Lagomau Iosefa Elia i lona aiga i Aasu

“O Ieova o lo’u leoleo mamoe o ia, e leai se mea ou te mativa ai, na te taitai ia te au i tafatafa o vaitafe lemu, na te fa’afo’isia mai lou agaga, na te ta’ita’i ia te a’u i ala o le amiotonu ona o lona suafa.”

O upu tomua ia o le polokalama fa’asolo o toe sauniga o le susuga Iosefa Elia, e 26 tausaga o lona matua, peita’i o se tasi na mua’i maliu lava o i latou e to’atolu ua masoe nei i le malaga a le maliu ma le oti, talu le fa’alavelave tau eletise na a’afia ai i latou a’o fa’atino tiute i galuega i le Manu’a Store i Tafuna Industrial Park.

O lona ulula’i sauniga sa fa’atautaia lea i le afiafi o le aso Faraile na te’a nei, sa fa’atautaia lea sauniga ina ia mafai ona molimauina e le to’atele le soifua o lenei atali’i, po’o le tama fo’i o lona aiga, i le latou mafutaga i le olaga nei.

Ae o lona toe sauniga i le aso ananafi i le Ekalesia Katoliko Roma i Aasu, o lana Ekalesia sa tautua ai ma lona to’alua ma le aiga o lona faletua i Aasu. Ua iloga lana tautua matavela, e ui ina e le’i umi ni tausaga o le mafutaga, aua sa fa’aipoipo i la’ua ia Me 28, 2014.

O ona toe sauniga sa ta’ita’ia e le Afioga Patele Kolio Etuale Tumanuvao ae fesoasoani i ai le Ituaiga Sa ma Tiakono filifilia o lea lava Matagaluega. O pese ma vi’iga o le sauniga mamalu, sa peseina lava e lana aufaipese i Aasu.

Sa matua fa’atumuina le malumalu i le to’atele o uo mamae a lenei atali’i, e afua mai lana aoga i Fagaitua High lea sa fa’au’u i le tausaga e 2009, e oo mai i lana aufaigaluega i le Manu’a, ae maise o e lava sa maua le avanoa, o nisi e masani lelei ai o ia i lona fo’i soifua talavou, le pa’ia o aiga i ona itu tetele ma ona itu taulagi, ae tainane fo’i o uo ma aiga o lona faletua, Leeann Jo Lam Yuen Elia.

Mai molimau o le sauniga o Iosefa, sa faafofogaina ai le molimau a le sa la’ua osi feagaiga. Na fa’ailoa ai e Leeann Jo, “O Iosefa o se tagata e tautua e leai se leo. E matua taumafai lava o ia i se mea sili e nate mafaia pe a oo ina fa’atonuina i se mea, e na e le fa’avasegaina fo’i pe talituaupua se fa’atonuga mai ou matua, poo ona matua foi.”

Na maligi loimata o le tina ma ia fa’ailoa mai le alofa o Iosefa ia te ia. “O Iosefa o se tama e alofa tele ia te a’u, poo le a se mea ou te mana’o ai, e le fo’i e taumafai lava ia maua. E soifua fo’i o ia i se olaga taumafai e atina’e le ma aiga. E manatu ina ia mafai ona ma’ua tausia ona matua ma lo’u aiga fo’i. Fa’afetai i le Atua mo le tama sa ia foai mai e ma te osi feagaiga, ma sa ou tua i ai i mea ou te manatu ai i lo’u aiga.”

Na ia fa’ailoa fo’i, “O le tautua a Iosefa e le fai mea pa’o, ou te misia o ia, ae o se mea sa sili ona momo’o i ai lona loto, o le aso o le a ma’ua va’aia ai le ma’ua atali’i, peita’i, ua tau lau o lona fa’amoemoe. Ou te fa’afetai i le Atua, o lenei ua alu Iosefa, ae ua mafai ona i ai se isi e suitulaga mai ia te ia i lenei olaga, pe a pule alofa le Atua, ae tupu ma ola lenei atali’i mo ma’ua.”

O le molimau ola a le tina o Suimoana Elia mai Aua, le tina lea o Iosefa, sa fa’ailoa patino ai, “O Iosefa o se tama ua iloga lona fai matua, e tusa lava poo le a se faigata o le tausiga o i matou fa’apea ma lona aiga, ae matou te va’ai mai lava, ua alu atu Leeann Jo e molita’i atu se matou tupe mai ia te ia i lona totogi. Faafetai Iosefa le alofa ma le tausi matua.”

“Ao fa’ato’a mai’ea aoga a Iosefa i Fagaitua, sa ia mua’i saili ma faigaluega ai i le Paramount Builders, e tusa pe tolu tausaga o faigaluega ai, ae fa’alogo loa ua amata na fai mai e faigata le galuega, ae sili pe a toe saili se isi ana galuega.”

“I le vaitaimi o tausaili le galuega, ae soso’o loa ma le sau ua fa’ailoa mai, o ia o le a amata lona aiga, ma maua ane ai loa lana galuega lenei i le Manu’a. E ui ina e to’atele uso ma tuafafine o Iosefa aua e to’a 12 i latou uma fa’atasi, ae na amata lava le aiga o Iosefa ma noto ai loa i Aasu.”

“Na talatala fo’i si tina i le faigata ona tau saili o aoga e aoaoina ai Iosefa aua sa soifua a’e o ia i Samoa, peita’i, e le’i fiu ai i la’ua, ina ia mafai e Iosefa ona tausia lona lumana’i. Fa’afetai i le Atua mo le atali’i, aua o se tasi e agaalofa tele ia i la’ua matua ma le fanau.”

Ina ua mae’a le sauniga sa toe fa’o’o lona tino i le faletalimalo o le aiga i Aasu ma fa’ao’o ai o ia i lona aiga e lagomau ai.

O Iosefa na soifua mai ia Iulai 24, 1990. Aoaoina i Aua Elementary ma soso’o ai i le ulufale i le Fagaitua High ma fa’au’u ai i le tausaga 2009. E ui i fita na savalia mai e Iosefa i lona soifua a’oa’oina, ae na matua taumafai atili matua ia uma lava lona tusi pasi e saili ai sana galuega, ma ua fa’apea fo’i ona amatalia ai si ona aiga