Tala otooto o Fa’amasinoga

NASSAN TUPUOLA

O le aso 6 Iulai lea ua fa’atulaga e le fa’amasinoga maualuga e tu’u atu ai lana fa’asalaga fa’asaga i le ali’i o Nassan Tupuola, i le mae’a ai lea ona ta’usala o ia e le fa’amasinoga maualuga i le moliaga mamafa o lona faia lea o gaioiga e taumafai ai e ufiufi le solitulafono a le isi tagata (hindering prosecution).

E 2 moliaga mamafa na ulua’i tu’uaia ai e le malo le ali’i o Tupuola, o le moliaga muamua o le gaoi, e mafua mai i lona fesoasoani lea i le solitulafono a le isi tagata, atoa ai ma le moliaga lona lua o lona faia lea o gaioiga e taumafai ai e ufiufi le solitulafono a le isi tagata.

Ae i lalo na sainia e le ua molia ma le malo ma ua talia fo’i e le fa’amasinoga maualuga, ua malie ai le ua molia e tali ioe i le moliaga lona lua, o lona faia lea o ni gaioiga ma le fa’amoemoe e ufiufi ai le solitulafono a le isi tagata.

I le tali ioe ai o le ali’i o Tupuola, 27 tausaga le matua o lona soifua i le moliaga e pei ona ta’usala ai o ia, sa ia ta’utino ai e fa’apea, i se taimi o le aso 1 Fepuari 2017 i Amerika Samoa, sa ia fa’atinoina ai se gaioiga ma le fa’amoemoe e ufiufi ai le solitulafono sa fa’atinoina e le ali’i o Daniel Taufua.

Na ta’utino Tupuola e fa’apea, i le aso e pei ona taua, sa ia aveina ai se ta’avale ma le fa’amoemoe e piki ese mai ai Taufua mai le nofosaga sa ia fa’atinoina ai le solitulafono. Sa ia faia lea tulaga ina ua fa’atoa mae’a lava ona fa’atino e Taufua se solitulafono mamafa o le talepe fale ma le gaoi, lea na ia gaioia mai ai se masini tupe e fa’apea ai ma se tinoitupe e $800 mai se faleoloa i Tafuna.

Na ta’utino Tupuola, o lana gaioiga sa faia i lea aso sa le tusa lea ma ala o le tulafono, ma sa ia fa’atinoina fo’i lea solitulafono ona o lona manatu ia aua ai ne’i maua ma molia le ali’i o Taufua i le solitulafono o le gaoi ma le talepe fale.

O se tasi o fautuaga ua tu’uina atu e le malo i le fa’amasinoga, o le poloaiga lea o ali’i e to’atolu o lo o molia fa’atasi i lenei mataupu ina ia latou toe totogi vaega tupe sa latou gaoia mai i faleoloa ma nofoaga eseese na a’afia ia latou gaioiga sa faia.

O lo o taofia pea Tupuola i le toese i Tafuna e fa’atali ai le aso e lau ai lana fa’asalaga, ae mo le ali’i o Taufua, o le vaiaso nei fo’i na ta’usala ai o ia e le fa’amasinoga maualuga i moliaga mamafa o le gaoi, e mafua mai i fa’alavelave eseese sa tu’uaia ai o ia e le malo.

I le tali ioe ai o Taufua i moliaga mamafa e 3 o le gaoi e pei ona ta’usala ai o ia e le fa’amasinoga maualuga, sa ia ta’utino ai e fa’apea, i le va o le masina o Tesema 2016 ma Fepuari o le tausaga lenei 2017, sa ia osofaia ai ni faleoloa se 3 ae ave fa’agaoi meatotino i totonu e aofia ai ma se tinoitupe e silia i le $3,000.

E 2 mataupu tau solitulafono mamafa na faila e le malo fa’asaga ia Taufua. I le mataupu muamua, o lo o tu’uaia ai o ia i moliaga mamafa e 2 o le talepe fale i le tulaga muamua fa’apea ai ma le gaoi. I le mataupu lona lua, o lo o tu’uaia ai o ia i moliaga mamafa e 6, lea e aofia ai moliaga e 3 o le gaoi, moliaga e tasi o le faomea i le tulaga muamua, moliaga o le talepe fale i le tulaga muamua, atoa ai ma le moliaga e tasi o lona fesoasoani lea i se isi tagata e fa’atino le solitulafono o le gaoi.

