Fa’ateia Fono i le saputu atu o tofiga Kovana mo sui Komiti Fa’afoe

Na atagia i saunoaga a afioga i Senatoa ma Faipule i le taeao ananafi le fa’ateia o i latou i le fa’afuase’i lea ona saputu atu i’ugafono mo tofiga a le Kovana i sui o Komiti Fa’afoe  eseese a le malo, a o lea ua toe 3 aso tapunia galuega a le Fono Faitulafono mo lana ulua’i tauaofiaga lea ua fa’amoemoe e mae’a i le aso Tofi o le vaiaso nei.

Na avea le saputu atu o i’ugafono mo tofiga a le Kovana i Komiti Fa’afoe ma auala na umi ai se taimi o fetufaa’i maota e lua i le tau fa’atulagaina o iloiloga mo le pasiaina o totino o Komiti Fa’afoe eseese nei, ona o lea ua fetaui le taunu’u atu ma le pisi o le atunu’u i sauniuniga o le fu’a o lenei tausaga e pei o tuuga fautasi i le taeao nei ma le taeao o le aso Tofi.

I luma o le maota o sui, ua talia ma le agaga le fiafia e ni isi o afioga i Faipule le fautuaga mai le Fofoga Fetalai ia Savali Talavou Ale, ina ia toe tolopo uma a latou iloiloga sa fa’atulaga mo aso o lo o totoe o le tauaofiaga a le Fono, ae ave le fa’amuamua i iloiloga mo Komiti Fa’afoe e pei ona toai atu i luma o le maota, ona o lo o mana’omia e le Kovana le fa’apasiaina o nei tofiga.

Na talosagaina e ni isi o faipule le Fofoga Fetalai mo se avanoa e tolopo ai le fa’aauauina o iloiloga, ina nei pisi le to’atele o sui o le maota i le lagolagoina o Sa a afioaga mo le tuuga fautasi, ona fa’aletonu ai lea o le Kalama e fa’atino ai galuega a le maota, peita’i sa finagalo lava le tofa Savali ina ia fa’ataunu’u pea iloiloga a Komiti i le itula e 8:00 i le taeao nei, atoa ai ma le itula e 8:00 i le taeao o le aso Tofi.

Ae i le maota maualuga, ua toe tolopo uma iloiloga sa fa’atulaga e fa’ataunu’uina i le taeao nei, i lalo o se fautuaga mai le afioga i le peresetene o le Senate ia Gaoteote Palaie Tofau.

Ao taumafai mai ai taitai o komiti eseese e tau fuafua ma tau fa’atulaga taimi o iloiloga mo tofiga fou a le Kovana, na fa’amanatu e Gaoteote i afioga i Senatoa le tulaga tonu e tatau ona taoto i ai la latou galuega.

“Aua nei fa’amamafaina le saputu mai o iugafono mo tofiga fou a le Kovana ma auala e tau atugalu ai a outou afioga e tau fa’atulaga taimi ma aso o iloiloga, e fai aso le Atua, e toe amata fo’i isi galuega a le Fono i le masina o Iulai, o le mea lea e fautua atu ai ia outou afioga, fa’aagafua iloiloga mo aso fa’ai’u o lo o totoe, ae alo le maota mo le faaiuga o ana galuega masani”, o le fautuaga lea a Gaoteote na mafua ai loa ona toe tula’i afioga i ta’ita’i komiti sa fa’atulaga a latou iloiloga i le taeao nei, ma fa’alauiloa le toe tolopo o a latou iloiloga seia aulia le masina o Iulai o le tausaga nei, lea e toe a’e mai ai le Fono mo lana tauaofiaga lona 2 o le nofoaiga lenei 35.

O tofiga fou a le kovana e aofia ai Komiti Fa’afoe o Aoga Maualuluga, Komiti o Femalagaaiga, Komiti Tausimavaega o le Tupe a le Litaea, atoa ai ma le Komiti Fa’afoe mo Fesoasoani Tau Tupe mo Tamaiti Aoga.

O le itula e 8:00 i le taeao nei lea ua fa’atulaga e faia ai le iloiloga a le Komiti o Aoga a le maota o sui, mo le fa’amaonia o tofiga a le Kovana mo sui o le Komiti Fa’afoe o Aoga Maualuluga, lea e aofia ai Moseniolo Viane Etuale, Rev. Dr. Siulagi Solomona, Tauiliili Lauifi ma Dr. Annie Fuavai, fa’apea ai ma totino o le Komiti Fa’afoe mo Fesoasoani Tau Tupe mo Tamaiti Aoga, lea e aofia ai Donna Gurr ma Ruth Matagi-Fa’atili.

O le mae’a ai o le iloiloga a le Komiti o Aoga a le maota o sui, ona sosoo ai loa lea ma le iloiloga a le Komiti o Mataupu Tau Tulafono a le maota, mo le iloiloina o tofiga a le kovana mo sui o le Komiti Fa’afoe o Femalagaaiga, lea e aofia ai Gloria Ausage, Tauilagi Asuega, Togotogo Poto Sotoa, Edda Wyberski, Frank Gaisoa ma sui e to’alua o le Fono e aofia ai le afioga i le ali’i faipule ia Toeaina Faufanu Autele ma le afioga i le ali’i senatoa ia Fa’amausili Mau Jr.