Tofu mataupu Leoleo o le JDC i le Fa’amasinoga Maualuga

O le taeao o le aso Faraile o le vaiaso nei, Aperila 7 lea ua fa’atulaga e fofogaina ai le mataupu a se tasi o Leoleo mai le Falepuipui o Tamaiti (Juvenile Detention Center - JDC), lea o loo tu’uaia i le moliaga eseese e mafua mai i ni fa’alavelave o loo tu’uaia e le malo na alia’e mai i totonu o le JDC i le tausaga na te’a nei, ina ua mae’a lana ulua’i iloiloga i le aoauli ananafi ma fa’amaonia ai e le afioga i le ali’i fa’amasino ia Fiti Sunia, o lo o i ai mau fa’amaonia a le malo e lagolago ai tu’uaiga ua faia fa’asaga ia te ia.

O le susuga a Alofagia Letuli, o lo o tu’uaia o ia i moliaga eseese e 10, lea e aofia ai le moliaga mama e tasi o lona faia o ni gaioiga e ono lamatia ai le saogalemu o fanau laiti, atoa ai ma moliaga mamafa e 9.

O moliaga mamafa e 9 ua faila fa’asaga ia Letuli e aofia ai moliaga e lona 2 ma le 3 o lona umia fa’asolitulafono o vaega o le pauta fa’asaina o le aisa, o le moliaga lona 4 o lona tufatufaina atu lea o fualaau fa’asaina i se isi tagata, o le moliaga lona 5,6 ma le 7, o loo tu’uaia ai o ia i lona fesoasoani lea e fa’asola se pagota o loo taofia i le toese, ma moliaga lona 8,9 ma le 10, o lo o molia ai o ia i lona fa’atagaina lea o se pagota o loo taofia i le toese e sola i tua.

E tasi le molimau a le malo sa fesiligia i le taimi o le ulua’i iloiloga ananafi, e na o le ail’i leoleo suesue ia Det. Filemoni Amituana’i, lea ua tusa ma le 18 tausaga o avea ma leoleo, e aofia ai tausaga e 8 sa avea ai o ia ma leoleo su’esu’e, peita’i ua tusa nei ma le 3 vaiaso talu ona le toe avea o ia ma leoleo su’esu’e, ae ua tofia o ia e galue i le Vaega o Ta’avaleafi (Traffic Division) a le Ofisa o Leoleo.

Na taua e Det. Amituana’i i lana molimau e fa’apea, o le mataupu atoa lenei na alia’e mai ina ua masaloia se ali’i talavou sa loka i le JDC i se taimi o Setema o le tausaga na te’a nei, o loo ia tagofia fualaau fa’asaina, o le mafua’aga lea na faia ai loa se suega i le tino o lea ali’i ma fa’amaonia ai i le suega sa faia, le i ai i totonu o lona tino o le vailaau oona o loo maua i le pauta fa’asaina o le aisa, ma mafua ai loa ona faia se suesuega i lenei mataupu.

E to’alua ali’i pagota talavou na taua i le ulua’i iloiloga sa faia, o i laua ia sa molimauina gaioiga uma sa faia i totonu o le JDC, lea ua mafua ai ona faila moliaga fa’asaga ia Letuli, ma o ia ali’i pagota talavou o loo fa’aigoaina i laua i fa’amaumauga a le fa’amasinoga o ‘victim #2’ ma ‘victim #5’, o la igoa fo’i ia sa fa’aaogaina i le taimi atoa o le iloiloga.

O le ali’i o victim #5 lea na faia le suega i lona tino ma fa’amaonia ai le maua o le vailaau o loo i totonu o le pauta oona o le aisa ia te ia, ae ina ua fesiligia o ia poo fea na ia aumaia ai le aisa sa ia ulaina, sa ia taua ai e fa’apea, o le aisa sa ia ulaina sa ia gaoia mai i totonu o le ato a le ali’i leoleo o [Okesene] Alo, o le isi lea leoleo e to’afa i ai leoleo mai le JDC o loo tu’uaia e le malo i lenei mataupu.

