Tala otooto o Fa’amasinoga

WAYNE GASOLO

O le ali’i e 24 tausaga le matua lea na tu’uaia e le malo i le moliaga mamafa o lona umia fa’asolitulafono lea o vaega o le pauta oona o le aisa, ua ia ta’utino i le fa’amasinoga maualuga i le vaiaso nei e moni ma fa’amaoni tu’uaiga fa’asaga ia te ia.

Na ulua’i tu’uaia e le malo le ali’i o Wayne Gasolo i le moliaga mamafa o le umia fa’asolitulafono o vaega o le pauta oona o le aisa, o se solitulafono e mafai ona fa’asala ai se tasi i le toese mo le umi e le itiiti ifo i le 5 tausaga i le toese, po o le fa’asala i le salatupe e le silia i le $5,000, pe fa’asala fo’i i fa’asalaga uma ia e lua.

Ae i lalo o le maliliega lea ua mae’a ona saini e le ua molia ma le malo ma ua talia fo’i e le fa’amasinoga, ua ia tali ioe ai i le moliaga feololo o le umia fa’asolitulafono o vaega o le pauta oona o le aisa, le solitulafono e mafai ona fa’asala ai se tasi i le toese mo le umi e le silia i le 5 tausaga, po o le fa’asala i le salatupe e le silia i le $5,000, pe fa’asala fo’i i fa’asalaga uma ia e lua.

I le tali ioe ai o Gasolo i le moliaga e pei ona ta’usala ai o ia e le fa’amasinoga, sa ia ta’utino ai e fa’apea, i se taimi o le masina o Setema 2016 i Amerika Samoa, sa ia umia fa’asolitulafono ai se paipa e ula ai le aisa fa’apea ai ma se straw o lo o i ai vaega o le pauta oona o le aisa i totonu.

Na ta’utino le ua molia i luma o le fa’amasinoga e fa’apea, o lana gaioiga sa faia i lea aso sa le tusa ai lea ma ala o le tulafono.

Ua malie le malo e finau i le fa’amasinoga mo se fa’asalaga mama mo Gasolo, peita’i ua malamalama lelei le ua molia, tusa lava pe talosaga le malo mo se fa’asalaga mama, e pule le fa’amasinoga pe talia pe teena lea fa’afinauga, ua ia malamalama atili fo’i, e le mafai ona toe suia lana tali ioe ua tu’uina atu pe afai e tu’uina mai se fa’asalaga a le fa’amasinoga ae le tusa ai ma lona mana’o.

O lo o taofia pea le ua molia i le toese e fa’atali ai le aso 4 Aokuso lea ua fa’atulaga e lau ai lana fa’asalaga.

TAO LIU

O le vaiaso nei lea na faila ai e le malo le isi a latou tagi fou fa’asaga i se ali’i mai Asia o lo o taofia i le toese i Tafuna, e mafua mai i le fa’alavelave lea na ia sola ese ai mai le toese i le fa’aiuga o le tausaga na te’a nei.

O le aso Gafua o le vaiaso nei na faila ai e le malo le moliaga mamafa o le sola ese mai le toese fa’asaga i le ali’i o Tao Liu, e mafua i le fa’alavelave lea na ia sola ese mai ai i le toese i Tafuna i le aso 2 Oketopa 2016, a o taofia ai o ia e le malo e fa’atali ai lana fa’amasinoga i le mataupu muamua lea o lo o tu’uaia ai fo’i o ia i lona umia o fualaau fa’asaina ma fana.

E pei ona manino i fa’amaumauga a le fa’amasinoga, o le ali’i o Joeita Fa’aaliga na fesoasoani ia Liu ina ia mafai ona sola ese mai o ia mai le toese i Tafuna, e ala i lona fa’amatala o le faitoto’a o le potu sa loka ai o ia.

O le masina o Setema na taofia ai e leoleo ia Liu i le toese i Tafuna, ona o tu’uaiga o lona umia fa’asolitulafono o vaega o fualaau fa’asaina o le mariuana, atoa ai ma lona umia fa’asolitulafono o se fana e le i lesitalaina.

Ona o ia moliaga, na taofia ai loa o ia i le toese e aunoa ma se tupe na fa’atulaga e tatala ai o ia, ona o le matuia o gaioiga o lo o tu’uaia e le malo sa faia e le ua molia i le taimi na taumafai ai Leoleo e fesiligia o ia i le mafua’aga na soona alu saoasaoa ai lana ta’avale.

A o taofia ai o ia i le toese, sa ia sola i tua i le masina o Oketopa, peita’i na mafai ona toe maua o ia e Leoleo i le aso na sosoo ai, ma toe taofia ai loa o ia i totonu o le falepuipui.

O le taeao ananafi na tula’i ai Liu i luma o le fa’amasinoga maualuga ma ia teena ai le moliaga mamafa e tasi lea ua tu’uaia ai o ia e le malo, ma ua toe taofia nei o ia i le toese e fa’atali ai le isi ana iloiloga lea ua fa’atulaga e faia i le masina o Aokuso o le tausaga nei.

MOLIA SE ALI’I I LONA FA’AO’OLIMA I LONA TO’ALUA

E 42 tausaga o se ali’i ua molia nei e le malo i moliaga o le fa’ao’olima i le tulaga tolu atoa ai ma le fa’atupu vevesi i totonu o lona aiga, e mafua mai i le fa’alavelave lea na manu’a ai lona to’alua i le ogatotonu o le vaiaso nei ina ua ia fa’ao’olima i ai, e pei ona tu’uaia ai o ia i le tagi a le malo.

O le mataup na tofu atu i le Ofisa o Leoleo ina ua vili e le fafine le Ofisa o Leoleo i Tafuna mo se fesoasoani, i le mae’a ai lea ona fasi o ia e lona to’alua ma totolia ai ona foliga, atoa ai ma le unaoa o se vaega o lona tua ina ua ta tu’i e lona to’alua.

Na fa’aalia e le fafine i Leoleo, o le tupe na mafua ai ona la vevesi ma lona to’alua i le taeao ae le i usu le tamaloa e faigaluega, ae ina ua toe manava mai lona to’alua i le afiafi, sa toe fa’aauau ai loa le vevesi ma i’u ai loa ina fa’ao’olima lona to’alua ia te ia. Na taua i le ripoti a Leoleo le malosi o le manogi pia sa fa’alogoina i le tino o le ua molia i le taimi na taofia ai o ia.

E $500 le vaega tupe lea ua fa’atulaga e le fa’amasinoga e totogi ona fa’atoa mafai lea ona tatala le ua molia i tua, e fa’atali ai taualumaga o lana mataupu, ae a mafai ona tatala o ia i tua, ua fa’asa ona ia toe soli se tulafono e aofia ai ma le fa’asa lea ona ia toe taumafai e fa’afeso’ota’i lona to’alua i soo se auala.