Poloaiga Kovana e fa’aitiitia ai sui Komiti Fa’afoe ASTCA i le to’a 5

Ua tu’uina mai nei e le affoga i le ali’i kovana ia Lolo Matalasi Moliga sana poloaiga fa’alaua’itele Numera 04_2017, e suia ai le poloaiga Numera 02-1988 e pei ona tofia ai totino o le Komiti Fa’afoe a le Ofisa o Feso’otaiga a Amerika Samoa (ASTCA), ina ia fa’aitiitia ai i le to’a 5 totino o le Komiti Fa’afoe a le ASTCA, ma fa’atulaga ai loa ma le umi o tausaga e tautua ai totino ta’itasi i totonu o le Komiti Fa’afoe.

O totino fou o le Komiti Fa’afoe e aofia ai le afioga i le ali’i faipule ia Puleleiite Li’amatua Tufele Jr, o le afioga i le ali’i senatoa ia Faiivae A Godinet ma Alofagia Nomura e ta’i 2 tausaga e tautua ai i latou i totonu o le komiti, ae o Taiulagi Mauga ma Omar Shallout o sui ia mai pisinisi tua e ta’i tasi tausaga e avea ai i laua ma totino o le komiti.

Na fa’afetaia e le ali’i kovana ia Lolo le tautua a i latou sa galulue muamua i le Komiti Fa’afoe a le ASTCA ua le mafai ona toe fa’aauauina la latou tautua, e tusa ai o galuega lelei e tele sa latou fa’atinoina mo le Ofisa o Feso’otaiga a le malo i tausaga ua mavae, atoa ai ma le galuega tele sa latou taumafai mai i ai, lea ua mafai ai ona fa’ataunu’uina le galuega tele o le BLAST Project, ma ua mafai ai ona fesoasoani i le fa’aleleia atili o tulaga tau fesootaiga i le atunu’u.

Sa ia taua fo’i lona talitonuga o i latou ua filifilia e avea ma totino fou o le komiti fa’afoe, o le a latou fesoasoani i le fa’atinoina o gaioiga ina ia aga’i ai le tautua a le ASTCA i le lumana’i.

E pei ona fa’alaua’itele e le kovana i lana poloaiga lea na sainia i le vaiaso ua te’a e fa’apea, o totino o le Komiti Fa’afoe a le ASTCA e to’alima e tofia uma e le kovana mo le umi e ta’i 2 tausaga e galulue ai i latou i le komiti fa’afoe.

O totino e to’alua e filifilia mai e le kovana mai le atunu’u lautele ua lava le tomai i le fa’atinoina o galuega ma fa’aiuga atamai e manuia ai le tautua a le Fa’alapotopotoga o Fesootaiga, ae o le isi to’atolu e filifilia mai lea i sui o pisinisi tua, ae o i latou foi ua lava le tomai ma le agava’a i le faia o fa’aiuga atoa ai ma le agava’a i tulaga tau tupe aemaise ai o auala o fesootaiga.

O le Ta’ita’ifono o le Komiti Fa’afoe e filifilia lea e le afioga i le ali’i kovana, lea ua filifilia ai le afioga i le ali’i faipule ia Puleleiite na te tauaveina lea tautua.