Onosa’i I Mea Tiga

Vaega: 88

Alo maia, o le a toe fa’aauau atu la tatou tala. Na muta mai la tatou tala, ina ua fanau le tama a Filipina, peita’i, ua lofia i faigata ma puapuaga, ona o lea ua fa’ailoa ane, ua ola si ana tama, o le tama, ae o lo’o fai pea togafiti a ali’i foma’i mo Filipina.

Talofa, e momoe ma manu, ae sau mala e atia’e, ua fa’apea lava lenei soifuaga tatou te i ai. A’o a le Tusi, ua fetalai mai le Ali’i, “Aua tou te atuatuvale, ia outou fa’atuatua mai ia te A’u, o A’u e malolo ai outou.”

Fai mai, ua pei nei o le lauaitu ua fai nei i totonu o le falema’i i lea taimi, ua uma ona ta’u e Lilo i lona to’alua ma lona tuafafine fa’apea ma lona tausoga o Mareta le mea ua tupu ia Filipina. A’o le mea e sili ona fa’amama avega, ua ola si ana tama o le tama.

“E talofa e, i si o’u uso, Filipina, ala mai i luga, o fea o i ai lou loto tele sa i ai, a fai mai si o ta tina i a te oe, ae e tomumu, o fea o i ai, ala mai i luga, e talofa e, i si o’u uso e to’atasi.”

Ua tonu nei i le mafaufau o Lilo, o ia e matua, e tatau i a te ia, ona fa’ato’ato’a mea uma, ae maise ai o lo’o fa’atali mai si o latou tina i le fale o lona uso. O le isi le itu sa popo’e tele i ai le loto o le tama, aua, ua le iloa po’o le a le tala o a fai atu i lona tina, e tusa ai ma le tulaga ua o’o i ai Filipina.

O le isi itu na mamafa tele i le mafaufau o le tama, o le to’alua palagi o Filipina, le tamaloa o Roger, ona o lo’o alu le malaga a Roger i Ausetalia. O le tala a Roger ia te ia, ae e le i alu ‘ese, “Lilo, please take good care of my wife, i love her very much, please take good care of her while i’m gone, i will be back in two weeks.” O upu ia na tautala ane ai le to’alua o si ona tuafafine i a te ia. O le isi lea avega ua tauave nei e Lilo, ona e fai o lona tina, a’o le to’alua o si ona tuafafine.

Na tonu nei i le mafaufau o Lilo, e fa’ata’atia ‘ese ona tiga, ae liliu ane e fa’ato’ato’a lona tuafafine o Luisa, lea ua tagi aue, aue nei. “Luisa, tatou loto tetele, ‘aua e te tagi fa’apena, tatou tatalo ia manuia le ma’i o Filipina, ae e sili pe a oulua fa’atali atu i le falema’i ma Mareta, ae se i o ma o ma Loleta i si o tatou tina, o lo’o fa’atali mai ma fia iloa po’o le a le taunu’uga o le ma’i o Filipina.

Ua fa’apea lava ona fai, ua fa’atali nei Luisa ma Mareta i le falema’i, ae o Lilo ma Loleta, se i feiloa’i ma le lo’omatua o lo’o tapua’i mai i le fale o lona uso. Ua alu le ta’avale a Lilo ma Loleta, fai mai, na te’i lava ua afe i tua le ta’avale. Ma le fa’alogo atu o Loleta, ua tagi aue, aue, Lilo i lea taimi, “Lilo, alofa mai, fa’ato’ato’a lou mafaufau, ia e va’ai alofa i si o tatou tina, afai e fa’apena oe, o lona uiga e i ai se mea e tupu i le lo’omatua, ae loto tele Lilo, va’ai i si lo’omatua o lo’o fa’atali mai.”

Na fai si umi o tu pea le ta’avale a Loleta ma Lilo, ae fa’ate’ia, ua sosolo ane le ta’avale a le tuagane matua o Loleta, le tama o Lolesio. E fai mai lava tala a Lolesio pei e tausua mai ia Lilo ma Loleta, ma lona le iloa le mea ua tupu.

Fai mai, na vave lava ona liua le fiafia o Lolesio, ina ua va’ai mai ia Lilo ua ‘ese ona uiga. “Loleta, e i ai se mea ua tupu, tautala mai, e i ai se mea ua tupu?” Na tali Loleta, “Ioe Lolesio, e i ai le fa’alavelave ua tupu, o lea e mafatia ai le loto o si o’u to’alua i le taimi nei.”

E faia pea...