Malaga mai Sui Peresitene o Amerika, Mike Pence

O le aoauli o le aso Sa na taunu’u ai  i Pago Pago le  Sui Peresitene o Amerika, Mike Pence ma sa to’atele nisi sa auai atu i le malae va’alele i Tafuna.

Peita’i,  e le’i faigofie fo’i i lagona o nisi, le faigata o le malu puipuia o lea faigamalaga, ma ua le mafai ai ona fa’atalofa atu i lea sui mamalu, pe pu’e fo’i ni ata lata mai o Pence fa’atasi ma i latou.

“O le eseesega lea ua va’aia i lenei tausaga, ua pei lava le faiga o i tatou iinei o le faiga o lo’o va’aia fo’i i fafo, i so’o se taimi e femalaga’i ai sui mamalu o le Malo tele i ni fonotaga ma ni a latou feiloa’iga ma nisi e matua faigata lava ona o’o atu se isi e fa’atalofa pe talanoa sa’o atu i nei sui. O le tulaga o le puipuiga ina ne’i lamatia lo latou soifua,” o se tala lea a se tasi o fitafita tuai sa maimoaina le faigamalaga.

I le tapenaga o le malae va’alele, ua va’aia le gaogao atoa o le pakaga o ta’avale, ua mae’a uta ese uma ta’avale a i latou sa paka ai i le pakaga a le malae va’alele.

O tagata uma sa i totonu o le malae va’alele, sa o ese mai ae fa’atonuina e aga’i atu i le isi itu ua fa’atuina ai na’o le faleie ina ia siakia mai ai i latou e le TSA.

O le taimi lea o le aoauli o le matua vevela lava o le la, peita’i, o tagata uma ua fa’asalafa i ai lenei vala’au ina ia siakia. O tama ma tina matutua, fa’asolo ane i e mautofi, o i latou uma fo’i o leoleo malae va’alele ma leoleo masani a le Malo, o le vaega a le Army Fa’aleoleo, o le Nuuuli Aumaga sa leoina fa’asamoa le ava o le feiloa’iga sa foufou e faatino ma le aumalaga, e leai se isi e oo i le EMS sa matua faction ai lea siakiga.

E to’afa le vaega a le FBI na malaga muamua mai ae le’i taitai mai lenei malaga, ona o i latou ia e galulue fa’atasi ma vasega o leoleo a le Malae Va’alele. O le vaega a le Saogalemu Fa’alotoifale, Homeland Security, sa latou fa’atinoa le siakiga o tagata uma.

Na va’aia le to’atele ma a latou fa’ailo ua tusia ai upu, “Afio Mai Pence” po’o le “Afio Mai Vice President” ma ua fa’ailoa fo’i le fiafia. Ua va’aia nei i mata o tatou tagata, e le faigofie lava ona pa’i atu se tasi i so’o se sui maualuga e ulufale mai.

O fuafuaga uma matagofie sa tu’u e fai ua le o’o, ae maise ai lava le ‘ava o le feiloa’iga sa tapena i ai le pa’ia o le Ofisa o Mataupu Tau Samoa ma le latou fo’i fa’auluuluga. Sa va’aia le mamalu o tama o le atunu’u i totonu o le Malae Va’alele e fa’atali ai lo latou taimi paganoa, peita’i, sa saunoa fa’amalulu mai fo’i le afioga le Kovana Sili, ona ua le gafatia lea tulaga.

Ina ua fesiligia se tasi o FBI sa malaga mai mo le puipuiga o le saogalemu o le Sui Peresetene, ae fa’ailoa mai, “E oo lava i se vainu, poo se mea’ai, ua mae’a fa’ailoa mai ia i matou e le tatau ona tagofia e lenei sui a’o i ai iinei, ua fa’apea fo’i ia i matou uma lava o lo’o malaga mai.”