I lalo o le maliliega ua sainia e Taufua ma le malo ma ua talia fo’i e le fa’amasinoga, ua tali ioe ai o ia i moliaga mamafa e 3 o le gaoi o lo o i le tagi lona 2 sa fa’aulu e le malo, i lalo o tuutuuga e solofua e le malo moliaga o loo totoe i le tagi lona 2 sa latou fa’aulu, atoa ai ma le solofua o moliaga e 2 o loo i le tagi muamua sa latou fa’aulu fa’asaga ia te ia.

I le tali ioe ai o Taufua i le moliaga o le gaoi, sa ia ta’utino ai e fa’apea, i se taimi o le aso 1 Fepuari, 2017 i Tafuna, Amerika Samoa, sa ia gaoia mai ai se tinoitupe e tusa ma le $120 mai le Fale Tamea o le F.B Laundromat e aunoa ma se fa’atanaga a le ana ia meatotino, sa ia faia fo’i ma le fa’amoemoe o le a le toe maua e lea tagata lana mea totino.

I le isi moliaga o le gaoi, na ta’utino ai Taufua e fa’apea, i se taimi o le aso 1 Fepuari 2017 i Amerika Samoa, sa ia ulufale fa’amalosi ai i totonu o se faleoloa i Fagaima ma le fa’amoemoe e fa’atino ai le solitulafono o le gaoi, ma a o i ai o ia i totonu o le faleoloa o le Pacific Independent Contributors, sa ia gaoia ai se masini tupe atoa ai ma se tinoitupe e tusa ma le $3,000.

I le moliaga lona tolu o le gaoi e pei ona ia tali ioe i ai, sa ia ta’utino ai e fa’apea, i se taimi o le masina o Tesema 2016 i Amerika Samoa, sa ia ulufale fa’amalosi ai i totonu o se faleoloa ma le fa’amoemoe e fa’atino ai le moliaga o le gaoi.

Na ta’utino atili le ua molia e fa’apea, a o i ai o ia i totonu o le faleoloa o le F & K Merchandise i Nu’uuli, sa ia gaoiina ai se masini tupe atoa ai ma se tinoitupe e $160 ma le fa’amoemoe o le a le toe maua e le tagata e ana lea meatotino.

TAUTUA LETASI

O le aso 28 Iulai i le itula e 9:00 i le taeao lea ua fa’atulaga e toe tula’i ai le susuga a Tautua Letasi i luma o le fa’amasinoga maualuga mo le isi ana iloiloga, i le mae’a ai lea o lona tula’i ma teena moliaga e 4 o lo o tu’uaia ai o ia e le malo

O lo o tu’uaia ai Letasi e aofia ai moliaga mamafa e 2 o lona umia fa’asolitulafono o le pauta oona o le aisa ma le fa’amoemoe e fa’atau atu i isi tagata, fa’apea ai ma le moliaga mamafa o lona umia fa’asolitulafono o vaega o le laau fa’asaina o le mariuana ma le fa’amoemoe e tulei ma fa’atau atu i isi tagata, atoa ai ma moliaga mama e 2 o lona umia fa’asolitulafono lea o fana e lei lesitalaina, le ituaiga o le 12 ma le 22.

O moliaga e pei ona tu’uaia ai Letasi e le malo na afua mai i le fa’alavelave lea na taofi ai e Leoleo lana ta’avale ina ua molimauina le soona alu saoasaoa i le vaveao o le aso 21 Me, 2017, ae maua ai e Leoleo se fana i le nofoa pito i tua o le ta’avale, ma mafua ai loa ona faia le fa’aiuga e taofi lana ta’avale ae sei fai i ai su’esu’ega.

I su’esu’ega a Leoleo sa faia i le ta’avale na maua ai i totonu se ato fa’afafa, lea na maua i ai vaega o fualaau fa’asaina i totonu, atoa ai ma vaega e fa’aaoga e i latou e tagofia fualaau fa’asaina, atoa ai ma se tinoitupe e $1,658.

O loo tumau pea tuutuuga o loo tatala ai Letasi i tua e fa’atali ai le aso e toe valaau ai lana mataupu.