Tala I Vaifanua

MASINA O KONESETI MA LE ‘AU TATAFITI A BRUNO

O lenei masina ua tula’i mai ua asiasi mai o Tupa’i Bruno ma lana ‘Au Tatafiti, lea ua tapena mo le aso 17 o Mati e tatala ai latou fa’afiafiaga i le nofoaga i Tafuna industrial park. O lo’o aumaia ai ma le Tagata Sili Ona umi i le lalolagi.

E ese mai lea, o le a tele nisi a latou fa’afiafiaga o le a maimoaina e le mamalu o le atunu’u ae maise lava le fanau. Fai mai e le tasi le vaiaso lea o le a faia ai fa’afiafiaga a lenei au fa’afiafia, ae o le a matua nonofo lava foi mo se lua masina, ao le’i tu’umuli Bruno ma lana au fa’afiafia i Samoa mo le tuto’atasi ia Iuni 2017.

E ese mai lea ua fa’atulaga fo’i fa’afiafiaga a le ali’i pese ia Spawn Breezie, o ituaiga music fo’i o lenei vaitau, ma e matua fa’afiafiaina ai le fanau talavou. Ua fa’atulaga e faia lea fa’afiafiaga i le aso 23 Mati i le Malaeoletalu i Fagatogo. Ua faia fa’atasi ai ma le tele o isi pesega a tatou tagata lautogia i le Musika ma le tata Kitara ma mea fa’aili i lea lava aso.

Ua fa’ailoa mai o le a fa’atutuina fo’i fale ie tetele o le a i ai ma isi ta’aloga e fa’afiafia atili ai le fanau pe afai e manatu le aiga atoa e maimoaina lenei fa’afiafiaga.

FA’AMANATU - TULAFONO FA’ASA  AI  LE ULAULA

Ua fa’alauiloa mai le fonotaga a le Komiti Fa’afoe o le DOH - Tobbacco/Diabetes e usuia i le Faraile nei, 17 Mati, 2017i le itula e 11:00 i le taeao. O lea fonotaga ua fa’amoemoe e faia lava i le latou Ofisa i Faga’alu, fa’afesagai ma le Drug Store.

O le fonotaga lenei e toe talanoaina auiliili ai le fa’aupuga o le tulafono ua fa’asaina ai le ulula tapa’a i nofoaga faitele o ofisa uma o le malo, kamupani ma a’oga, ae maise o fale fa’atali pasi, totonu o ta’avale la’u pasese, ma isi nofoaga faitele.

Pe afai e maea toe taga’i toto’a le Komiti Fa’afoe i lenei tulafono ma ona maga ua mae’a fa’atulagaina ai, o le a toe fa’aulu loa mo le fa’amalosia, ae o lenei tulafono ua mae’a pasia ma fa’amalosia i le teritori.

O le susuga le ta’ita’ifono o Puleleiite Tufele ma lona sui Taitaifono o Fr Vaiula Ilalio, le failautusi, Netini Sene ua latou vala’au fa’aaloalo mai i sui tofia uma o lenei komiti mo lea fa’amoemoe aoga tele. Ua fa’ailoa mai o le a auai fo’i le loia fa’apitoa mo lea auaunaga, Ipulasi Aitofele Sunia o le a aofia fa’atasi mo le fa’amoemoe e taga’i toto’a i le toe iloiloga o le fa’aupuga o lea tulafono.

FA’ATAUA EKALESIA I VIRGINIA TU’UMALO O FALEOMAVAEGA

Ua fa’asalalauina nei le sauniga lotu fa’apitoa e fa’amanatu ai le fita i tuga o le tofa Faleomavaega Eni Hinkin, le sa tutula’i i le Konekeresi mo tausaga e 26 e avea ma sui o Amerika Samoa.

Ua fa’atulaga lea sauniga i le Aso Sa, 25 Mati, 2017 i le Memorial Chapel, i  Fort Myer, Virginia. Ona o lea fo’i le a’ai o loo alaalata’i ai nisi o alo o Amerika Samoa i le nofoaga a le militeri, ma sa avea fo’i ma se tasi o tapua’iga e auai atu i ai lana tofa i le tele o taimi sa fa’atautaia fa’atasi ai ma nisi o alo o le atunu’u sa tautua ma alaalata’i i lea lava a’ai.

E le o maulalo le silasila a le susuga le Fa’afeagaiga ma le Ekalesia a Samoa i lea a’ai, aua e matele ina latou fa’atasi ma le afioga le Sui i Uosigitone i le 26 tausaga o lana auaunaga mo Amerika Samoa. Ua fa’alauiloa fa’alaua’itele fo’i lenei sauniga, ina ia mafai ona pa’au uma atu ai sui mamalu o le atunu’u o lo’o nonofo vavalalata i lea a’ai tele.

O le sauniga lenei ua fa’atautaia lua e le Ekalesia Kerisiano a Samoa i Uosigitone DC ma le Ofisa o le tatou Sui i le Konekeresi, Aumua Amata Coleman Radewagan.

“I le mamalu lautele o fanau a Samoa o lo’o i le vaega au o le a pa’au ane mo lea sauniga mamalu, ua talosagaina i latou uma e la’ei mai o latou toniga taualoa mo sauniga fa’apenei, ma o se toe fa’afetai lea e tatou te tiu ai mo le sui mamalu sa salue mo le tatou malo ma ona tagatanuu,” o se tasi lea o fa’asalalauga.

Pe a mae’a le sauniga mamalu, ua fuafua e faia se ‘aiga, ma o le ala lea o le vala’aulia fa’apitoa o nisi o sosaiete fa’afiafia o le a mafai ona pa’au ane mo le fa’amoemoe e auai i le sauniga ma lea talisuaga e mulimuli ane ai.

O le a leai se totogi mo le vaega fa’afiafia, peita’i, ua fa’aoo mai le emeli e fa’auia atu ai le talosaga e fia fa’afiafia: [email protected] poo le vala’au sa’o Maupua Pousima: 931-302-9871 - poo le vala’au fo’i Petelo Mareko 580-585-7788 e fa’aavanoa ai se taimi mo so outou sao i lea sauniga ma le ‘aiga mamalu.

Ua talosagaina le fa’amau lelei o le aso mo lea sauniga, ae o le a toe logo nisi suiga e tatau ona fa’ailoa atu mo lea sauniga, pe afai e alia’i nisi mea fou e ao ina fa’aofi i le sauniga, ae o le aso e le toe suia lava.