Mana’omia se auala foia ai fa’afitauli o fualaau fa’asaina i AS

O se tasi o fautuaga sa tu’uina atu e afioga i Faipule o le maota o sui i le vaiaso na te’a nei, ina ua latou fesiligia agava’a o le afioga a Samana Semo Ve’ave’a, e pei ona tofia ai o ia e avea ma Fa’atonusili o le Matagaluega o le Puipuiga o le Saogalemu Faalotoifale a le atunu’u, o le taumafai lea e saili ni auala e foia ai le fa’afitauli o fualaau fa’asaina i Amerika Samoa.

Saunoa le afioga i le tama’ita’i Faipule ia Vui Florence Saulo e faapea, sa i ai se pili na fuafua le Fono e fa’aulu i tausaga ua mavae, mo le fa’atulagaina lea o ni suega i vaega fa’amalosi tulafono ina ia mautinoa latou te le o tagofia fualaau fa’asaina, peita’i ua toe taoto lea tulafono, peita’i i lona talitonuga, o se tulafono taua tele lea tulafono mo tagata faigaluega o le malo.

O se tasi o fa’afitauli na taua e sui o le malo sa molimau i le taimi na talanoaina ai le pili e pei ona taua e le afioga a Vui, o le leai lea o se vaega tupe e fa’atupe ai lenei fa’amoemoe pe afai ae pasia ma avea ma tulafono.

Na fesili Vui i le afioga a Samana pe maua e lona Ofisa se vaega tupe e fesoasoani ai i le fa’atupeina o lenei tautua, pe afai ae toe fa’aulu se isi tulafono i le lumana’i, ae na saunoa le Fa’atonusili, e le o i ai se vaega tupe i le taimi nei, ae mafai ona galulue ai lona Ofisa e tau saili mai se vaega tupe mai le feterale e fa’atupe ai lea fuafuaga.

Saunoa le afioga i le ali’i faipule ia Vailiuama S. Leasiolagi e faapea, o se tasi o fa’afitauli e pei ona maua e le maota o sui i le taimi o le iloiloga a le Loia Fautua mo Tagata Lautele, o le to’atele o tagata o loo tuli a latou fa’asalaga fa’a falepuipui i le taimi nei, e mafua mai ina ua ta’usala i latou i le moliaga o le umia fa’asolitulafono o fualaau fa’asaina.

“O le mea moni lava e pei ona manino i le molimau a le ali’i loia fautua, o le tagofia o fualaau fa’asaina e le o se fa’afitauli ae o le fa’ama’i, ma e tatau i le malo ona saili auala e foia ai lenei fa’ama’i mai le sosolo pea ma a’afia ai tupulaga talavou i le atunu’u”, o le saunoaga lea a Vailiuama, lea fo’i na lagolagoina e ni isi o afioga i Faipule o le maota.

Saunoa le afioga a Vailoata E. Amituana’i e fa’apea, o le tulaga e pei ona maua e le maota o sui mai iloiloga ua mae’a atu, aemaise lava i le iloiloga a le Komesina o Leoleo, o loo masalomia le i ai o ni isi o tagata faigaluega a le malo o loo galulue i le vaega fa’amalosi tulafono e aofia ai ma Leoleo, o loo a’afia i latou i le tagofia o fualaau fa’asaina.

Saunoa le afioga i le ali’i faipule ia Sam Ioka Meleisea e fa’apea, na pau le auala e mafai ai ona foia lenei fa’afitauli, o le galulue fa’atasi lea o le Matagaluega o Leoleo ma le Puipuiga o le Saogalemu Lotoifale, i le faatula’iina lea o se Vaega Faapitoa a Leoleo latou te taulimaina lenei fa’afitauli.

O fautuaga e pei ona tu’uina atu e afioga i Senatoa ma Faipule i le taimi na latou fesiligia ai le Komesina o Leoleo, tofa Le’i Sonny Thompson, o le faia lea o se auala e aveese ai Leoleo o loo masalomia lo latou tagofia o fualaau fa’asaina.

Saunoa atili Senatoa ma Faipule e fa’apea, o le isi lea mafuaaga ua faigata ai ona taofia le fa’atupulaia o le faafitauli o fualaau fa’asaina i le atunu’u, ona o loo to’atele Leoleo o loo masalomia le aafia ai i le fa’atinoina o nei gaioiga faasolitulafono.