Talavai foma’i o meaola ma fagafao i le taulaga

O le aso ananafi na tatala ai i le Maota i Tanumaleu i Utulei le talavai mo meaola e fa’atautaia lea e le Matagaluega o Fa’ato’aga ma Lafumanu a le malo e ana foma’i manu fa’apitoa ma i latou e sapasapaia le auaunaga, ina ia fa’aitiitia le tele o ta’ifau ta’aloa po’o le so’ona fananau fo’i o meaola.

“O le auaunaga lenei, e faia ae na’o sina totogi laititi lava e fa’aagaaga mo le totogia lea o vaila’au ma tui e ao ina faia mo meaola ia le mama’i, ma a’afia atu ai ma le soifua maloloina o tagata i totonu o le li’o o le latou aiga,” o se tala lea a le tama’ita’i foma’i manu, Dr Kristen Jensen.

Ua iloga le aoga tele o lenei auaunaga i lona faifai pea mai i tausaga ua mavae, aua sa matua tele lava ta’ifau ta’aloa sa va’aia i nofoaga faitele e aofia ai paka i Pago Pago, Paka Liona ma Oneasosopo faapea ma Faga’alu. Peita’i, i lenei vaitau, ua va’aia lava ua mae’a fa’aitiitia.

I le auaunaga sa tatala mo so’o se ituaiga mana’oga fa’apitoa i fagafao po’o manu tausia lelei e o latou aiga, e o’o lava i nai meaola o lo’o ta’aloa ma ua le fa’asino i se aiga latou te fa’ao’oina atu i latou na i le auaunaga na tatala i Utulei.

I le ma’ea ai o le aso ananafi, o le aso 24 o Me, 2017  o le a toe tatalaina faitoto’a o lea auaunaga i le Maota Talimalo o Mageo i Pago Pago. E amata fo’i lenei tautua i le itula e 7:30 i le taeao ae tapunia fo’i i le 3:00.

I se talanoa mai a Dr Jensen sa ia fa’ailoa ai, “O le tele o meaola e le o mana’omia e aiga, e ao fo’i ona fa’o’o mai, aua e aoga lava ona maua le avanoa e siakia ai meaola uma e aofia ai Pusi, Ta’ifau poo maile, e mafai fo’i ma pua’a, pe afai e manatu ina ia le toe fanafanau se po’a, ae ao ina fofo pe teteu. O lo’o ua i ai nisi ua lisia o latou suafa ona e manana’o e maua se latou fagafao, ae maise lava i pusi ma ta’ifau, afai la ua mae’a ona fa’amama nei meaola, ona vala’au loa lea i na aiga e o mai ua o’o ia i latou le tufa.”

E ese mai le faia o ta’otoga o meaola ina ia taofia le toe fanafanau, ae o lo’o faia fo’i isi siakiga mo meaola e togafitia ai i latou i fa’ama’i o meaola e masani ona maua ai. O le tele o nisi fa’ama’i e afua mai i taimi o feusua’iga o meaola, e fe’avea’i ai ma siama o nei ma’i, e ao ina togafitia ai ae le’i tu’uina atu i nisi o aiga e tausia lelei.

I le aso lava ananafi, ua mae’a fa’ailoa mai e 9 lelei taotoga sa faia ai, ae ese mai ai o nai isi meaola sa fa’o’o ane mo latou tui fa’apitoa e puipuia atili ai.

Ina ia mautinoa ua nofo sauni le tagata e avatu lana meaola mo nei talavai, afai e faia le ta’otoga mo lau fagafao i le nofoaga o le a faia ai le talavai, e na’o le $10 e totogia mo lena tautua, afai fo’i na’o se tui puipuia ma isi auaunaga e $10 fo’i mo lena vaega o le tautua.

Ua fa’ailoa mai e fa’amolemole e aua ne’i fagaina lau fagafao a’o le’i fa’o’o ane mo le taotoga, ae o le tui latou e fafaga lava i latou.

Ua fa’ailoa mai e latalata i le 100 meaola sa taoto, ma meaola fo’i sa faia tui ma togafitiga i vaila’au e tineia ai latou ma’i sa maua ai. “E lima lelei talavai sa faia, i le afioaga o Ta’u, Fitiuta, Faleasao, Ofu ma Olosega. Na matauina e mo’omia lava fo’i lenei tautua i le Manu’atele ma ua fiafia fo’i i matou e o atu ma faia lea talavai. E ao ina fa’amamaina fo’i ta’ifau ma pusi iina, ae maise e ao ina fa’aitiitia lava le so’ona feusuai o pusi ma maile o le aiga e tasi. E tatau ona eseese mamao le aiga faletama e o mai ai meaola e toe feusua’i, ina ia taofiofia mai ai le tele o fa’ama’i e afua mai ona o le tasi le aiga e o mai ai meaola.”

Ua faalauiloa atu nei ae maise lava i afio’aga i nu’u i tua o le atunu’u, ina ia alofagia, afai e mafai ona fa’aaoga se maota po’o se laoa talimalo o se aiga e fa’atautaia ai lenei auaunaga ona o le taga’i mamao fo’i o ali’i ma faipule o itumalo i le tulaga saogalemu o meaola ma le ola feso’ota’i ai ma tagata i lotoifale o latou aiga, fa’amolemole ua mafai ona o’o atu lenei tautua i afio’aga o le a tali mai i lenei mana’omia fa’apitoa.

O lona uiga e mafai ona fa’ailoa mai se mana’oga e fia fa’atautaia se talavai  meaola i lou afio’aga po’o lou itumalo, ae ua malilie mai se aiga e fa’aaoga le latou faletalimalo, ae o lo’o ola le eletise ma le saurai taumafa e fa’aaogaina e le aufaigaluega.

“O le taumafaiga lava ina ia so’o le tautua, aua e aoga tele mo le saogalemu o meaola, ma saogalemu atili ai fo’i ma fanau iti ae maise tagatanu’u uma mai af’ama’i e ono fe’avea’i e meaola,” o se tala lea a le tama’ita’i foma’i manu.

O i latou na auai e fesoasoani i le talavai o Meaola ina ia vave fo’i ta’otoga ma tapena meaola e saunia mo latou taotoga ma talavas e aofia ai: Tanya Tarasawa, Shawntiarre Faumui, Aliyah Fuimaono, Apaisa Jr. Esaroma ma Steve Tafaovale.