Tala i Vaifanua

PEPA FA’AMONIA PILI AI AFIFI I LE FALEMELI I FAGATOGO

I le faitoto’a o le falemeli i Fagatogo o loo fa’apipi’i ai le Fa’ailo ua fa’ailoa atu ai i le mamalu lautele, ina ia taua’ao mai lou pepa fa’amaonia, ID poo le passport e mafai ai ona taua’ao ia te oe au afifi.

Ina ua fesiligia se tasi o sui e faigaluega o le falemeli, poo o le a le taimi e mo’omia ai lou ID mo le pikia o meli, ae fa’ailoa mai, “O meli uma lava ma fa’amomoli ma afifi e tatau ona piki mai tua, e ao ina taua’aoina lou ID. Ona o tulaga ua mae’a fofogaina ai le atunu’u, talu ai fo’i o meli ua fa’amomoli mai i tagata, ae ua te’ena e i latou lo latou silafia o i latou na meli mai ai.”

“O lo ua fa’amamaluina nei lea tulafono a le feterale e fa’atautaia ai le taulimaina o meli puipuia ma fa’amomoli ua tusia mai ai suafa o i latou e ona afifi. O le sui lava fo’i lea e tatau ona tala a’ao mai e avatu lana afifi poo le meli puipuia,” o se tala lea mai le sui o le falemeli.

ASO O MANAMEA - LAE’I MUMU

O le aso Lua o lenei vaiaso ua fa’asino o le aso mo Manamea. O lona uiga, e ao i so’o se pa’aga ona fa’ailoa lona alofa naunauta’i i lana manamea i lea aso. Ma o lea ua fesoasoani le vasega o pisinisi ta’itasi e fa’afaigofie ia te oe lea tulaga.

O le faletalimalo a le Airport Inn i Petesa ua latou ofo le lua po ma lau manamea i le na’o le $180/ Ua ofo mai fo’i le pa’u fa’apitoa a le Vai’s Florist i Nuuuli, ina ia maua se fa’apo po’o se sei a’o se fuarosa mo le tama’ita’i o lo’o avaga i ai lou loto.

E le o fa’avaivai fo’i le fa’aoso o le pa’u a le Tradewinds Hotel mo lea vaitau o le fa’ailoa atu o lou alofa naunau i lau manamea.

E ese mai lea ua oso mai fo’i le Neils Ace Home Care i a latou pa’u faapitoa, ae maise foi le McDonalds ua fa’ailoa le latou pa’u e a’ai uma ai le aiga i le $23. Ae tatau la ona tausami muamua le malu taeao i le fale’aiga a le Carl’s Junior lea e seki mai le Breakfast menu.

Ua ofoina fo’i pa’u a kamupani telefoni a le ASTCA ma le Bluesky.

Afai e leai se manamea, aua le fa’anoanoa, e mafai lava e oe na e alu e totogi si ou potu moe fa’alelei ai, tausami fa’alelei i ‘aiga uma o le aso, ae toe fa’atau ma sau teu rosa mumu, fa’atu i luga o lau laulau, ia ae tau ai le faaupuga, “Mai le Fatu Samasama, Mai Soo se Alaalafaga!”

TA’ALOGA SOFTBALL FAGAITUA VS NU’UULI VOC-TECH

I le ta’aloga faitaulia o le liki Softball a tama’ita’i aoga maualuluga lea e fa’agasolo nei, sa manatu tagata sa maimoaina lea ta’aloga fita, o le Vikings lava e malaga ma le manumalo i Fagaitua. Peita’i, sa umi se taimi sa tele ai fa’atini a le Vikings, ma na fa’ato’ato’a atu lava tamaita’i o Matata Eseese.

O ta’aloga nei o lo’o fa’atautaia i afiafi o aso Lua ma aso Tofi o vaiaso ta’itasi pe a tu’ua aoga.

Ona o lea fo’i aoauli sa fa’atimutimu, o lea sa fa’apea e leai ni ta’aloga e faia, ae ina ua toe maua mai le laofie, sa fa’aoso loa le ta’aloga i le va o Fagaitua ma le Nuuuli Voc Tech.

I le toe tataga, sa tutusa ‘ai ina ua maua atu lava e VocTech ‘ai o le Vikings sa i ai, ma tula’i mai i le ta’i 5. Manatu Fagaitua o le a lelei se latou taumafaiga i le tataga mulimuli, peita’i, e ese le mea na tula’i mai i le tataga lea. O le fa’ate’a a le tama’ita’i a VocTech, na matua uma ai avanoa o Fagaitua, ma na le maua se latou fatini i lea tataga, ae oo mai Voc Tech maua le latou fa’atini e tasi, ma ua silia ai latou ‘ai e 6 i le na’o le 5 Fagaitua.

O ta’aloga nei a a’oga, ua fa’atautaia le liki Soka ma le Softball, ae o tama o lo’o fa’atautaia le liki basketball. O afiafi o aso Lua, Aso Tofi ma aso Toonai lea e fa’atautaia ai ta’aloga Basketball  a tama, ae o tama’ita’i lea e fa’atautaia latou ta’aloga Softball i le Malae Tony Solaita i Tafuna. O ta’aloga soka o lo’o faia i le malae soka i Pago Pago i afiafi o aso Gafa, aso Lulu ma aso Toonai.