Tala I Vaifanua

MU LE FALEPISINISI LEAI SE LIPOTI A LEOLEO

Ua augani mai le ali’i faipisinisi e 82 tausaga o lona soifua, Kuo Cheng Hsiung, ua fia mana’omia lava lana lipoti sei fai ai le talosaga mo le inisiua o le pisinisi sa totogia mo le fa’amoemoe ina ne’i afaina i le afi i so’o se taimi.

Peita’i, ina ua fesiligia le Ofisa o Leoleo, ua fa’ailoa mai ai, ua taofia le lipoti a leoleo ona o lo’o ua masalomia se solitulafono ua mafua ai ona mu le falepisinisi lenei i tua ane o le Communications i Fagatogo.

O le mau a le tama faipisinisi e i ai fo’i lona popolega. “Ua lata ina uma aso o le Feagaiga Tau Inisiua ma le NPI lea e tatau ona toe totogia ai mea totino ua lusi mai totonu o lea fale faipisinisi a le Kuo C. Hsiung. O le tele o nei mentotino, o televise ma ma isi ituaiga o masini tau meafale, o mea a tagata na fa’aoo atu ina ia toe fa’aleleia, atoa ai ma masini ua mae’a fo’i ona fa’aleleia, ae o lo’o tatalia le fa’afo’i ia i latou e ona pe afai ae mae’a totogia mai pili ia te a’u,” o se tala lea ma le fa’anoanoa tele o lenei tama faipisinisi.

O le mu lea sa tupu ia Setema 2016, peita’i o lea lava ua o’o mai ia Me 2017 e le’i mafai lava ona taua’ao se lipoti mo se gaoioiga a lenei faipisinisi e talosaga ai lana inisiua pisinisi, ina ia toe totogia mea toting a tagata ua fa’atama’ia e le afi.

Ina ua fesiligia se tali a Leoleo Suesue ua mae’a lautogia mo lea fa’amoemoe, ae fa’ailoa mai ua tu’uina nei lea mataupu i le susuga le Sui Komesina Ta’ase Sagapolutele  na te tofia se tasi e fa’amae’a le suesuega lea ma taua’ao ai se lipoti mo Kuo.

Ona o le tama ua matua, sa fa’ailoa atu ia te ia, a umi pea ona taumafai mo se lipoti, ona fa’auia lea o se fautuaga mai se loia, ina ia mafai ona vave tapena mo lana insinua aua o lea fo’i ua toetoe a faaoolima nisi o i latou o lo ua mu uma a latou oloa sa i totonu o lana puipuiga malu i le fale sa fa’atautaia mai ai ana galuega faapisinisi.

I le fale lava lea e tasi, sa aofia ai ma le falesuisui i le isi itu atoa, ma o le fale lea sa i ai le eletise, peita’i o le itu atoa a Kuo sa leai se eletise, ae o le tele o lana sapalai tau masini ma totoga lelei na te fa’aaogaina, lea na ala ai ona ia inisiuaina.

SUESUEGA FA’APITOA MO TURISI

E to’afa sui faigaluega ua fa’afaigaluegaina e le Ofisa o Turisi a le malo ina ia latou fa’atautaia le suesuega fa’apitoa mo turisi i le teritori.

“O la matou galuega, e le tatau ai ona matou fesiligia soo se tasi sa ulufale mai e tafao i le taimi e ulufale mai ai, ae o le taimi o le a tu’ua ai le tatou malo, o le taimi tonu lea e alagatatau ona faia ai lea auaunaga,” o se tala lea a le tama’ita’i o Lumana Takitaki Tuitavake.

Ua ia fa’ailoa mai, o i latou e fai sifi i aso uma o le vaiaso ae maise fo’i o afiafi ia e malaga ese atu le malaga a le Hawaiian Air i Honolulu. O le umi foi na nofo ai le turisi i le teritori e tatau ona fesiligia ma talia fesili o lenei suesuega, e na’o le tolu masina e muta ai. E silia loa ma le umi, lea ua le tatau ona fesiligia, ona ua lisia lea tagata o le sui ua nofomau i le tatou malo.

“E le faigofie, ae fai lava le galuega, aua o le mea lea ua afua ai ona totogia e le Ofisa o Turisi i matou, ia mautinoa ua atoa le tausaga o matou fa’amaumauina tali o nei fa’afesili mo tagata tafafao mai i le atunu’u.”

O lea galuega atoa e fa’auluulu lea i le Ofisa o Turisi a le malo ae ua feso’ota’i lenei suesuega ma le taumafaiga o lo’o fesoasoani mai ai le South Pacific Tourism Organisation, lea o lo’o  feso’ota’i ina ia fa’aleleia atili le taumafaiga e fa’alauiloa Amerika Samoa ina ia fa’ateleina turisi e fia maimoaina i le teritori.

I le lisi o fesili ua matauina i totonu o lea suesuega e aotelega uma ai nofoaga sa e asia ma maimoa ai a’o nofo le tagata i Amerika Samoa. O fea sa nofo ai, le faletalimalo ma isi tulaga uma. Pe na fa’apefea ona e iloa Amerika Samoa? O ai sa latou o mai fa’atasi i totonu o Amerika Samoa, o ai na fesoasoani ae poo le a fo’i le ala na e fa’amauina ai le nofoaga e te nofo ai, saili le ta’avale e fealua’i ai, poo fea foi le nofoaga sa sili ona e fiafia i ai. Pe fia le aofaiga o le seleni sa e fa’aaluina i lau tafaoga.

Poo a ni oloa Samoa sa e matua fiafia e fa’atau a’o e i ai i laufanua o Amerika Samoa?

Ua i ai fo’i ma le lisi e tusia ai mea uma sa e fa’aaluina i lau tafaoga, e amata mai lava i le pasese, nofoaga e nofo ai, mea’ai, vaiinu, tupe faaalu i ta’aloga i luga o le vai po’o le sami, taaloga i le laueleele sa e ta’alo ai, e fia fo’i le seleni sa e fa’aaluina ai?

O le vaega mulimuli lava o lenei suesuega, ua fesiligia ai le sui turisi, pe sa fiafia i lana tafaoga, afai e leai, aisea, lisi atu ma mea sa le fiafia ai. Afai o fiafia, pe toe fia ulufale mai i le lumana’i. O a fo’i ni mea e faaleleia mo le isi au toe asiasi mai?

Fa’afetai fo’i mo lenei tautua, aua ua iloga mai e umi se taimi e fa’atumu ai lea suesuega, ae ua faaalia e Lumana, “Ua i ai lava tagata e fiafia e fa’atumu lenei suesuega, aua e muamua lava ona fa’ailoa i ai, e taumafai ona fa’aleleia atili le auaunaga o le talimalo i e uma e ulufale mai e tafafao i tatou laufanua.”

O le faaiuga o le masina lenei e maea ai lenei suesuega.