Manumalo le aufusu a Amerika Samoa i pine e 4

Ua toe fo’i manuia mai le ‘aufusu a le atunu’u lea na tausinio i le Ta’amilosaga Fa’avaomalo a le Pasefika sa faia i Samoa i le vaiaso na te’a nei, ina ua latou mauaina pine auro e 2 fa’apea ai ma pine apamemea e lua.

O pine auro e 2 mo Amerika Samoa na maua lea e le ali’i o Jefferey Tago, lea sa tausinio i le aupaga o le 81kg, ma Kaisa Ioane, lea na tausinio i le aupaga o le 69kg.

Ae o pine apamemea na maua lea e le ali’i o Falaniko Tauta, lea a tausinio i le aupaga o le 65kg, ma le susuga a George Tanoa Jr, lea na tausino i le aupaga o le 79kg.

Ao lei tuua e le aufusu le atunu’u mo lenei fa’amoemoe, na taua e le Faiaoga o le ‘au ia Sala Sanele Etuale le faigata o le ta’amilosaga o lenei ta’amilosaga, ona o lo o aofia ai tama fusu lelei ma Niu Sila, Ausetalia, Fiti, Tonga ma Samoa, peita’i e i ai lona talitonuga ua lava tapena le ‘au a le atunu’u mo lenei fa’amoemoe.

Ae ina ua fa’amanuiaina le ‘aufusu a le atunu’u, na taua ai e le Ta’ita’i Malaga, o ia fo’i lea o le Sui Peresetene o le Asosi o Fusuaga a Amerika Samoa (American Samoa Amateur Boxing Federation) ia O. T Malala le mataina o le tulaga sa i ai taumafaiga a le ‘aufusu a le atunu’u i lenei ta’amilosaga.

“O se tulaga mataina sa i ai taumafaiga a le ‘aufusu a le atunu’u i le ta’amilosaga sa faia i Samoa, e ui i le to’atele o isi ali’i fusu lelei mai atunuu tetele o le Pasefika sa auai i lenei fa’amoemoe, ae sa matua iloga lava fo’i ona maualuga taumafaiga a alo o le atunu’u sa malaga atu e tausinio i lenei ta’amilosaga, lea ua fa’amanuiaina la tatou ‘aufusu i pine e 4”, o le saunoaga lea a Malala i se fa’atalatalanoaga ma le Samoa News i le aso Sa na te’a nei.

E pei ona silafia e le atunu’u, sa fa’amanuiaina fo’i le ‘aufusu a le atunu’u sa auina atu i ta’aloga o le Samoa Games i Samoa i le masina o Tesema na te’a nei, ina ua taliu mai ma pine e 9, lea e aofia ai pine auro e 3, pine siliva e 2 ma pine apamemea e 4.

O le mae’a ai o le ta’amilosaga Fa’avaomalo sa faia i Samoa, lea na fa’atautaia e le Asosi o Tama Tuai a Malisi Sagato Iosefo, ua sauni atu ai loa le ‘aufusu mo ana tapenaga mo le ta’amilosaga a le Oceania i le masina fou.

E le o mautu mai i le taimi nei poo fea le atunu’u e talimalo i le ta’amilosaga a le Oceania, ae o loo i ai le fa’anaunauga e ono manumalo le talosaga a Samoa mo le fa’ataunuuina ai o lenei ta’amilosaga.

Na fa’afetaia e le susuga a Malala le tapuaiga a aiga ma le atunu’u, aemaise ai lava le fa’afetai fa’apitoa i le susuga ia Frank Gaisoa ma le Kamupani a le Tautua Mo Oe (TMO), lea na fesoasoani malosi i le fa’atupeina o le malaga atoa a le ‘aufusu mo Samoa ma le toe fo’i mai.