Fa’amaonia moliaga taumafai e ufiufi solitulafono faasaga ali’i 25 tausaga

O le aso 6 o Iulai lea ua fa’atulaga e tu’uina atu ai le fa’aiuga a le Fa’amasinoga Maualuga fa’asaga i le ali’i e 25 tausaga le matua, i le mae’a ai lea ona ta’usala o ia i moliaga mamafa e 2 o lona taumafai lea e faia ni gaioiga ina ia ufiufi ai se solitulafono sa faia e se isi tagata.

E 2 tagi na fa’aulu e le malo o Amerika Samoa fa’asaga i le ali’i o Aki Lee Jungblut. O le ulua’i tagi o lo o tu’uaia ai o ia i moliaga mamafa e 2, le moliaga pito sili ona mamafa o le faomea i le tulaga muamua (robbery 1st degree) fa’apea ai ma le moliaga lona lua o le gaoi.

I le tagi lona lua sa fa’aulu e le malo fa’asaga i le ali’i Jungblut, o lo o tu’uaia ai o ia i moliaga mamafa e 4, lea e aofia ai le moliaga o le talepe fale i le tulaga muamua, gaoi, fesoasoani i se isi tagata i le fa’atinoina o le solitulafono o le gaoi, fa’apea ai ma le moliaga o le gaoi.

O ia solitulafono uma e pei ona tu’uaia ai e le malo ia Jungblut, na mafua mai lea i lona fesoasoani i se isi tagata sa ia fa’atinoina gaioiga o le talepe fale ma le gaoi.

I lalo o le maliliega lea ua mae’a ona sainia e le ua molia ma le malo ma ua talia fo’i e le fa’amasinoga maualuga, ua tali ioe ai le ua molia i moliaga mamafa e 2 ua toe teuteu e le malo, le moliaga o lona faia lea o ni gaioiga e ufiufi ai le solitulafono a le isi tagata (hindering prosecution).

I le tali ioe ai o Jungblut, i le moliaga mamafa o le gaoi mai le tagi muamua sa fa’aulu e le malo fa’asaga ia te ia, sa ia ta’utino ai i luma o le fa’amasinoga e fa’apea, i se taimi o le masina o Tesema o le tausaga na te’a nei i Amerika Samoa, sa ia faia ai se gaioiga ina ia fesoasoani ai i le solitulafono a se isi tagata.

Na ta’utino atili le ua molia e faapea, i se taimi o Tesema 2016 i Tafuna, na ia aveina ai se ta’avale ma le fa’amoemoe e aveese mai ai le ali’i o Daniel Taufua mai le nofoaga sa fa’atino ai e lea ali’i le solitulafono o le talepe fale ma le gaoi, i le mae’a ai lea ona osofa’i e Taufua o se faleoloa ma gaoi le masini tupe atoa ai ma se tinoitupe e $130.

I le moliaga lona lua o le gaoi e pei ona ta’usala ai Jungblut, sa ia ta’utino ai e fa’apea, i se taimi o le masina o Tesema 2016, sa ia aveina ai se ta’avale ma le fa’amoemoe e aveese mai ai le ali’i o Taufua mai le nofoaga sa ia fa’atinoina ai le solitulafono o le talepe fale ma le gaoi.

Na ta’utino atili le ua molia e fa’apea, i se taimi o le masina o Tesema o le tausaga na te’a nei, sa ia aveina ai se ta’avale ma le fa’amoemoe e aveese mai ai Taufua, ina ua ia mae’a ona osofa’i ma gaoi e Taufua se faleoloa i Nu’uuli ma gaoia ai le masini tupe ma se tinoitupe e $160.

Na ta’utino atili le ua molia e fa’apea, o lana gaioiga sa faia i lea aso sa le tusa lea ma ala o le tulafono, ae sa ia fa’atinoina ona o lona naunau ia le mafai ai ona fa’amasinoina le ali’i o Taufua e le malo e tusa ai o lana solitulafono.

I le talia ai e le fa’amasinoga o le tali ioe a Jungblut, na talosaga ai loa le malo ina ia solofua moliaga uma o lo o totoe i tagi e 2 sa latou fa’aulu fa’asaga i lenei mataupu, lea fo’i ua talia e le fa’amasinoga.

O se tasi o tuutuuga o le maliliega a le malo ma Jungblut ua i luma o le fa’amasinoga, o le toe totogi lea e le ua molia ma isi ali’i e to’alua o lo o molia fa’atasi i latou i lenei mataupu le tupe na aveesea mai faleoloa ma kamupani na a’afia, lea e silia i le $3,000 le tupe na ave fa’agaoi e Taufua.

O isi ali’i e to’alua o lo o molia fa’atasi i lenei mataupu e aofia ai Taufua, lea ua mae’a ona ia tali ioe i moliaga mamafa e 4 o le gaoi, lea fo’i ua talia e le fa’amasinoga, ma le ali’i o Nassan Tupuola lea ua mae’a ona ta’usala i le moliaga mamafa e 2 o lona faia lea o ni gaioiga e ufiufi ai le solitulafono a le isi tagata (hindering prosecution).

O lo o taofia uma i latou nei i le toese i Tafuna e fa’atali ai le aso 6 o Iulai lea ua fa’atulaga e lau ai le latou fa’asalaga.

O le afioga i le ali’i fa’amasino sili ia Michael Kruse o lo o iloiloina lenei mataupu, fa’atasi ai ma le lagolagosua a afioga i ali’i Fa’amasino Lagolago ia Fa’amausili Pomele ma Muasau T. Tofili.