Tala otooto o Fa’amasinoga

LOIMATA MIKA

O le ali’i e 28 tausaga le matua lea na tu’uaia i lona ulufale fa’amalosi i totonu o le fale e mautotogi ai se tama’ita’i, ma ia aga’i atu ai i le potu o loo moe ai lea tama’ita’i ma taumafai e pa’i atu i lona tino, ua ia ta’utino i le fa’amasinoga e moni ma fa’amaoni tu’uaiga uma fa’asaga ia te ia.

O le mae’a ai ona fofogaina i luma o le fa’amasinoga o vaega uma o le maliliega lea ua sainia e le malo ma le ali’i o Loimata Mika i le vaiaso na te’a nei, na toe tolopo ai loa le fa’aauauina o lenei mataupu i le aso Faraile o le vaiaso nei, ina ua silafia e le fa’amasinoga o lo o i ai ni isi o vaega e tatau ona toe talanoa atili ai Mika ma lana loia, ina ia malamalama atili o ia i tuutuuga uma o le maliliega lea ua latou sainia ma le malo.

E 3 moliaga na ulua’i tu’uaia ai e le malo ia Mika, o ia moliaga e aofia ai le moliaga mamafa e tasi o le talepe fale i le tulaga muamua, atoa ai ma moliaga mama e lua o le fa’ao’olima i le tulaga tolu atoa ai ma le tu fua i le fanua poo le fale o le isi tagata e aunoa ma se fa’atanaga.

Ae i lalo o le maliliega lea ua sainia e Mika ma le malo, ua malie ai le ua molia e tali ioe i le moliaga muamua lea ua toe teuteu e le malo le mamafa, ina ia tali ioe ai i le moliaga o le fa’ao’olima i le tulaga lua.

O se tasi o tuutuuga o le maliliega, afai ae talia e le fa’amasinoga le tali ioe a Mika, ona talosaga loa lea o le malo i le fa’amasinoga e solofua loa moliaga o loo totoe ai i le pepa o tagi sa latou fa’aulu fa’asaga i le ua molia.

I le tali ioe ai la o Mika i le moliaga lea ua toe teuteu e le malo, sa ia ta’utino ai i luma o le fa’amasinoga maualuga i le aso Faraile na te’a nei e fa’apea, i se taimi o le masina o Aokuso o le tausaga na te’a nei i Amerika Samoa, na ia ulufale fa’amalosi ai i totonu o se fale e mautotogi ai ni tagata ma le fa’amoemoe na te fa’atinoina ai se solitulafono.

Na tautino atili Mika e fa’apea, i se taimi o le po o le aso 1 Aokuso o le tausaga na te’a nei, na ia ulufale fa’amalosi ai i totonu o se fale o se aiga e aunoa ma se fa’atanaga, ma ia aga’i atu ai i le potu moe o loo moe ai se tama’ita’i, ma ia pa’i atu i lona tino i se auala ina ia fa’amalie ai lagona tu’inanau o loo ia te ia.

Na ala i luga le tama’ita’i na a’afia ma ia iloa mai ai Mika i totonu o lona potu moe, ma ia ee ai ma fai i le ua molia e alu ese ma le fale, lea fo’i sa usitaia e le ua molia ma sola ese ai loa o ia i fafo.

Ua talosaga itu e lua i le fa’amasinoga ina ia fa’asala le ua molia i se fa’asalaga fa’anofovaavaaia, peita’i ua manatu le malo e pei o le talosaga ua tu’uina atu i le fa’amasinoga, a mae’a ona tuli e le ua molia se fa’asalaga fa’a falepuipui e tu’u atu e le fa’amasinoga, ona poloaina loa lea o ia e tuua le teritori ae toe fo’i atu i lona atunu’u na malaga mai ai mo le umi o loo totoe o lana fa’anofovaavaaia.

Na fesili le afioga i le fa’amasino sili ia Michael Kruse ia Mika pe sa i ai se tasi na taumafai e fa’afefe o ia ma ofo atu ni taui ia te ia ua mafua ai ona ia manatu e tali ioe i le moliaga o le talepe fale i le tulaga lua, ae na tali le ua molia, “ioe, e i ai le tagata sa fa’amalosia a’u ou te tali ioe”, ae ina ua fesili le fa’amasino sili ia Mika e ta’u atu le igoa o le tagata na fa’amalosia o ia e tali ioe, na tutu le ua molia ua leai sana tali.

Ua toe tolopo le fa’aauauina o le fofogaina lea o le maliliega i le va o Mika ma le malo i le aso Faraile nei, ae ua tu’u atu e le fa’amasinoga le avanoa i le ali’i ua molia ma lana loia la te toe talanoa atili ai e uiga i le maliliega.

ANDREA LOGOTAEAO

E 12 masina lea ua fa’anofovaavaaia ai e le fa’amasinoga fa’aitumalo le ali’i o Andrea Logotaeao, ina ua ta’usala o ia i le moliaga o le tu fua i le fanua o se isi aiga, atoa ai ma le moliaga o le fa’ao’olima i le tulaga tolu, i lalo o se maliliega sa latou sainia ma le malo ma talia e le fa’amasinoga.

O se vevesi na tula’i mai i le va o le aiga o Logotaeao ma le aiga tuaoi na a’afia, na mafua ai loa ona alu le ua molia i le fanua o le aiga o le latou tuaoi ma fa’ao’olima ai i se ali’i o le aiga.

Na fa’atoese le ua molia i le fa’amasinoga e tusa ai o lana solitulafono sa faia peita’i na fa’ailoa i ai e le afioga i le ali’i fa’amasino ia Fiti Sunia e fa’apea, e laki e leai se isi fa’alavelave e sili atu ona matuia e ono aafia ai lona ola na tula’i mai ina ua ia alu i le fanua o le aiga na a’afia ma fa’atupu vevesi ai.

O ni isi o tuutuuga o le nofovaavaaia a le ua molia, o le tausi lea o le filemu i le latou tuaoi, fa’asa ona ia toe soli se tulafono, auai i aoaoga e fesoasoani ai i le ita, ma ia totogi le salatupe e $125 i totonu o le ulua’i 90 aso o lana fa’anofovaavaaia.

FILISOUNU’U VAEGA

Ua molia nei e le malo le ali’i o Filisounu’u Vaega i le moliaga mamafa o le ave ta’avale ao se’i lona laisene, e mafua mai  le fa’alavelave lea na maua ai o ia o loo ia fa’afoeina se ta’avale i luga o le auala o le malo i Tafuna i le vaiaso na te’a nei ae o loo se’i e le fa’amasinoga lona laisene mo le 12 masina, ina ua ta’usala o ia i le moliaga o le ave ta’avale ‘ona i le tausaga na te’a nei.

Na avea le fa’atinoina e Vaega o se solitulafono tau ta’avale afi i luga o le alatele ma itu na taofia ai loa e Leoleo lana ta’avale, ae ina ua su’esu’eina o ia i lona laisene, na maua ai e Leoleo o lo o se’i e le fa’amasinoga le laisene ave ta’avale a le ua molia.

O le moliaga o le ave ta’avale a’o se’i le laisene, e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, ae fa’amalosia ai le tuliina o aso e 90 i le falepuipui pe afai ae fa’amaonia e le fa’amasinoga lenei solitulafono.