Fa’atali fa’aiuga Fa’amasinoga mataupu va EFKAS ma Rev. Tofaeono

Ua toe taliu atu nei i fanua ta’ita’i o le Ekalesia Faapotopotoga Kerisiano i Amerika Samoa (EFKAS), e fa’atali ai lupe o maunu i se fa’aiuga o le a tu’uina mai e le Vaega Iloilo o le Fa’amasinoga Maualuga a Amerika Samoa, e tusa ai o le mataupu lea sa iloiloina i le vaiso nei i luma o le fa’amasinoga, ona o le tagi sa fa’aulu e le Ekalesia Aoao fa’asaga i le ali’i Faifeau sa avea ma Failautusi Aoao o le Ekalesia ua fa’amalolo ia Rev. Amaama Tofaeono, ina ua musu o ia e tula’i ese ma le maota o le Ekalesia.

O le mae’a ai ona fa’afofoga o ali’i fa’amasino i mau fa’amaonia o lenei mataupu, lea na mafai ona fa’ailoa ina ua fesiligia e loia molimau ta’ito’a 2 mai itu e lua, atoa ai ma fa’afinauga fa’ai’u a loia e saga fa’amautuina ai a latou folasaga ma talosaga, na saunoa ai loa le afioga i le ali’i Fa’amasino ia Elvis P. Patea ina ia taoto atu se fa’aiuga o lenei mataupu latou te iloilo i ai ma ana Fa’amasino Lagolago, le afioga ia Su’apaia Pereira ma Satele Lili’o Satele.

O le tama’ita’i loia ia Gwen Tauiliili-Langkilde sa tula’i mo le Ekalesia, ae o le ali’i loia ia Tasi Tuiteleleapaga na tula’i mo Rev. Tofaeono ma lona faletua ia Joan Aleluia Tofaeono, o i laua ia sa faia fa’asaga i ai le tagi a le Ekalesia Aoao.

Ina ua mae’a ona valaauina e le itu tete’e a latou molimau ma fesiligia i luga o le nofoa molimau, na latou fa’ailoa ai loa le mae’a atu o le latou itu, peita’i o le taimi lea na fa’ailoa ai e le itu a le Ekalesia le mana’o e valaau le latou molimau lona lua mo le fa’amaninoina o ni isi o vaega e lagolago ai la latou tagi, ma o lea molimau, o le susuga lea ia Rev. Elder Leatulagi Fa’alevao, o ia fo’i lea o le Failautusi o le Komiti a le Au Toeaiina a le Ekalesia.

Na manino i le molimau a Rev. Elder Fa’alevao, o le fa’aiuga fulisia a le Au Toeaiina e fa’amalolo ai le tofi faifeau fa’au’u o Rev. Tofaeono, na fa’avae mai lea i luga o molimau sa tu’uina atu i le taimi o le iloiloga, ma o ia molimau e aofia ai le fa’amatalaga a Rev. Elder Fa’aeteete Saifoloi e tusa ai o le latou talanoaga ma Rev. Tofaeono ma lona faletua ia Tesema 2016, atoa ai ma le ripoti mai le Ofisa o Leoleo e tusa ai o le fa’alavelave lea na fa’ao’olima ai Aleluia i le fafine na tu’uaia ai le igoa o lona to’alua sa la mulilua.

Ina ua fesiligia e le loia a le Ekalesia, na taua ai e Rev. Elder Fa’alevao le i ai o le avanoa na tu’uina atu e le Au Toeaiina ia Rev. Tofaeono ma lona faletua e tu’uina atu ai ni a laua fa’amatalaga e tusa ai o le fa’aiuga ua faia, ma e ui sa faia a laua fa’amatalaga, sa le’i avea lea ma auala e suia ai le fa’aiuga.

Ina ua oo i le taimi o le itu tete’e, na fesiligia ai loa e Tuiteleleapaga ia Rev. Elder Fa’alevao pe sa i ai se taimi na tu’u atu ai e le Au Toeaiina se avanoa ia Rev. Tofaeono ma lona faletua e fa’ailoa atu ai le la itu e tusa ai o le fa’aiuga, ae na tali le molimau, “Sa i ai le avanoa na tu’uina atu e faia ai a laua fa’amalataga”.

Na toe fesili Tuiteleleapaga i le molimau poo ni fa’amatalaga tusitusia sa tu’uina atu e Rev. Tofaeono ma lona faletua poo ni fa’amatalaga tu’u gutu, ae na toe tali le molimau “o fa’amatalaga tusitusia”.

Ina ua toe maua le avanoa o Tauiliili-Langkilde, sa ia toe fesiligia ai fo’i le molimau e fa’atatau i le avanoa sa tu’uina atu ia Rev. Tofaeono ma lona faletua e fa’aleo ai le la itu i luma o le Au Toeaiina, pe fa’amaonia sa tu’uina atu i ai se avanoa, ae na tali le molimau “leai”.

Na avea le tali leai a le molimau ma itu na toe fa’apea atu ai le loia a le Ekalesia, “A o lea sa e taua i lau tali muamua sa i ai le avanoa na tu’uina atu ia Rev. Tofaeono ma lona faletua”, ona toe sui lea o le tali a le molimau ma fa’apea mai, “Ioe, sa i ai le avanoa na tu’uina atu i ai i le aso 16 Mati 2017 ina ua mae’a ona faia le fa’aiuga a le Au Toeaiina, ae ui sa maua le la avanoa, e le’i toe suia ai lava le fa’aiuga ua mae’a ona faia”.

E fia fa’ailoa atu e le Samoa News e fa’apea, e tusa ai o le molimau a Rev. Tofaeono, e leai se taimi na tu’uina atu ai e le Au Toeaiina se avanoa ia te i laua ma lona to’alua e fa’aleo ai so la manatu e tusa ai o tu’uaiga fa’asaga ia te i laua.

I le fa’aiuga o le iloiloina o lenei mataupu mo le umi e 2 aso, na finau malosi ai le loia a le itu tete’e i le fa’amasinoga, i le leai lea o ni mau fa’amaonia na fa’avae ai i luga le fa’aiuga a le Au Toeaiina e fa’amalolo le tofi faifeau o Rev. Tofaeono, e leai se taimi na fa’atalanoaina ai se tulaga e uiga i lenei mataupu.

Ona o lea tulaga, e talitonu ai Rev. Tofaeono, o lo o tumau pea le avea o ia ma faifeau fa’au’u a le Ekalesia, o lo o tumau fo’i le avea o ia ma Failautusi Aoao o le Ekalesia, e le tatau fo’i ona ia tula’i ese mai le maota o le Ekalesia o lo o nonofo ai ma lona aiga.

Ae i le fa’afinauga a le itu a le Ekalesia, ua latou taua ai le i ai o mau e lagolagoina ai le fa’aiuga ina ia fa’amalolo le tofi faifeau fa’au’u o Rev. Tofaeono, e aofia ai ma le avesea mai o le tofi Failautusi Aoao mai ia te ia, ma ua le toe agava’a ona nonofo o ia ma lona aiga i le maota o le Ekalesia.