ta’itasi.

O le a’ao lava o le ali’i pule sili o le Bluesky, Toleafoa Douglas Greevey sa ia fa’atalofa ma taua’ao aloaia tusi fa’ailo i le fanau tofia mo nei sikolasipi.

E ese mai lea vaega tupe tele ua ofoina e fesoasoani i le totogia o latou a’oga i fafo ma iinei foi, ae ua faataga fo’i ona fa’afaigaluegaina e i latou nei sui pe afai o le a toe malaga asiasi mai i aiga i vaitaimi o tu’uaga uma i le taumafanafana. O le latou feasoaoni lava i le olaga a’oa’oina o alo o le atunu’u, ina ia aga’i pea i luma le folauga i tulaga tau le tomai lautele mo tatou fanau.

I se tautalaga fa’apitoa a Toleafoa, sa ia fa’ailoa ai, “O le fa’afetai ona ua mafai ona ausia e outou le matati’a e maua ai lenei fesoasoani mai le Bluesky Communications, fa’amalo le tauivi, fa’amalo le sailimalo i ala o le sailiga o le atamai. Ia outou o atu ma taumafai atili a’o i ai i na nuu mamao, ia manuia o outou faiva ma ia outou toe fo’i manuia mai. Tau ina ia aoga lenei seleni ua ofoina atu, e fa’aaoga mo le totogia o tou a’oga. Ia manuia a outou taumafaiga uma.”

O le filifiliga o sui e agava’a mo nei sikolasipi sa fa’atulaga ia gafatia e le sui ona ausia le GPA 3.5, SAT e tatau ona maua le 1050 ma sili atu. ACT 20 ia lelei fo’i ona tusi fa’amaonia e taua’aoina, ia i ai fo’i ni ona taimi e faia ai ni galuega lelei mo nisi po’o le atunu’u. Ia lelei ona tusia lana tusi talosaga mo lenei sikolasipi ma le fa’atalanoaga fo’i ia mata’alia le sui.

E ese mai lea ia mafai ona fa’amaonia ua talia lana talosaga e aoga i se Kolisi po’o le Iunivesite mo le isi fa pe lua tausaga, ae ia agava’a fo’i mo kosi e iloga e le Bluesky e mafai ona aoga mo i latou fo’i pe a mana’omia i le toe taliu mai o nei sui agava’a. O kosi ia mo’omia e aofia ai: Computer Science, Telecommunications, Engineering ma isi kosi fa’apisinisi e aoga e aofia ai kosi tau Suetusi ma Tausitusi, Teugatupe ma isi kosi tau le Tamaoaiga tausi [Economics] ma le Siomaga.

Na fa’ailoa e se tasi o matua sa auai ma le fanau i lea sauniga pu’upu’u ma le taua, “Ou te fa’afetaia lava lenei kamupani ma le lagolagosua mai i le galuega fai a matua, e taumafai lea e totogia aoga a le fanau. E le taugofie kolisi ma iunivesite, a leai ni sikolasipi, se talofa e le mafai lava ona ulufale le fanau. Fa’afetai lava i le taupulega ma le pulega fa’apea le aufaigaluega a le Bluesky communications mo nei sikolasipi.”