Talosaga Senatoa ina ia ave fa’amuamua aufai faatoaga atunu’u

Na fautuaina e ni isi o afioga i Senatoa i le taeao nei le Faatonusili o le Ofisa e Pulea Oloa a le malo, susuga i le tama’ita’i foma’i ia Dr. Oreta Mapu-Crichton e ave le fa’amuamua i le aufai fa’atoaga a le atunu’u mo le sapalaiina o taumafa i le polokalame o taumafa a le Ofisa o Aoga a le malo (School Lunch Program), nai lo le ave o le fa’amuamua i le aufai fa’atoaga Asia ua tele ina latou fao avanoa sa tatau ona aua e tagata fai fa’atoaga a le atunu’u.

I le fa’aiuga lava o le iloiloga a le Komiti o le Fa’agaioiga o le malo e fa’amaonia ai tofiga a le kovana mo Dr. Mapu Crichton, na fesiligia ai loa e ni isi o senatoa le mataupu e fa’atatau i tauofoga a le aufai fa’atoaga mo polokalame o le School Lunch.

Saunoa le afioga i le ali’i senatoa ia Magalei Logovi’i e fa’apea, o suiga ua faia i tauofoga mo le polokalame, ua mafua ai ona toatele le aufai fa’atoaga a le atunu’u ua latou le toe mauaina le avanoa latou te sapalaiina ai meaai mo le fanau aoga, ma ua misi ai fo’i le vaega tupe sa masani ona latou maua i tausaga ua mavae.

“Afai e te silasila i aso Toona’i uma lava i le maketi i Fagatogo fa’apea ai tafatafa o le alatele a le malo, ua matua fa’atumulia i le aufai fa’atoaga a le atunu’u, ua fa’atau ai fa’i ma talo ma isi lava fua o fa’aeleeleaga, e mafua mai ina ua latou le toe maua le avanoa e sapalai ai taumafa mo le School Lunch, o le fa’afitauli lena ua maitauina, ona o le tele o avanoa ua ave uma e le aufai fa’atoaga mai Asia lea o loo totoina fa’atoaga togalaau’aina”, o le saunoaga lea a Magalei.

“O le talosaga i lau afioga i le tama’ita’i fa’atonusili, ia toe silasila toto’a i avanoa mo le aufai fa’atoaga a le atunu’u, pau lea o le auala e maua ai sina seleni e tausi ai aiga ma fanau, ae afai ua le toe maua e i latou le avanoa e sapalai ai fa’i ma taro mo le School Lunch, ua leai fo’i se tupe latou te maua e tausi ai aiga”.

Na taua e le afioga i le tama’ita’i senatoa ia Fonoti Tafa’ifa Aufata lona le fiafia i le tulaga lea ua maitauina i le taimi nei, o le ave uma lea e le aufai fa’atoaga mai Asia avanoa sa tatau ona maua e le aufai fa’atoaga a le atunu’u, ae mafua uma nei fa’aletonu ona o suiga ua faia e le Ofisa o Oloa a le malo, e ala i le fa’ataulaga ofo lea o tagata e sapalaiina taumafa mo fanau aoga.

“O fa’atoaga na fa’amanuia mai ai le Atua ia Samoa, o lo tatou tofi lea sa tu’uina mai i aso ua mavae tatou te galulue ai, e tausi ai aiga ma atina’e ai le malo, ae foliga mai o lea o loo galulue ni isi o tatou tagata e fa’aauau lea galuega, ae ua ave e le malo le avanoa i tagata fai fa’atoaga mai isi atunu’u e pei o Asia latou te mauaina avanoa ma maua tupe, ae pagatia ai o tatou tagata”, o le saunoaga lea a Fonoti, ma ia fautuaina ai Dr. Mapu-Crichton ina ia ave le fa’amuamua i le aufai fa’atoaga a le atunu’u.

Na fa’amanino e le tama’ita’i fa’atonusili e fa’apea, o le tausaga e 2015 na fa’atoa tuu mai ai e le Ofisa o Fa’atoaga a le malo tele o loo auala mai ai le tupe lea e fa’atupe ai le polokalame o le School Lunch (USDA), ta’iala fou ma suiga i auala e fa’atautaia ai le polokalame, e ala i le faia lea o tauofoga ina ia mafai ai ona iloa tonu tagata fai fa’atoaga e agava’a i le polokalame.

O le tulaga i tauofoga e pei ona taua e le fa’atonusili, e fa’ailoa ai e le tagata fai fa’atoaga lona suafa, o ituaiga fua o fa’aeleeleaga e mafai ona ia sapalai, o le aofa’i o pauna na te gafatia atoa ai ma le tau o loo ia manatu e fa’atau atu ai i le malo, ona iloilo loa lea e le Komiti o talosaga uma ma fa’alauiloa ai loa tagata ua fa’amanuiaina.

Na teena e le tama’ita’i fa’atonu ni isi o fa’asea e fa’apea, o lona Ofisa lea o loo fa’asoasoaina mai pauna ma le tau mo le tagata fai fa’atoaga e manumalo, ae o tulaga uma ia e pulea uma e le Ofisa o Fa’atoaga.

“Pau le vaega a lo’u Ofisa e fai o le fa’ataunuuina lea o le tauofoga e pei ona faatonuina mai e le USDA, ae o isi tulaga uma e fa’atino uma lava e le Ofisa o Fa’atoaga a le atunu’u”, o le saunoaga lea a le tama’ita’i fa’atonu.

Ae na toe saunoa Magalei e fa’apea, o tulafono ma ta’iala ia o loo naunau le Ofisa o le USDA e fa’amalosia, e fa’apitoa mo le aufai fa’atoaga faipisinisi i fafo, ma e le tau apalaiina i Amerika Samoa tulafono ia, aua e leai ni aufai fa’atoaga faipisinisi i le atunu’u, se’i vagana ai lava tagata fai fa’atoaga ta’ito’atasi o loo atina’e lava e ia lana fa’atoaga e tua i ai le aiga.

Na fautua Magalei i le tama’ita’i fa’atonusili ina toe silasila lelei i tulafono e pei ona fa’amalosia mai e le feterale, ma ia faia fo’i ni a latou aiaiga ma le feterale ina ia fa’aagafua ai le fa’amalosia o tulafono nei, ae tatala le avanoa i le aufai fa’atoaga e sapalai ai a latou fa’atoaga i le School Lunch.

O fautuaga fo’i ia sa tu’uina atu e le maota o sui i le taimi o le iloiloga a le tama’ita’i fa’atou ia Dr. Mapu-Crichton i le vaiaso na te’a nei, sa latou fautuaina fo’i o ia ina ia ave le fa’amuamua i le aufai fa’atoaga a le atunu’u ina ia ola ma manuia.