Tele lu’itau fetaia’i ma le Fa’atonusili fou o le Ofisa o Aoga

O le ulua’i fonotaga a le Fa’atonusili fou o le Matagaluega o Aoga a le malo, ma Pule aoga o aoga tulaga muamua fa’apea aoga maualuluga i le atunu’u, atoa ai ma ni isi o sui sinia o le matagaluega i le amataga o le vaiaso nei, na molimauina ai le tele o lu’itau o loo fetaia’i pea ma le Ofisa o Aoga a le malo, aemaise lava fo’i mo le latou Fa’atonusili fou lea fa’atoa tofia e fai ma ta’ita’i mo le isi 4 tausaga o loo lumana’i nei.

O ni isi o ia lu’itau e pei ona taua i se pepa o fa’amatalaga sa tufatufaina mai i le vaega o tusitala a le atunu’u, e aofia ai le taumafai ina ia si’itia tulaga o togi o fanau aoga i le mataupu o le Numera, lea o loo molimauina le pau maualalo talu mai le 2 tausaga talu ai, aemaise ai o le taumafai ina ia s’itia tulaga o le galulue fa’atasi o matua ma faiaoga ina ia fa’aleleia tulaga o aoaoga a fanau.

Na taua le auai uma o Puleaoga ma sui sinia o le Matagaluega o Aoga i lenei fonotaga, lea sa ta’ita’ia e le tama’ita’i foma’i ia Dr. Ruth Matagi-Tofiga, ma maua ai loa le avanoa latou te fetufaa’i ai i le taua o le i ai lea o se sini e taula’i i ai galuega fa’atasi a i latou uma ua avea ma ta’ita’i mo le lumana’i, atoa ai ma le fautuaga ina ia ave le fa’amuamua i le fa’atinoina o auala e ausia ai le sini ua fa’atulaga, o le a’oa’oina lea o fanau ina ia manuia.

I le taimi o le fonotaga, sa tu’uina atu ai e sui sinia o le Ofisa o Aoga fa’aiuga o suega a fanau aoga i le Vaega 3 ai le mataupu o le Faitau Tusi ma le Numera, lea na fa’ailoa mai ai, o le to’atele o fanau aoga o loo i ai pea lava i latou i le tulaga maualalo o togi o loo maua.

“O le anava tau lea ua fa’atula’i e le Ofisa o Aoga, ia fai se suiga lelei mo fanau aoga, ma ua fa’atula’i fo’i polokalame pe a tuua le aoga mo ni isi o aoga ina ia mafai ai ona maua se fesoasoani mo fanau aoga”, o se vaega lea o le pepa o faamatalaga sa tu’uina mai i le Ofisa o le Tama’ita’i Fa’atonusil o Aoga.

O polokalame o le a faia pe a tuua le aoga, o le toe fa’aauauina lea o lesona sa a’oa’oina i totonu o le potu aoga, ma fa’aauau ai le fesootaiga i le va o le faiaoga ma fanau aoga i le talanoaina o mataupu eseese o loo moomia ai le fesoasoani.

O isi mataupu sa talanoaina i lea fonotaga e aofia lesona o loo fa’atulaga e faiaoga mo fanau aoga, o le le auai o faiaoga i totonu o potu aoga, o le leai lea o se galulue fa’atasi i le va o matua ma faiaoga, atoa ai ma su’ega eseese mo fanau aoga.

Na fa’afetaia e le tama’ita’i fa’atonu ta’ita’i uma o le matagaluega sa auai i le ulua’i fonotaga, ma ia unaia ai i latou ina ia fa’aauau pea le galulue fa’atasi ina ia mafai ai ona faia suiga lelei mo fanau aoga.