Fautuaina Leoleo fou ina ia fa’avae latou galuega fa’amaoni ma le alofa

O ni isi o fautuaga ma timaiga na tu’uina atu e Ta’ita’i o le atunu’u, i le taimi na maua ai le avanoa e tulei saunoa ai i le Fa’auuga a le Vasega lona 25 o Leoleo fou a le Matagaluega o Leoleo i le vaiaso na te’a nei, na fautuaina ai i latou ina ia fa’avae la latou galuega i le fa’amaoni ma le alofa i le atunu’u.

“Ia fa’avae la outou galuega i le fa’amaoni ma le fa’autauta mai le Atua, ma ia aofia ai ma le alofa i soo se tagata, aua le fefe ma ia mulimuli i le tulafono”,  le saunoaga lea a le afioga i le Maoputasi ia Mauga Tasi Asuega, o se tasi lea e to’afa i ai Failauga fa’apitoa na tulei saunoa i le fa’auuga o Leoleo fou sa faia i le Lee Auditorium i le aso Faraile ua te’a.

O ni isi o saunoaga e aofia ai le Kovana o le malo, le tofa i le Tootoo ia Lolo Matalasi Moliga, o le Loia Sili ia Talauega Eleasao Alo, ma le Komesina o Leoleo, tofa Le’i Sonny Thompson.

E to’a 32 Leoleo fou na fa’au’u mai i le Vasega lona 25 a le Matagaluega o Leoleo. Mai lea aofaiga, o le to’a 26 o i latou lea ua mae’a ona fa’atauto e avea ma Leoleo, ae o le isi to’a 6 o sui mai isi Matagaluega a le malo.

E ese mai i le to’a 32 o Leoleo fou sa fa’au’u mai i le Vasega lona 25, sa fa’atauto fa’atasi ai ma Leoleo e to’a 8 mai le Vaega lona 24 a le Ofisa o Leoleo, fa’apea ai ma Leoleo e to’a 6 mai le Vasega a Leoeo o le toese, e le i mafai ona fa’atautoina i latou i le taimi na mae’a ai a latou aoaoga i tausaga ua mavae.

Na taua e le afioga i le Loia Sili i lana saunoaga le taua tele o le mulimulita’i o Leoleo i le tulafono, o iina o lo o fa’avae ai le olaga o le usitaia lea e so se tagatanu’u o le tulafono. Sa ia fautuaina fo’i i le vasega fa’au’u ina ia mata’ala i le fa’atinoina o le latou galuega, ona o le a tulimata’i uma le vaai a le atunu’u ia te i latou i le fa’atinoina o a latou tiute.

“Ia fa’amalosi le tulafono ma le fa’amaoni, aua ne’i faia fa’aituau poo le vaai foi i sootaga o aiga, a ia fa’atino lou tiute ma le fa’amaoni e fa’amalosi ai le tulafono, aua afai e te faia lena tulaga, ua e alofa i lou aiga ma puipuia lo latou saogalemu”, o se vaega lea o le saunoaga a le Loia Sili.

Sa ia fautuaina fo’i Leoleo ina ia tutusa le amanaia o tagata uma, ona avea lea ma itu e fa’afiafiaina ai matua ma aiga, aemaise ai fanau ma le atunu’u atoa.

“O la’u fa’amantu taua mo outou le vasega fa’au’u, afai e te alofa i lou aiga ma lou atunu’u, ia e fa’amalosia le tulafono i le fa’amaoni, o iina e atagia mai ai le alofa moni”.

I le saunoaga a le afioga i le ali’i kovana, sa ia taua ai le taua tele o le sao o Leoleo i le puipuia lea o le saogalemu o tagata uma.

Ae na taua e le afioga i le Maoputasi ia Mauga e fa’apea, o Leoleo fou ua fa’atautoina nei, o i latou ia o fatu na lulu ma toulu i le eleele lelei, lea ua tutupu ma aoga i le atunu’u, e pei ona atagia i se tasi o Fa’ataoto na si’itia e le Mesia i totonu o le Tusi Paia.

“O outou o fatu sa lulu e le atunu’u ma matua, lea ua outou aoga ma tupu tele mai, ona o le manatu e fai outou ma talita o le tulafono, ina ia puipuia ai le atunu’u i soo se fili e taumafai e osofa’i mai”, o se vaega lea o le saunoaga a Mauga.

O le mae’a ai o le sauniga o le fa’atautoina o Leoleo fou uma sa auai i lenei sauniga taua, na maua ai loa le avanoa o le afioga a Le’i e saunoa ai i le saunoaga fa’ai’u o le sauniga.

I lana saunoaga, sa ia fautuaina ai Leoleo fou uma ina ia fa’atino la latou tiute ma le fa’amaoni, ma ia fiafia e fesoasoani atu i soo se tasi o le atunu’u e valaau atu mo se fesoasoani.

“Ia outou manatua, e taua lo outou mulimuli i le tulafono. Ia avea outou ma Leoleo e fa’atino a outou tiute ma le fa’amaoni, aua ma le fa’aituau a ia fai ma le alofa, fa’aaloalo ma le feavata’i, a ia maualuga ai le avea o outou ma Leoleo e sili ona fa’amaoni i le fa’atinoina o a outou tiute”, o le saunoaga lea a Le’i.

O ni isi o ta’ita’i o le atunu’u sa auai i lenei sauniga faapitoa e aofia ai le afioga i le ali’i Senatoa ia Tuaolo M. Fruean ma le afioga i le Senatoa ia Galea’i M. Tu’ufuli, o ni isi sa avea ma Komesina o Leoleo i tausaga ua mavae, faapea ai ma le Faipule mai le Laumua i Uosigitone, tofa Aumua Amata.

FAAILOGA FAAPITOA

O Leoleo na atoa le 100% o togi na latou mauaina e aofia ai Paia Toeava mai le Ofisa o le Puipuiga o le Saogalemu Lotoifale (ASDHS), faapea ai Leoleo mai le Ofisa o Leoleo e pei o Alwin Sorenson, Ema Tagaloa ma Deidra Harrington-Latu.

O le susuga ia Toeava na ia maua le fa’ailoga faapitoa mo le tagata e maualuga togi sa ia maua, lea na saunia e le afioga i le ali’i Faipule ia Samuelu Meleisea mai le itumalo o Tualauta.

O le fa’ailoga o le tagata pito sili ona maualuga lana taumafai lea fo’i na saunia e le afioga i le ali’i faipule ia Meleisea, na maua lea e le susuga a Okesene Mua’ava.

O le fa’ailoga o le Taitai Mataalia na maua lea e Sorensen, ae o le fa’ailoga o le Ironman Award na maua e Tavake Foma’i, ma le fa’ailoga o le Most Dependable Award na maua lea e le susuga a Aokuso Paolo.