Silia i le 200 au fa’au’u Aoga Maualuga a Samoana

 E to’a 220 le fanau fa’au’u mai le a’oga maualuga a Samoana i le aso ananafi, ma na fa’atumulia le Fale Ta’alo o lea lava laumua i le to’atele o matua ma aiga, ae maise o malo fa’aaloalogia sa valaaulia.

E ui i le latou fiafia, ae na fa’atagisia se 3 minute e nofo fifilemu ma le gaoia ai le fanau ma i latou uma na aofia, ina ia aloa’ia ai le to’esea o se tasi o tina faia’oga a le fanau ua maliu, ae toetoe lava o’o mai i lenei aso atofaina.

O le tama’ita’i pule aoga sa ia fofogaina lenei mana’oga taua, ma sa vaaia fo’i le tutulu o nisi o le fanau a’oga, peita’i, o le galuega ua mae’a ona faia e lea faia’oga.

Mai le au faauu, e 24 i latou ua auai i le NHS e maualuluga o latou togi i mataupu sa tau’avea i le a’oga. O le tama’ita’i na ia mauaina le togisilia o Brie-A’Nah Augustina Fruean. O lana SAT e 1050, ACT 20; ma lona GPA 3.994 ma o ia o se talavou o lo’o avea ma totino o le CCJS Pago Pago. E tolu tausaga o avea peso ia ma totino o le NHS ma e tele fo’i tauvaga eseese i mataupu eseese sa auai ai o ia a’o a’oha mai pea i le Laumua o le Malie i Utulei.

O le tele o tausaga o le soifuaga o lenei tama’ita’i o lo’o tausia ai o ia e ona matua matutua o Tuli ma Epenesa Fruean i Pago Pago. E ta’alo fo’i le soifua talavou o Brie-A’Nah Fruean, ma e iloga fo’i i le Girls Varsity Basketball team a Samoana. Na avea o ia ma Teutupe i lana vasega 11, sa tauva i le Math Competition, Science Fair ma le Accounting Competition a aoga maualuluga. Ua filifili o ia e ulufale atu i le Dominican University i Kalefonia, lea e maua ai lana sikolasipi e $96,000.

O le tulaga lua ua maua e Grace-DamonaLumina Tuato’o, o se alo e fa’asino ia Tuato’o Seakerise ma Alapasab Tuato’o o Fagatogo ma Alofau. O lana GPA e 3073 ma lana SAT e 1,110 ACT 21. O ia o se talavou totino a le CCJS i Fagatogo. Na mauaina e Grace le fa’ailoga a le Rotary Club ma sa auai fo’i o ia i le tele o tauvaga sa fa’atautaia i le va o a’oga maualuluga i le teritori, ma ua talia mai fo’i o ia i le tele o Iunivesite ma Kolisi i fafo peita’i, ua filifilia e ia le Iunivesite o Washington. O ia fo’i o lo’o ua ia mauaina le Sikolasipi a le malo mo fanau e sailia fa’ailoga maualuluga mai so’o se Iunivesite i fafo.

I le lauga na filifilia e le vasega fa’aiuaso, le sui kovana Lemanu Peleti Mauga ma ia fa’apea ane, “O i latou fai mo latou le lumana’i, o i latou ia sa taumafai malosi ina ia fa’ataunu’u ma ola fiafia i le matagofie o latou miti.”

“Aua le fefe e fesaga’i ma le lumana’i i ona lu’iga, aua o mea uma, e tatau ona e taumafai e maua se avanoa e toe tautuaina ai le to’atele o lou atunu’u. Ia fa’aaoga ai lau taumafaiga, ia iloa ona ola fa’atasi, finau fa’atasi i mea lelei, aoaoina fa’atasi ma isi aua e mafai ai ona tatou fetufa’i fa’atasi manuia o le tatou atunu’u i ona ala eseese.”

“E le tasi se ala ua fa’amanuia mai ai le Atua i ona tagata, e tele magaala ma faiva e te filifili ai po’o le a tonu e te fiafia e fai. Afai fo’i ae le taulau o se isi faiva, e matua sili ona fa’amanuia le Atua pe afai e te toe timata le upega fagota ma toe taumafai atili. O le to’atele o taitai iloga o so’o se atunu’u, e le’i faigofie ona manumalo. E tele taimi sa faia’ina ai, ma toe taumafai ma saga taumafai se’ia o’o ina manumalo.”

Sa lisia e Lemanu le to’atele o tatou ta’ita’i ua tuana’i, ma e ua tatou iloa o nisi na tula’i mai ua manuia latou taumafaiga, ae sa a’o’oga uma lava i le Samoana: Aleki Sene 1946, ulua’i inisinia a le tatou malo i ala o feso’ota’iga, amatalia e ia le Litaea a le tatou malo, na fa’atonusili mo le tele o tausaga i le ASTCA, Mere Bentham, AP Lutali sa avea ma KovanaSili, ae o le Sui fo’i i le Konekeresi, A.U. Fuimaono, faia’oga mo ni tausaga e tele, ulua’i Sui i le Konekeresi, Kovana Itumalo o le falelima i Sisifo, Tauese Pita Sunia, Faia’oga, Fa’atonu sili o A’oga, Sui Kovana ma Kovana o Amerika Samoa, Togiola Tulafono, ulua’i kovana lea o lo’o soifua mai pea, Fa’amasino, Senatoa, Lucena Kovana ma Kovana o le tatou Malo. Lolo Moliga Senatoa, Peresetene o le Maota Maualuga, Kovana o le Malo o Amerika Samoa. Dr. Ruth Matagi,Faia’oga, Pule A’oga, Fa’atonusili o A’oga.

Sa ia fa’amatala se tasi na koleni fa’apitoa mo lona malo ina ia mua i le tu’uga. Sa fa’amautu lona fa’ailoga e lona atunu’u e maua le $5,000. ae o le isi $5,000. e fa’atoa maua fo’i pe afai ae to’ai taunu’u i le tini. O lona uiga, afai ae le oo i le tini, e le maua le ‘afa o lona fa’ailoga mai lona malo. Na oo lea sui i le tini, ae o le malosi ua matua toe toe ina leai. Peita’i, ina ua fesiligia, sa ia fa’ailoa mai, “E tatau lava ona ou oo i le tini.”

I le toe pese sa fofogaina fa’apitoa mo le lauga, sa peseina ai e le tama’ita’i o le vasega fa’aiuaso le “You raised me up!” e fa’afetaia ai le tausiga matalasi a Matua mo le fanau. Peita’i, sa i ai le pese muamua a’o lei oo i le afa o le tautalaga fa’apitoa, o le vi’i lea o faia’oga uma, sa momoli ai le sao po’o le fa’afetai a le vasega fa’ai’uaso ma le latou fofoga fa’apitoa, mo le vasega o faia’oga uma lava o Samoana i lenei tausaga.

I fa’ailoga na taua’aoina mo sikolasipi a le Malo, e 18 lelei le fanau fa’au’u mai Samoana ua maua o latou sikolasipi mai le Malo, e aofia fa’atasi ai avanoa mo kolisi ma iunivesite i fafo fa’apea ma le ASCC.

E to’aono i latou na maua sikolasipi mo aoga i fafo: Bre-A’Nah Fruean, Grace Tuatoo, Susana Lee, Sinailetulaga Trude Kulberg,Marietta Lee, Mary Taimane Malubay, ae o le isi vaega uma ua maua sikolasipi mo le ASCC.