Silia $400,000 na le maua DBAS ina ua taofia tupe tului o nonogatupe

E tusa ma le $400,000 se vaega tupe a le Faletupe o Atina’e a le malo o Amerika Samoa (DBAS) ua le toe maua, ina ua taofia le totogiina lea e ni isi o le atunuu o tupe tului mai a latou nonogatupe i se taimi o le 2010.

E eseese uma lava mataupu na fesiligia ai e afioga i Senatoa le peresetene o le Faletupe o Atina’e, Ruth Matagi-Fa’atili, i le taimi o lana iloiloga i le vaiaso na te’a nei, ina ua toe filifilia o ia e le afioga i le ali’i kovana ia Lolo Matalasi Moliga e toe avea ma peresetene o le Faletupe o Atina’e.

O le mae’a ai o le iloiloga a le Komiti o le Sailiga o le Tamaoaiga o le malo, lea e ta’ita’ifono ai le afioga i le ali’i senatoa ia Galea’i M. Tu’ufuli, ae na fa’atautaia e le afioga i le ali’i senatoa ia Nuanuaolefeagaiga S. Nua ina ua le fa’atasi atu le afioga ia Galea’i, na pasia ai loa e le maota maualuga le suafa o Matagi-Fa’atili i le palota fulisia e 16-0.

Ina ua fesiligia e le afioga i le ali’i senatoa ia Paepae Faiai le molimau pe fia se vaega tupe a le malo ua le maua  ina ua taofia le toe totogiina o tupe tului o ni isi o nonoga tupe a tagata o le atunu’u, na saunoa ai le molimau e fa’apea “e $400,000”.

Na fesili le afioga i le ali’i senatoa ia Magalei Logovi’i i le molimau ina ia fa’amanino i luma o le maota le mataupu e fa’atatau i nonogatupe ia ua taofia le toe totogiina o tupe tuli, pe fa’afefea ona totogi, ae na fa’amanino e le molimau e fa’apea, o nonogatupe ia ua taua i a latou fa’amaumauga o nonotupe ua aveese, e le toe totogiina e le tagata e ana le nonogatupe le tupe tului, se’i vagana ai le aofa’i o le tupe lea o loo nofo aitalafu ai i le faletupe e tatau ona toe totogi.

E na o le tausaga lava e 2010 na mafai ai ona faia le gaioiga e fa’atatau i nonogatupe e taofia le toe totogiina o tupe tului e pei ona taua e le molimau, ae talu mai le taimi atoa sa avea ai o ia ma peresetene o le Faletupe, e leai ni nonogatupe na ia faia i ai lea tulaga.

O ni isi o mataupu sa fesiligia e afioga i Senatoa, o le nonogatupe a le kamupani va’alele a le Tausani, aemaise ai o fale sa fausia mai i nonogatupe o le polokalame o le ‘1602’, lea e oo mai lava i le taimi nei e le o mafai ona nofoia le tele o ia fale, ona o tuutuuga o loo aiaia ai ituaiga tagata e mafai ona nonofo mautotogi ai.

Saunoa Tuaolo M. Fruean e faapea, e tatau ona toe faia se feutanaiga i le va o le Faletupe o Atina’e ma le ofisa o le feterale o loo fa’atupeina maia i lenei polokalame, ina ia toe faia se teuteuga i aiaiga mo ituaiga tagata e mafai ona nonofo i fale nei, ona ua faigata ona maua ni tagata e nonofo i fale ua mae’a ona fausia, ma fa’a faigata ai i nai tagata e ana fale ona totogi a latou nonogatupe.

Saunoa atili Tuaolo e fa’apea, o se tasi o itu lelei e tatau ona oo i ai feutanaiga pe afai ae faia, o le vaavaai lea i tagata o loo galulue fa’akonekarate i lalo o le malo, ina ia mafai ona nonofo i fale nei i se tau talafeagai, ina ia mafai ai ona maua e nai tagata e ana fale se vaega tupe e fesoasoani ai i le toe totogiina o a latou nonogatupe.

Na fesili le afioga i le ali’i senatoa ia Satele Galu Satele i le molimau, pe fa’amaonia tala o loo pisapisao ai le atunu’u, fai mai e tele nonogatupe ua fa’amagalo, ae na tali le molimau e fa’apea, “e leai ni nonogatupe ua toe fa’amagalo”.

Na fa’ailoa e le to’atele o senatoa i le molimau le talafeagai o ona agava’a e mafai ai ona toe filifilia o ia e avea ma ta’ita’i o le faletupe o atina’e a le atunu’u.

“O le fautuaga, ia fai lau galuega ma le fa’amaoni ma ia e alofa i le atunu’u, aua ne’i fa’amuamua tagata e te masani ai, a ia fai le amiotonu ina ia mautinoa e agava’a uma i latou e tatau ona agava’a mo nonogatupe, e fesoasoani ai i le atina’eina o aiga,” o fautuaga ia a le senate.