Ina ua fesiligia pe aisea ua fa’asa ai ma le pa ona tutu ai le au pu’eata mo le fa’amoemoe e maua ni ata matagofie o le ‘au malaga, ae fa’aalia mai e lea sui o le aumalaga, “Ua matauina, e oo lava i mea pu’eata i fafo, ua mafai ona avea ma ‘auupega, peita’i, sa tatau lava ona outou tutu fa’atasi i se nofoaga fa’apitoa e lelei ai a outou ata.”

Ua iloga nei la le fa’afitauli, aua ua fai lava le fonotaga lea e le Ofisa o le Kovana ma lana taupulega, ae ua le logoina i si Kamupani o le Nusipepa ma le Leitio lea e tautuaina le atunu’u, ina ia tofusia ma le tulaga e tu ai ma ua mae’a siakia fa’apitoa fo’i sui e tutu ai e le vaega a le TSA.

I le mamalu sa auai, e pau le fa’anaunauta’iga sa ia i latou, “E fia pu’e lava so ta ata o lata fanau ma le sui peresetene, po’o le ‘aumalaga fo’i lava!” Peita’i, ua le mafai nei, aua ua matua sa lava le leoleoga a le FBI ma ua latou fa’atonua fo’i nofoaga e tatau ona tutu ai tagata lautele.

O le vaega a le US Army Reserve, o i latou ia na mafua ai ona malaga sao mai le Sui Peresetene, ia asia ma fa’amalosi’au ia i latou ina ia tautuaina le malo tele o le Iunaite Setete ma ia latou usita’ia a latou tautoga.

O iina fo’i sa avea atu ai ma le Fa’ailo o le Igoa o le Falema’i mo Fitafita Tuai lea ua fa’aigoaina “Eni F.H. Faleomavaega VA Clinic.” Sa taua’aoina aloaia lea fa’ailo e le afioga Faiivae Alexander Godinet, o le sa avea ma pule o lana aufaigaluega i Amerika Samoa ao tula’i o ia o le Faipule mo Amerika Samoa.

I le to’atele, e ui ina ua le pa’i, pu’e se ata, pe va’ai patino i le tino o Pence i o tatou laueleele, ae fa’afetaia ua mafai ona molimauina lenei fo’i avanoa ua asia ai le teritori.

O le Tausala lalelei o Amerika Samoa, sa mafai ona fa’atalofa lelei ma le Sui Peresetene, sa mafai ona fa’ailoa e lenei tama’ita’i, “Na ou fa’aulaina o ia ma fa’atalofa atu i ai, ma avea ia te ia le Fue ma le To’oto’o o mea taua mo le tatou aganu’u e talafeagai ma lona tofi o tula’i ai mo i tatou uma i ona setete ma teritori o Amerika. O isi meaalofa iti sa taua’aoina e aofia ai ma pusa wahoo, ae maise  o le lisi o mea o lo’o mana’omia e tatou tagata ina ia alofagia ma fa’ao’o atu ia Peresetene Trump ma lona fo’i sui la te talanoa vavalalata i ai. O se tasi sa fa’ailoa mai lona fiafia ma lana fa’afetai mo le to’atele ua le feiloa’i fa’atalofa i ai, ma o lo’o molita’i mai alofa’aga ma lona to’alua e avea ma sui o le Peresetene ma le faletua atoa ma le Malo o le Iunaite Setete o Amerika.”

E ui ina le maimoaina fa’afiafiaga ma pesega matagofie a Leone High ma Tafuna High, ae sa matua mata’alia le fanau i le fa’atinoga o latou siva ma pese sa fuafua e faafiafiaina ai le ‘aiga mamalu ma le sui peresetene o le Malo tele ma le ‘au malaga. Faafetaia lea fo’i sao aua sa saunia lelei mea uma.

Ina ua tu’ua le tatou malo, sa va’aia le toe fa’atasia o le to’atele sa i Tafuna International Airport e talisua i le ‘aiga matagofie sa tapena mai e le Ofisa o le Kovana mo e uma sa aofia.