Na taua e Det. Amituana’i e faapea, e tusa ai o le fa’atalatalanoaga sa faia ma victim #2 i totonu o le JDC i le tausaga na te’a nei, na fa’ailoa atu ai e le ali’i lea lona vaaia o Letuli o loo ia ula le pauta o le aisa e fa’aaoga ai le paipa i se taimi o le tausaga na te’a nei, i le va o le aso 1 Aperila e oo atu i le aso 31 Iulai 2016.

Ae mo le ali’i o victim #5, na taua e Det. Amituana’i i lana molimau e fa’apea, e tusa ai o le la talanoaga ma victim #5 sa faia i le toese i Tafuna i le fa’aiuga o le tausaga na te’a nei, sa faailoa atu ai e le ali’i lea ia te ia, le i ai o taimi la te o ai ma Letuli i le leva o le po i le fale o Letuli i Pava’ia’i e piki mai ana fualaau fa’apea ai ma fualaau fa’asaina o le aisa.

Na taua e victim #5 ia Det. Amituana’i i lana molimau e fa’apea, o le taimi la te fo’i mai ai ma Letuli mai lona fale, e paka ai le la ta’avale i se vaega o le auala, ona ula lea e le ua molia o le fualaau fa’asaina o le aisa e fa’aaoga i ai le paipa, o isi fo’i taimi e tu’u atu ai e Letuli le paipa o loo i ai le aisa na te ulaina, ma fa’apea fo’i ona ia faia.

Na taua atili e victim #5 ia Det. Amituana’i e fa’apea, pe a ma le fa’a 3 i le fa’a 4 ona tutupu nei gaioiga i le leva o le po, o le la tuua lea ma Letuli o le nofoaga o le JDC ae la o i tua i le aiga o Letuli, o ia fo’i na te aveina le ta’avale a Letuli i taimi la te o ai i tua i lona aiga.

Na taua atili e le ali’i leoleo i lana molimau e fa’apea, sa i ai se ripoti sa faila mai i le JDC e uiga i mataupu eseese o loo tutupu i le va o leoleo ma pagota, lea sa tu’uina atu i le Komesina o Leoleo ua mavae i le tausaga na te’a nei, ma tofia ai loa o ia i le fa’aiuga o le masina o Novema 2016 na te su’esu’eina lenei mataupu.

O ni isi o itu na finau malosi ai le loia a Letuli, o le leai lea o ni mau fa’amaonia sa maua ia Letuli e lagolagoina ai tu’uaiga fa’asaga ia te ia, e leai fo’i se taimi na fesiligia ai o ia e Leoleo e uiga i lenei mataupu. Na fesiligia fo’i e le loia a le ua molia le fa’atuatuaina o le molimau a le ali’i leoleo, ona o lea ua le toe avea o ia ma leoleo su’esu’e, aemaise ai o le le fa’atuatuaina o fa’amatalaga a ali’i pagota talavou e pei ona taua, peita’i na saunoa le afioga i le ali’i fa’amasino ia Fiti Sunia e fa’apea, o vaega uma e pei ona fesiligia, o le mataupu uma ia e mafai ona fesiligia i luma o le fa’amasinoga maualuga, pau le agaga o le ulua’i iloiloga, o le vaavaai lea pe lava mau faamaonia e lagolagoina ai sa i ai se solitulafono sa faia.

O lo o taofia pea Letuli i le toese i Tafuna se’i vagana ua ia totogiina le tupe e $60,000 ona fa’atoa mafai lea ona tatala o ia i tua, i lalo o tuutuuga mai le fa’amasinoga fa’aitumalo e ao ona ia usita’i i ai.

O le ali’i loia fautua ia Mathoni McCormick o loo tula’i mo Letuli ae o le ali’i loia ia Woodrow Pengelly o loo tula’i mo le malo, ae o le afioga i le ali’i fa’amasino ia Fiti Sunia sa iloiloina lenei mataupu.