Tele tagata muimui i le tuai ona maua o siaki o lafoga

Ua le masino se vaipanoa o le atunu’u ua fa’alogoina ai le muimui ma le fa’asea o le to’atele o le atunu’u, i le leai lea o se tala lata mai e fa’atatau i siaki lafoga a tagata po o afea e maua ai.

E le gata i luga o le telefoni a le Samoa News o lo o tu’u fesili ai le to’atele o le atunu’u ma fa’asea i le tuai ona maua o lafoga, ae ua o o lava fo’i i auala o fesootaiga fa’aonaponei e pei o le “Facebook” ua fa’aleo ai fo’i e le mamalu o le atunu’u lagona fa’asea fa’asaga i le faigamalo, i le tuai lea ona maua o siaki o lafoga.

“O lea ua savali Iuni ae le’i maua lava ni lafoga, ae se’i fa’ailoa mai fo’i se tala sa’o i le atunu’u i le mafua’aga tonu ua tuai ai lafoga, pe mafua mai i le malo tele pe ona ua leai lava se tupe a le malo, o ituaiga tala na o lea ou te fia fa’alogo ai”, o le fa’asea lea a se tasi o Tina i luga o le telefoni a le Samoa News i le vaiaso na te’a nei.

I luga o le ‘Facebook”, ua vaaia ai le tele o tusitusiga le fiafia a ni isi o le to’atele o tagatanu’u, fa’asaga i le faigamalo i le tuai lea ona maua o lafoga, ma o ni isi o nei tusitusiga ua aumai ai ma upu masoa ma le mataga, e fa’aleo ai e le to’atele o latou lagona le fiafia i le tulaga fa’aletonu ua tula’i mai.

Na fesiligia e le Samoa News le Teutupe a le malo ia Ueligitone Tonumaipe’a i le 2 vaiaso talu ai i se fa’amatalaga lata mai e fa’atatau i lafoga a tagata, peita’i na saunoa le ali’i Teutupe e fa’apea, o lo o fa’atali pea i tupe mai fafo, ae ina ua toe taumafai e saili se isi avanoa i le vaiaso na te’a nei e uiga lava i lenei mataupu, na taua e le tama’ita’i faigaluega o lo o galue i le laulau pito i luma o le Ofisa, e le o avanoa le Teutupe.

O le to’atele o matua sa fa’aalia o latou lagona fa’asea fa’asaga i le tuai ona maua o lafoga, o matua ia o loo fa’au’u a latou fanau mai aoga maualuluga i le atunu’u i lenei vaiaso.
“Sa i ai lava le fa’amoemoe e maua mai la’u siaki o le lafoga ae lei faia le fa’auuga a si a’u tama, ao lenei lava ua oo i le vaiaso o le fa’auuga e le o maua mai lava se fa’amatalaga sa’o e fa’atatau i lafoga”, o le saunoaga lea a lea Tina.

Sa ia taua fo’i e fa’apea, ina ua ia vaaia tulaga fa’aletonu i le lafoga i le tuai lea ona maua, sa ia alu ai ma talosaga lana nonogatupe i le faletupe o le ANZ mo le fa’amoemoe ia maua lava se tupe e fesoasoani ai i le tapenaga o le fa’auuga a si ana tama, peita’i e le gata ua misi atoa le lafoga, a o lea fo’i ua savali i le 3 vaiaso e le o maua mai lava se tala i lana talosaga sa tu’uina atu i le ANZ mo se nonogatupe.

O se tasi o mataupu sa fa’aalia ai le tele o fa’asea mai le atunu’u, o le gaioiga sa faia e le Ofisa o Tupe i se taimi ua te’a e talia ai talosaga mo le fa’amatu’u atu o siaki o lafoga mo nisi o le atunu’u ona o fa’alavelave fa’aleaiga e pei o maliu, pe afai e tu’uina atu se pepa fa’amaonia o le tagata o le aiga ua maliu.

O ia faiga uma na fa’atoa taofia aloaia ina ua tu’u’ina atu e le afioga i le ali’i kovana ia Lolo Matalasi Moliga sana tusi i le Teutupe i le masina na te’a nei, e fautuaina ai le taofia loa o lea faiga le talafeagai, a ia fa’asolo sa’o pea lafoga a tagata i taimi ma aso o lo o fa’asolo ai.

Na faamaonia mai e se tagata faigaluega a le Ofisa o le Tupe a le malo i le Samoa News i le vaiaso na te’a nei, le i ai o le taimi sa talia ai talosaga mo le fa’amatu’uina atu o siaki o lafoga, peita’i na te le i manatu e fa’ailoa mai po o ai sa mafai ona ia faia lea fa’aiuga e fa’amatu’u tu ai siaki mo tagata lafoga.

E oo mai lava i le taimi nei, e le o mautinoa lava poo afea e maua ai isi siaki mo lafoga a le atunu’u.