4 vaiaso filifili ai le fa’amasinoga i lana fa’aiuga mo Lega Oa

E 4 vaiaso lea ua toe tolopo ai e le fa’amasinoga maualuga le mataupu a le Tina o Lega Oa-Viliamu, ae sei iloilo ali’i fa’amasino i se fa’aiuga talafeagai e tu’uina atu mo lenei mataupu, pe afai lea e mae’a ona faila e loia a laua fa’afinauga i le tulaga tonu e tatau ona taoto ai lenei mataupu.

O le aso Faraile na te’a nei na fa’atulaga e tu’uina atu ai le fa’aiuga a le fa’amasinoga maualuga fa’asaga ia Oa-Viliamu, ina ua fa’amaonia tu’uaiga o lona le usitaia lea o tuutuuga o lana nofovaavaaia sa tu’uina atu i le 2012.

O ni isi o tuutuuga o le nofovaavaaia a Oa-Viliamu ina ua ta’usala o ia e le fa’amasinoga i le moliaga o le gaoi, o lona totogiina lea o le salatupe fa’apea ai ma lona toe totogiina atu o se vaega tupe e silia i le $40,000 i le kamupani sa galue ai, peita’i e tusa ai o le ripoti a le Ofisa Fa’anofovaavaaia lea ua i luma o le fa’amasinoga, o le tausaga fou e mae’a ai le taimi o le fa’anofovaavaaia a Oa-Viliamu, e silia i le $40,000 le tupe e oo mai lava i le taimi nei e le o totogia, e aofia ai lana salatupe ma le tupe sa poloaina o ia e toe totogi i le kamupani.

Na fa’atoese Oa-Viliamu i le fa’amasinoga e tusa ai o lona le usitaia o tuutuuga o lana nofovaavaaia, ma ia talosagaina ai se isi avanoa mo ia ina ia mafai ai ona ia totogi lana salatupe atoa ai ma le tupe lea sa poloaina o ia e le fa’amasinoga e toe totogi. I le fa’aiuga o lana fa’atoesega, sa ia talosagaina ai le fa’amasinoga ina ia tu’u atu se avanoa e mafuta ai pea ma lona aiga, aemaise lona to’alua ma lana fanau.

I le taumafai ai o lana loia ia Douglas Fiaui e tau fa’amanino i le fa’amasinoga le mafuaaga ua ala ai ona tuai ona totogi e Oa-Viliamu lana salatupe, sa ia taua ai e faapea, e fa’atele ona taumafai Oa-Viliamu e saili sana galuega mautu e maua ai sona totogi ina ia totogi ai lana salatupe, peita’i ua avea lana solitulafono ma auala ua fa’a faigata ai ona maua sana galuega.

Na fa’ailoa e Fiaui i le fa’amasinoga ni isi o itu lelei e ao i ali’i fa’amasino ona silasila i ai, e pei o le fa’amaoni o le ua molia i isi uma tuutuuga o lana nofovaavaaia, aemaise ai e to’atolu si ana fanau laiti o loo tausi.

I le fa’aiuga o lana fa’afinauga, na talosaga ai Fiaui i le fa’amasinoga ina ia tu’uina atu se isi avanoa ia Oa-Viliamu e fa’aauau ai pea ona saili sana galuega e totogi ai lana salatupe ma mafuta ai i lona aiga e tausi lana fanau.

Na ioe le loia a le malo ia Gerald Murphy i le taua o le fa’afinauga a Fiaui e fa’atatau i le faigata lea ona saili se galuega a Oa-Viliamu, e mafua mai i le solitulafono lea ua ta’usala ai o ia, lea fo’i ua mau i totonu o lana faila, peita’i na taua e Murphy e fa’apea, o le filifiliga lava a Oa-Viliamu na mafua ai ona ia faia le solitulafono ma ua faigata ai ona saili sana galuega, peita’i e le avea lea tulaga ma alofaga i lona le totogiina lea o le salatupe ua mae’a ona fa’atonu o ia e le fa’amasinoga e totogi, ona o tua atu o lona le usita’i e ono oo atu ai se isi fa’asalaga e sili atu ona mamafa mo ia.

Saunoa le afioga i le ali’i fa’amasino ia Elvi P. Patea ina ua mae’a ona latou iloiloina ma ana Fa’amasino Lagolago fa’amaumauga e uiga i lenei mataupu e fa’apea, e tele naua mau fa’amaonia e fa’atatau i le mataupu a Oa-Viliamu o loo i totonu o le ripoti a le Ofisa Fa’anofovaavaaia e fia fa’ailoa e le fa’amasinoga.

I le itulau 4 o le ripoti a le Ofisa Fa’anofovaavaaia, o loo taua ai le fa’aauau pea lea ona fesoasoani le to’alua a Oa-Viliamu e totogi lana salatupe, atoa ai fo’i ma le fesoasoani a ona matua.

“Lea la ua tatou vavao i lenei taeao (taeao o le aso Faraile na te’a nei) e uiga i lenei mataupu, a o lea e taoto le silia i le $40,000 e lei taitai lava ona mae’a ona totogi, ae o le fa’anofovaavaaia a Oa-Viliamu e mae’a i le tausaga fou”, o le saunoaga lea a Patea.

E ui fo’i e le o aofia i le ripoti a le Ofisa Fa’anofovaavaaia, peita’i na taua atili e Patea i lana saunoaga e fa’apea, o le faila a Oa-Viliamu mai le Ofisa o Femalagaaiga, o lo o taua ai le fa’ataga lea e le Komiti Fa’afoe a le Ofisa o Femalagaaiga ia Oa-Viliamu ona aumau pea i totonu o Amerika Samoa seia oo atu i le aso 3 Mati 2018, e le mafai fo’i ona ia faigaluega i ituaiga galuega ia e maua ai totogi, se’i vagana ai lava lona fa’atinoina o galuega mo lana sponsor (domestic work).

E 4 vaiaso lea ua toe tolopo ai lenei mataupu, ae sei iloilo e ali’i fa’amasino se fa’aiuga tonu e tatau ona faia, lea e aofia ai le ono poloaina o le ua molia e tuli le fa’asalaga fa’a falepuipui o loo fa’amalumalu, poo le faia o se isi lava fa’aiuga e manatu le fa’amasinoga e talafeagai mo lenei mataupu.

O le afioga ia Mamea Sala Jr ma Muasau T. Tofili o lo o lagolago ia Patea i le iloiloina o se fa’aiuga o lenei mataupu.