Talia Fofoga Fetalai le fautuaga a le tama’ita’i faipule ia Vui

Na taua i le saunoaga a le afioga i le ali’i Fofoga Fetalai ia Savali Talavou Ale, i le taimi o folafolaga a le maota o sui i le taeao ananafi, lona taliaina lea o le fautuaga sa tu’uina atu e le afioga i le tama’ita’i faipule ia Vui Florence Saulo, mo se avanoa e fa’asalalauina ai galuega a le maota o sui mo le fa’afofoga a le atunu’u.

Na taua e Vui i lana saunoaga e faapea, o le taua o le fa’asalalau o galuega fa’atino a le maota i luga o le televise ma leitio, ina ia mafai ai e le mamalu o le atunu’u o loo tapua’i mai i maota ma laoa ona latou silafia galuega uma o loo galulue ma fa’atino e faipule, ona e le o mafai e vaega fa’asalalau a le atunu’u ona fa’asalalau uma galuega o lo o fa’atinoina e afioga i sui mamalu.

Na fa’afetaia e Vui le galuega a le au fa’asalalau a le atunu’u o lo o fa’atinoina i aso ta’itasi, i le fa’ailoa lea i le atunu’u o galuega a le Fono Faitulafono, peita’i i le tulaga o lo o fa’atinoina ai e le au fa’asalalau a latou ripoti, e foliga mai e piki lava e latou mataupu e fa’asalalau, ma le mafai ai loa e tagata o le itumalo ona latou silafia galuega a le latou faipule o loo faia, ma tu’u fesili ai loa le to’atele o tagata poo galue lea faipule po o moe fo’i.

Sa ia fa’atula’i se fautuaga i le Fofoga Fetalai, e manaia tele ae fa’atulaga se Puletini a le maota o sui e lomia ai galuega ma mataupu uma sa talanoaina, ona alu lea o le faipule e tufatufa i lona itumalo, o se auala lelei fo’i lea e fesoasoani ai i le fa’atinoina o lo latou fa’amoemoe i tausaga ta’itasi.

Saunoa Vui e fa’apea, e le o se taumafai e faia ni auala fa’atosina, ae taua tele le silafia e tagata palota o galuega o lo o galue i ai le faipule i totonu o le maota.

Saunoa Savali e fa’apea, e le o se mataupu faigata le tulaga e pei ona talosagaina e le afioga ia Vui, o se mataupu fo’i ua tele tausaga o fa’asoa mai ai finagalo o ni isi o faipule mai nofoaiga e tele ua mavae atu, ae sa vaavaai ai pea i se auala e fa’ataunu’uina ai.

I lona talitonuga e pei ona saunoa Savali, o le a vaavaai loa i se auala e mafai ai ona fa’ataunu’u lea moemitiga, o le fa’asalalau tu’usa’o lea o galuega a le maota i luga o le televise ma le leitio.

Ae i le tulaga o lo o fa’atautaia ai e le au fa’asalalau a latou tusitusiga ma ripoti o lo o fa’asalalau i le atunu’u i aso ta’itasi, na saunoa Savali e fa’apea, o le matafaioi lava lena a le au fa’asalalau, ae afai ua le taua i fa’asalalauga lona suafa, o se tulaga lelei fo’i le talatalanoa i le au fa’asalalau i lea tulaga.

Na taua e ni isi o afioga faipule i le Samoa News i le mae’a ai o le tauaofiaga ananafi, le taua tele o le fautauga ua taoto i luma o le maota, ina ia fa’asalalau tauaofiaga a le Fono, aemaise lava i iloiloga o le paketi.

Saunoa se tasi o afioga i faipule e fa’apea, o iloiloga o le paketi a le malo mo le isi tausaga tupe i tausaga ta’itasi, o se tasi lea o mataupu e tatau lava i le atunu’u ona silafia ma fa’afofoga i ai, aemaise lava i tagata totogi lafoga, ina ia latou malamalama ai i auala o lo o fa’aaoga ai e le malo tupe o loo maua mai ia latou lafoga o loo totogi, aemaise ai fo’i tupe fesoasoani mai le feterale o lo o fa’atupeina ai atina’e tetele mo le malo ma le atunu’u atoa.