28 moliaga mamafa ua faila e le malo fa’asaga ia Okesene Alo

Mai moliaga e 35 lea ua faila e le malo o Amerika Samoa fa’asaga i le ali’i Leoleo o le Falepuipui o Tamaiti i Tafuna (Juvenile Detention Center - JDC), ia Okesene Alo, o lo o aofia ai moliaga mama e 7 atoa ai ma moliaga mamafa e 28.

O le susuga a Alo e to’afa i ai Leoleo mai le Falepuipui o Tamaiti ua molia e le malo i moliaga eseese, e mafua mai i le fa’alavelave lea o lo o tu’uaia na alia’e mai i le va o le masina o Aperila e oo atu ia Novema o le tausaga na te’a nei, ina ua fa’ataga tamaiti pagota e o i tua ma le toese i le leva o le po, fa’aaogaina e leoleo ma pagota o fualaau fa’asaina, ave fa’agaoi meatotino mai totonu o le nofoaga, atoa ai ma le faia o uiga mataga fa’afeusuaiga fa’asaga i tama’ita’i talavou o loo taofia i le JDC.

O Leoleo e to’afa o le JDC o lo o tu’uaia i lenei mataupu e aofia ai Alofagia Letuli ma Olafou Wilson, lea ua mae’a ona tofu atu i luma o le fa’amasinoga maualuga a la mataupu, ina ua fa’ai’uina e le afioga i le ali’i fa’amasino ia Fiti Sunia o le Fa’amasinoga Fa’aitumalo i ulua’i iloiloga sa faia i le vaiaso na te’a nei, le lava o mau fa’amaonia sa folasia e le itu a le malo e lagolago ai ua soli se vaega o le tulafono.

Na teena e Letuli ma Wilson moliaga eseese o lo o tu’uaia ai i laua i le aso Faraile na te’a nei, ma ua toe taofia nei i laua i le toese e fa’atali ai le la ulua’i iloiloga lea ua fa’atulaga e faia i le aso 2 Iuni 2017, ae o le masina o Setema 2018 lea ua fa’atulaga e faia ai le la fa’amasinoga autu.

O le vaiaso nei lea ua toe fa’atulaga e faia ai le ulua’i iloiloga a Alo i luma o le fa’amasinoga fa’aitumalo, ina ua le fa’ataunu’uina lana ulua’i iloiloga lea sa fa’amoemoe e faia i le aoauli o le aso Faraile na te’a nei.

Na taua e le loia a le malo o lo o gafa ma le taulimaina o lenei mataupu ia Jedediah Bigelow e fa’apea, e ui e to’atasi le molimau a le malo o le a valaauina i lea aso, peita’i e i ai le talitonuga e fai sina umi o le iloiloga lea ma isi iloiloga e 2 ua mae’a atu, ona o le tele o moliaga o lo o tu’uaia ai e le malo ia Alo.

O moliaga mama fa’asaga ia Alo e aofia ai moliaga e 4 o lona faia o ni gaioiga e ono lamatia ai le saogalemu o fanau laiti, atoa ai ma moliaga e 2 o lona fesoasoani lea e tu’u atu le ‘ava malosi i fanau e talavou i lalo o le tulafono.

I moliaga mamafa e 28 o lo o tu’uaia ai Alo e le malo, o lo o aofia ai moliaga e 4 o lona umia fa’asolitulafono o vaega o le pauta fa’asaina o le aisa, fa’apea ai ma isi moliaga e 4 o lona tufa atu lea o le pauta fa’asaina o le aisa i pagota talavou e to’afa e pei ona taua i fa’amaumauga a le fa’amasinoga.

E 3 moliaga mamafa o lona fesoasoani lea e fa’asola se pagota i tua, atoa ai ma isi moliaga mamafa e 3 o lona fa’ataga lea o se pagota e sola i tua, e mafua mai i tu’uaiga fa’asaga ia te ia i lo latou malaga lea i tua mai le nofoaga ma pagota talavou e to’atolu i le leva o le po, ma le fa’amoemoe e fa’atino ai ni isi solitulafono.

E 10 moliaga mamafa o le faiaiga ma se teineititi e talavou i lalo o le tulafono, e mafua mai i tu’uaiga fa’asaga ia te ia, i lona faiaiga lea i se teineititi pagota sa taofia i totonu o le nofoaga. O lo o tu’uaia fo’i o ia i le moliaga mamafa e tasi o lona tagofia o itutinosa o se teineititi e laititi i lalo o le tulafono, atoa ai ma le isi moliaga mamafa e tasi o lona faia lea o ni uiga mataga fa’afeusuaiga fa’asaga i se teineititi e talavou i lalo o le tulafono, ma le moliaga mamafa mulimuli o le taumafai lea e fa’aleaga se fa’amatalaga a se molimau.

O lo o taofia pea Alo i le toese i Tafuna sei vagana ua totogi le vaega tupe e $200,000 ona fa’atoa mafai lea ona tatala o ia i tua mai le toese.