Tuai ona totogi aso malolo ona o le fa’aletonu o tupe maua a le malo

I se tusi sa tufatufaina atu e le Fa’atonusili o le Matagaluega o Tagata Faigaluega a le malo (DHR), ia Eseneiaso J. Liu, i Fa’atonusili ma Fa’auluuluga o Matagaluega ma Ofisa Tumaoti uma a le malo i le vaiaso na te’a nei, o lo o ia taua ai le tuai lea ona totogi tagata faigaluega a le malo mai aso malolo sa galulue ai e pei o le aso o le fu’a, Good Friday, ma le aso Tu’ugamau na fa’atoa mavae atu nei, e mafua mai i le tulaga fa’aletonu o lo o i ai tupe maua fa’alotoifale a le malo i le taimi nei.

Na fa’afetaia e Liu le onosa’i ma le lava papale o tagata faigaluega uma a le malo o lo o a’afia i lea tulaga, a o taumafai ai le malo e saili ni auala e fa’atino ai la latou pito laau o le totogiina lea o itula sa galulue ai tagata faigaluega i aso malolo.

Ae i le mae’a ai ona faia o ni a latou feutanaiga ma le Ofisa o le Loia Sili a le malo fa’apea ai ma Loia Fautua a le ali’i kovana, ua mafai ai loa ona latou fa’ai’uina se auala e fa’apaleni ai le totogiina atu o itula sa galulue ai tagata faigaluega mo aso malolo e pei ona taua.

Mo tagata faigaluega uma lava a le malo o lo o totogi i tupe mai le feterale, o le a totogiina pea i latou i itula sa galulue ai i aso malolo e pei ona taua, ma o ia itula uma o le a totogi e ala i le fa’aopoopo o itula i le piriota totogi a le malo e sosoo ai.

Ae mo tagata faigaluega uma o lo o totogi i tupe lotoifale sa galulue i aso malolo e pei ona taua mo le 8 itula, o le a auala atu le totogiina o i latou e ala i le maua o le latou aso malolo e tasi e totogi e le malo. Ae mo i latou e le i atoa se 8 itula na galulue ai i le aso malolo, o le a fa’apaleni itula ia sa galulue ai e ala i le malolo mai a latou galuega ae totogi pea e le malo.

Ua toe fautuaina fo’i ofisa eseese a le malo ina ia tu’uina atu faamaumauga mo taimi faigaluega a i latou sa galulue i aso malolo, ina ia mafai ai ona fa’atino e le Ofisa a latou galuega mo le faia lea o fa’amaumauga.

Na taua e le ali’i kovana ia Lolo Matalasi Moliga le taua tele o le totogi o tagata faigaluega a le malo e tusa ai ma taimi sa galulue ai i aso malolo ma ova taimi, ina ia taofia ai le toe tula’i mai o le fa’afitauli e pei ona a’afia ai le malo i ni nai tausaga ua mavae atu, ina ua fautuaina i latou e le Ofisa o Tagata Faigaluega a le malo tele e totogi itula ova taimi o tagata faigaluega a le malo.

Sa ia fautuaina fo’i afioga i Faatonusili ina ia taofia le toe soona galulue ova taimi o tagata faigaluega, sei vagana lava ofisa faapitoa a le malo o loo alaga tatau ona galulue ova taimi, ona fa’atoa mafai lea ona tu’uina atu talosaga i luga o le ofisa o le kovana mo le faamaoniaina mai.