Lagolago Kovana ulua’i suiga ua faia e le Komesina fou o Leoeo

Ua fa’aalia e le afioga i le ali’i Kovana ia Lolo Matalasi Moliga i sana tusi i le aso 8 Ianuari 2017, lona lagolagoina atoatoa o ulua’i suiga ua faia e le Komesina o le Matagaluega o le Puipuiga o le Saogalemu Lautele, tofa Le’i Sonny Thompson.

O suiga e pei ona fa’alauiloa e le tofa Le’i i sana tusi i le aso 7 Fepuari, ua ia filifilia ai le Ta’ita’i o le Vaega o Leoleo Su’esu’e (CID), afioga Falana’ipupu Cmdr. Ta’ase Sagapolutele e avea ma Sui Komesina o le vaega o Leoleo, le tulaga sa tauave mai e le susuga a Vaimaga Maiava.

O le tofiga ai o le afioga a Falana’ipupu na te tauaveina le tulaga o le Sui Komesina, ua tofia ai loa Maiava e avea ma Sui Komesina mo le Vaega e Lagolagoina Gaioiga a le Matagaluega (Administrative Support Bureau).

O le tofa a Va’aomala K. Sunia lea sa avea ma Ta’ita’i Leoleo, ua tofia nei o ia e avea ma Faufautua Faapitoa mo le Komesina o Leoleo.

Na taua e le tofa Le’i i sana tusi sa tu’uina atu i vaega eseese uma o le Matagaluega o Leoleo, le mana’omia o le galulue fa’atasi mo le manuia o le auaunaga a le matagaluega i le atunu’u, aemaise ai o le tu’uina atu lea o le latou lagolago i suiga ua ia faia.

Na taua e le afioga i le ali’i Kovana ia Lolo lona taulimaina o suiga a le Komesina, atoa ai ma lona lagolagoina o nei suiga mo le manuia o le tautua a le matagaluega.

“E fa’amuamua e le faigamalo lenei le saogalemu o ona tagata, ma ua tu’uina atu ai le avanoa i le Komesina na te fa’atinoina ai auala e puipuia ai le soifua o tagata lautele”, o se vaega lea o le tusi a le ali’i kovana.

Sa ia taua atili fo’i e fa’apea, o le faia o fa’aiuga amiotonu atoa ai ma le tutu fa’atasi, e atagia mai ai le anavatau a le faigamalo a Amerika Samoa mo le isi 4 tausaga, ma ua ia manatu ai, o le galulue fa’atasi o tagata uma mo le manuia o le atunu’u, o le autu lea o galuega uma o loo fa’atinoina e le malo i le taimi nei.

Ina ua fesiligia e le Samoa News le tofa Le’i i le autu o suiga ua faia mo le matagaluega, aemaise ai o le mafua’aga ua filifilia ai le afioga a Falana’ipupu e avea ma Sui Komesina, sa ia taua ai le agava’a uma o Ta’ita’i (Commanders) o lo o galulue i le Ofisa o Leoleo i le fa’atinoina o le galuega, atoa ai ma le tulaga mataina o fa’amaumauga o a latou galuega sa fa’atinoina mo le matagaluega, peita’i e tulaga ese ai lava le agava’a ma le tomai ua maua e le afioga a Falana’ipupu mai ia i latou uma nei.

“E le gata e mafai ona ia fa’atinoina le galuega ae mafai fo’i ona ia fa’atulaga auala e fa’atino ai galuega a le matagaluega o Leoleo mo le aga’i i luma, ae sili ai i lo lena, o lo o ia te ia le meaalofa o le faia lea o auala e galulue fa’atasi uma ai le matagaluega o Leoleo”, o se vaega lea o le saunoaga a le tofa Le’i.

O suiga sa fa’aauau mai i taimi ua mavae ua maitauina ai a’afiaga i olaga o tagata, ma alia’e mai ai le tele o lu’itau ua fetaia’i ma le atunu’u i le taimi nei, e le gata i tulaga o le ola fiafia ae fa’apena fo’i i tulaga o le tamaoaiga o tagata ma le atunu’u.

“Ua tatou molimauina tulaga fa’aletonu i le taimi e pei o a’afiaga i aiga, lea ua alia’e mai ai tulaga tau fa’amata’u i le olaga o loo tatou ola ai, ma a’afia atu ai tu ma agaifanua a Samoa, ua tatou molimauina fo’i le malosi o le tulaga ua i ai fualaau fa’asaina, lea ua a’afia ai le ola fiafia i totonu o aiga, nu’u aemaise ai le atunu’u atoa”, o se vaega lea o le saunoaga a le tofa a Le’i.

Sa ia taua fo’i e fa’apea, “Pe afai e tula’i mai faiga le lelei nei ma foliga mai e tau fa’amata’u mai i ola ma le saogalemu o tatou tagata, o le taimi tonu lea e tula’i mai ai i latou ua tofia i tulaga ta’ita’i o le matagaluega o Leoleo, e tete’e, puipui ma tautua tagata o le atunu’u, e pei o le ta’utinoga a le Matagaluega o Leoleo, o le puipui ma tautua le atunu’u atoa”.

O se tasi o lu’itau o loo fetaia’i ma le matagaluega o Leoleo i le taimi nei e pei ona saunoa Le’i, o le to’atele naua o le faitau aofa’i o tagata ae to’alaiti Leoleo o loo tautuaina le atunu’u.

“O le autu atoa o lenei suiga, ia mautinoa o loo puipuia le saogalemu o tagata lautele, atoa ai ma le si’itia maualuga o le tautua a le matagaluega o Leoleo”, o se vaega lea o le saunoaga a Lei.

O isi lu’itau e pei ona taua e le afioga i le ali’i Komesina o le a vaavaai i ai mo lenei 4 tausaga, o le toe fa’aleleia lea o totogi o Leoleo, atoa ai ma le galulue fa’atasi lea ma le faigamalo, atoa ai ma le Ofisa o Mataupu Tau Samoa fa’apea ai ma le Ofisa o le Puipuiga o le Saogalemu Fa’alotoifale, mo le fa’atinoina lea o auala e puipuia ai le atunu’u atoa.