Tala otooto mai le Fono Faitulafono

FESILIGIA MAFUA’AGA O LE LE LAVA O MEAAI A PAGOTA

O le vaiaso nei lea ua fuafua le maota o sui e fa’atulaga ai se iloiloga ma le afioga i le ali’i Komesina o Leoleo, atoa ai ma le Pule o le Falepuipui i Tafuna, mo le tau sailiina o se tali o le fa’afitauli lea ua taunu’u atu i le maota o sui, o le le lava lea o meaai e tausi ma fafaga ai ali’i ma tama’ita’i pagota o loo tuli a latou fa’asalaga i le toese i Tafuna.

O le vaiaso na te’a nei na tofu atu ai lenei mataupu i luma o afioga i Faipule, ina ua momoli atu e se sui o le toese i Tafuna lea manaoga i afioga i Faipule mo sa latou fesoasoani.

E ui e lei manino i saunoaga a faipule le mafua’aga o le fa’afitauli, peita’i na taua e le sui fofoga fetalai ia Fetu Fetui Jr e fa’apea, e tusa ai o le ripoti ua oo atu i lona Ofisa, o le fa’afitauli i le le lava o meaai a pagota e mafua mai i le leai o se tupe e fa’atupe ai lea manaoga.

Na faamaonia mai e le Pule o le Toese i Tafuna ia Foifua Foifua i le Samoa News i le taeao ananafi, e le o i ai se tulaga fa’aletonu i le sapalai o taumafa a pagota, o loo lava ma totoe, pau le tulaga o loo manaomia ai le fesoasoani, o le tulaga i le fa’atulagaina o le paketi mo le tausaga atoa, ona o le isi lea fa’afitauli o loo mafua ai ona tula’i mai pea tulaga faaletonu i le tau le lava o le sapalai mo pagota i ni isi o taimi o le tausaga, ae o loo tulaga lelei pea le sapalai mo pagota i le toese i le taimi nei.

O molimau ua valaaulia mo le iloiloga e aofia ai le Komesina o Leoleo, le tofa Le’i Sonny Thompson, o le Pule o le toese ia Foifua Foifua, ma le Fa’atonusili o le Ofisa e Faatautaia Polokalame e tete’e atu ai i solitulafono (CJPA), le tofa Leseiau Laumoli.

FIA MALAMALAMA FAIPULE MATAUPU FAATATAU I LE TAUSANI

O le mae’a ai o le iloiloga a le maota maualuga i le vaiaso na te’a nei e fa’atatau i le nonogatupe a le kamupani va’alele o le Tausani, lea sa fa’amatu’u mai i le Faletupe o Atina’e, ua finagalo ai loa afioga i Faipule e fa’atulaga sa latou iloiloga e fesiligia ai le mataupu e fa’atatau i le tulaga tonu o loo taoto i ai lenei nonogatupe.

O popolega o afioga i Faipule e pei ona fa’aalia i le vaiaso na te’a nei, afai o lea ua mae’a ona tu’u atu le tupe e fa’atino ai le manaoga ao lea lava e le o i ai se va’alele o lelei mo Manu’a, o le a fa’apefea la ona toe totogi e le kamupani va’alele a le Tausani le nonogatupe.

Na manino i le molimau a le Peresetene o le Faletupe o Atina’e a Amerika Samoa (DBAS) ia Ruth Matagi-Faatili i luma o le senate i le vaiaso na te’a nei, ua mae’a ona faia le fa’aiuga a le Komiti Fa’afoe o le Faletupe e le toe tuuina atu se isi vaega o le nonogatupe o loo totoe a le Tausani, ae o lea ua galulue itu e lua e fa’atulaga auala e toe totogi atu ai le nonogatupe i le Faletupe.

Mai le nonogatupe e $400,000 sa talosagaina e le Tausani mai le DBAS, e na o le $250,000 le vaega tupe o le nonogatupe lea ua mae’a ona tutuina atu, ma le fa’amoemoe ua tatua ona toe totogi atu le nonogatupe.

O le itu o loo fia malamalama i ai afioga i Faipule, pe ua gafatia e le nonogatupe e $250,000 ua mae’a ona tuuina atu ona fa’atau ai se va’alele fou e tautuaina le itumalo o Manu’a, ma maua ai loa se vaega tupe e amata ai ona toe totogi le nonogatupe i le malo.

Saunoa le Peresetene o le kamupani va’alele a le Tausani, susuga i le ali’i Faifeau ia Rev. Filifa’atali Michael Fuiava i luma o le Senate i le vaiaso na te’a nei e fa’apea, o se tasi o itu o loo tuai ai gaioiga mo le lisiina o le va’alele a le malo, le Segaula, ona ua i ai isi totoga o le va’alele e mana’omia le toe fa’afou ma fa’aleleia, talu ai ua fai si umi o tu le va’alele e lei toe fealua’i.