Fesiligia Fono Ofisa malo o loo faia nonogatupe i tupe o le Litaea

O se tasi o mataupu sa fesiligia i iloiloga a le maota o sui ma le maota maualuga a le Senate, i le taimi na iloiloina ai e le Fono Faitulafono tofiga a le kovana mo i latou ua filifilia e avea ma totino o le Komiti Fa’afoe o le Litaea a le malo, o le mataupu e fa’atatau i Ofisa a le malo o loo faia a latou nonogatupe i tupe o le litaea.

Na taua e ni isi o afioga i Faipule ina ua latou fesiligia sui o le Komiti Fa’afoe a le litaea e fa’apea, e ui o loo fa’atulafono le maualuga o le pasene o le tupe e mafai ona nono atu i tua mai teugatupe a le litaea, ae tatau fo’i i le Komiti Fa’afoe ona latou silasila toto’a ina ia mautinoa e lelei le toe totogiina atu o nei nonogatupe.

Ae i luma o le senate, na fesiligia ai e le afioga i le ali’i senatoa ia Galea’i M. Tu’ufuli le mataupu lava fo’i lenei, ma ia taua ai lona fia iloa o igoa o Ofisa a le malo o loo faia a latou nonogatupe i tupe o le litaea, na fa’amanino ai loa e le Ta’ita’ifono o le Komiti Fa’afoe o le Litaea ia Va’anatiu Tofala Iafeta e fa’apea, o Ofisa e lua a le malo o loo faia nonogatupe i le litaea e aofia ai le Faletupe o Atina’e ma le Ofisa o Feso’otaiga a Amerika Samoa (ASTCA).

E $2 miliona le nonogatupe a le Faletupe o Atina’e o lo o i ai i le taimi nei, ae $4 miliona mo le ASTCA.

Na fa’amanino atili e Va’anatiu e fa’apea, o le tulafono o lo o i ai, o le 10% o le teugatupe atoa o le litaea e mafai ona fa’aaoga e faia ai nonogatupe. Talu mai le aso 11 Aperila 2017, e tusa ma le $191 miliona le aofa’i o le teugatupe a le litaea o lo o i ai.

E ese mai ai le nonogatupe a le Faletupe o Atina’e e pei ona saunoa Va’anatiu, e 7 tausaga le umi lea ua fa’atulaga e totogi atu ai le nonogatupe e $4 miliona a le ASTCA i le maualuga e 8%.

Na fautuaina e afioga i Senatoa ma Faipule sui o le Komiti o le Litaea ina ia vaavaai i auala e puipuia ai le teugatupe o le litaea a le atunu’u i le lumana’i.

Sa fa’afetaia fo’i e sui o le Fono le Komiti Fa’afoe e tusa ai o fonotaga o lo o faia i Hawaii i le ta’i 2 tausaga, lea o lo o maua ai e faipule ma senatoa le avanoa e fa’afofoga ai a o fa’amanino mai e sui o kamupani inivesi i Amerika tulaga manuia o lo o i ai le teugatupe o le litaea a le atunu’u, fa’atusatusa i teugatupe o litaea a isi vaega o le malo tele.

O fa’amanuiaga tau tupe mo le tagata totogi saofaga atoa ai ma le litaea sa tali le litaea ae ua maliu, o se tasi lea o mataupu na fesiligia e le afioga i le ali’i senatoa ia Muagututia Tauoa, ona o lona finagalo, e fai lava si laititi o fa’amanuiaga o loo maua e le tagata litaea ae maliu i le na o le $1,500, pe a fa’atusatusa i le $10,000 lea e maua e le tagata faigaluega a le malo e maliu ae lei maua lona litaea.

Na taua e Va’anatiu e fa’apea, o le a toe vaavaai i le tulafono ina ia mafai ai ona fa’amalieina le fautuaga taua ua tu’uina atu.

O le mae’a ai o le iloiloga a le senate, na pasia ai loa totino o le Komiti Fa’afoe i le palota e 18-0, e aofia ai Va’anatiu, afioga i le Senatoa ia Tuaolo M. Fruean, Aloma Langford ma Maae Lopa Tuiasosopo.