Tala i Vaifanua

SAINIA 9 SIKOLASPILI A LE  FOOTBALL I LE OFISA O AOGA

E to’aiva sikolasipi mo le ta’aloga Football na sainia i le vaiaso na te’a i le Ofisa o le American Samoa High School Athletics Association a le Matagaluega o A’oga.

Mai lenei to’aiva mo lea ta’aloga, Football, e to’atasi lava le tama’ita’i ua ia mauaina le avanoa mo le fa’asikolasipi i le Volleyball, o le tama’ita’i lea o Agape Mafua mai Aunuu. O ia fo’i lea na ia mauaina le fa’ailoga a le Fa’asamoa Initiative a Troy Polamalu i le tausaga 2015, ina ia malaga fa’apitoa ai e a’oa’oina e le susuga Allen Allen i Spokane, Washington.

Mai le to’aiva o i latou ua filifilia mai e Iunivesite eseese mo ni avanoa e ta’a’alo ma ao’oga ai, ua aofia ai:

• Bluesman Ta’ala o Fagaitua High ua maua lona avanoa i Hawaii ma Colorado peita’i ua ia filifilia Hawaii - UH Manoa e  ta’alo ma a’oga ai.

• Juliano Falaniko mai le Aoga Maualuga a Leone, ua filifilia e ia le University of Southern California, peita’i e iva isi Iunivesite ua mae’a maua mai ai isi ona avanoa. O Oregon State University, Arizona State University, Colorado Mesa University, UH Manoa, Michigan State University, University of Mississippi (or Ole Miss(, UNLV, Utah University ma Washington State University.

• Ralph Taufa’asau mai le A’oga Maualuga a Samoana, ua ia filifili e ta’alo mo Utah State University peitai e lua isi Iunivesite ua talia mai ai o ia, UH Manoa i Honolulu ma Washington State University

• Penei Stowers Pavihi mai le aoga maualuga a Tafuna, ua ia mauaina le avanoa e ta’alo ai mo le UH Manoa i Hawaii, peita’i o lo’o maua fo’i lona avanoa mo Nevada State University.

• Fautua Maiava mai le Aoga Maualuga a Samoana, ua ia maua le avanoa e a’oga ma ta’alo ai mo Colorado Mesa University peita’i o lo’o ua talia mai fo’i o ia i le Adams State University, Dixie Sate University, Culver - Stockton College ma Avilla University.

• Tui Ah Chong mai le aoga maualuga a Fagaitua ua ia mauaina se avanoa e a’oga ma ta’alo ai i le Garden City Community College.

• Joseph Siatini mai Samoana High ua ia mauaina fo’i le avanoa e ta’alo ma a’oga ai mo le Garden City Community College.

• Vimoto Mageo mai Samoana High ua ia maua fo’i le avanoa lelei e ta’alo ma a’oga ai i le Garden City Community College

• Henry Sakila mai Leone High School ua ia mauaina le avanoa e taalo ma aoga ai i le Garden City Community College i le tausaga a’oga fou.

SUIA FOU TEACHER QUALITY MATAGALUEGA O AOGA

Ua vaaia se faiga fou ua agai atu i ai le Teacher Quality a le Matagaluega o Aoga a le malo, lea ua latou fa’asalalauina fa’alaua’itele faia’oga e le o tia’i aoga i masina ta’itasi.

Ua fa’ailoa mai e Diana Ameperosa, “O lenei faiga fou o se mea o lo’o fa’atupeina mai o se vaega o le Enrichment Program mo Faiaoga uma o le matagaluega. E toe fa’aosofia ai le fiafia o faia’oga e galulue punoua’i mo se leleiga o le fanau a’oga, ae maise o i latou i o latou faiva o le aoao atu.”

I lea fa’asalalauga ua lisia mai foi i le pito i luga, o faia’oga ta’itasi ua filifilia e le fanau aoga mai aoga ta’itasi o se Faia’oga o le Masina. “Pe afai ua avea oe ma se faia’oga o le Masina, e le otometi ai ona avea oe ma Faia’oga o le Tausaga, pe’ita’i e fa’aleleia atili ai foi ou togi ina ia gafatia ona e agava’a o se faia’oga filifilia mai lau a’oga, ‘O le faia’oga o le Tausaga’,” o a Ameperosa lea

O faia’oga ua avea ma faia’oga o Ianuari 2017: Amy Epati, Manuelle Elementary School, faia’oga o le SPED; Mellelyn Hall, Alataua Lua mo le ECE; Katerina Ameperosa, Tafuna Elementary i le Level K5; Asootama Mekuli, Olosega Elementary Level 2 & 3; Christina Nili, A.P. Lutali Elementary i Aunuu Level 3; Eseta Samuelu mai Lupelele Elementary o le ECE; ma Merwyden Saluai mai Matafao Elementary Level 5.

O se isi va’aiga i le lisi umi o faia’oga e tusa ma le 132 o i latou e le’i misia se aso aoga e tasi ia Januari, e toatele ai lava faia’oga mai Tafuna High ma Manulele Tausala e ta’i 28 i latou e le’i misia se a’oga. Soso’o lea o Matafao Elementary ma Lupelele Elementary e ta’i 18 faia’oga e le’i misia se aso aoga, ae soso’o mai loa Coleman Elementary ma Alataua Lua e ta’i 12 faiaoga e le’i tia’i se aso aoga ia Ianuari, Masefau ma Faleasao, e ta’i fa faia’oga, Olosega e 6 ae o A.P. Lutali e tasi lava le faia’oga na atoa aso aoga ia Januari.

E 23 aoga tulaga muamua i le territori. O lona uiga, o nei fa’amaumauga, ua fa’ailo aloa’ia mai ai foi, ua vave ona maua soo se ituaiga o fa’amaumauga e le Ofisa o A’oga, ona ua feso’ota’i lelei i ala o Initeneti nei fa’amaumauga uma. Matua ua maua fo’i togi o le fanau i luga o nei laina o feso’ota’iga fa’ainiteneti, fesili i le faia’oga mo lea tulaga.