Toe fautuaina uiga fa’aalia ni isi Faipule taimi iloilgoa Komiti

O le tula’i soo mai ai o uiga le manuia e fa’aalia e ni isi o afioga i Faipule i taimi o iloiloga a Komiti ta’itasi a le maota, mo le fesiligiaina lea o tofiga a le afioga i le ali’i Kovana e pei ona amata fa’agasolo mai i le vaiaso na te’a nei, na toe fautuaina ai e Ta’ita’i o le maota o sui i le taeao ananafi amio ma uiga fa’aaloalo e tatau ona fa’aali e sui filifilia o itumalo ta’itasi i le taimi o galuega fa’atino a le Fono, aemaise lava ona o lea o loo to’atele le mamalu o le atunu’u o loo lolofi atu e fa’afofoga i iloiloga a afioga i Fa’atousili tofia.

O fautuaga na tu’uina atu e le Fofoga Fetalai ia Savali Talavou Ale, ma le sui fofoga fetalai ia Fetu Fetui Jr i le taimi o le tauaofiaga a le maota o sui ananafi, na mafua mai lea i se fa’aletonu laititi sa tula’i mai i le taimi o le iloiloga a le Komiti o Tautua ma Auaunaga mo Tagata Lautele, lea na fesiligia ai tofiga a le kovana mo le tofa a Taeaoafua Dr. Meki Solomona e avea ai ma Fa’atonusili o le Matagaluega o Auaunaga ma Tautua Lautele a le malo.

O le afioga i le ali’i faipule ia Fagaoatua Dorian T. Salave’a, o ia lea o le ta’ita’i komiti sa fa’atautaia le iloiloga, ae lagolagosua i ai le afioga i le ali’i foma’i ia Sataua Dr. Mataese Samuelu.

O le fa’aletonu na tula’i mai ina ua fesiligia e Fetui Jr le tofa a Taeaoafua e fa’atatau i le mataupu lea na tula’i mai i le va o ia ma se tasi o tagata faigaluega a lona Ofisa ina ua fa’atoa mae’a le palota i le tausaga na te’a nei, ae fa’auilavea ai loa le afioga i le ali’i faipule ia Puleleiite Tufele Li’amatua, ma ia fautuaina le ta’ita’i komiti ina ia taofi le fesili a le sui fofoga fetalai, lea fo’i na finagalo i ai le sui fofoga fetalai o le a taofi lana fesili.

E le’i muta ai i le taimi lea fa’amatalaga e uiga i le mataupu lea na taumafai le sui fofoga fetalai e fesiligia, ina ua saunoa le isi faipule mai Manu’a ia Vesi Talalelei Fautanu Jr ma ia fesili i le ta’ita’i komiti, pe aisea ua le mafai ai e le sui fofoga fetalai ona fa’aauau lana fesili.

O le fesili a le afioga a Vesi na mafua ai ona saunoa le ta’ita’i komiti ia Fagaoatua e fa’apea, o le a tu’u pea le avanoa e fa’aauau ai le fesili a le sui fofoga fetalai, ae a mae’a loa le fesili a le fofoga fetalai i le mataupu lea, e le tatau i se isi faipule ona ia toe fesiligia le mataupu lea.

Na fa’auilavea le afioga i le ali’i faipule ia Gafatasi Afalava ma ia saunoa e fa’apea, e le tatau ona talanoaina le mataupu e pei ona fesiligia ai e le sui fofoga fetalai le molimau, ona o lea o loo taoto i luma o le fa’amasinoga le iloiloina o lenei mataupu, e tatau fo’i ona puipui le maota i mataupu fa’apenei ua oo atu i luma o le tulafono.

Na mae’a le saunoaga a Gafatasi ae toe saunoa mai Puleleiite ma ia fa’aoloolomaau i le sui fofoga fetalai e fa’apea, “O loo manino galuega a le maota, o tatou e fausia tulafono, ae afai ua tatou iloa ni mea ua tutupu, lea ua taoto lava auala e fa’atino ai glauega ma fa’aiuga a le maota, ae foliga mai o le a tatou su’esu’ea mataupu e le ‘au i ai lo tatou malosi”.

E lei mae’a lelei le saunoaga a Puleleiite ae toe saunoa le sui fofoga fetalai e fa’apea, “O lea ou te malamalama i la’u galuega o loo fai, o a’u o le ta’ita’i o tulafono a le maota, ou te puipui fo’i i tulafono a le maota, ae foliga mai la i la outou maitau ua ou mata valea ua mafua ai ona ou faia lenei fesili, o lea ou te iloa le mea lea ou te faia”.

I le taimi o folafolaga a le maota o sui, na tula’i ai le sui fofoga fetalai ma fa’afetai i le mamalu o le maota e tusa ai o iloiloga o lo’o fa’agasolo, ma e ui o ni galuega e le faigofie, ae o loo maitauina pea le fa’amalolosi atu o sui mamalu i iloiloga.

Ae o lana fautuaga sa aga’i tonu lea i tulaga o “fa’auilavea”, ona e i ai lona talitonuga, ua lava le tagata e to’atasi e fa’auilavea, ae le o se mea matagofie le tau fai tulioso mai o isi afioga i faipule e fa’auilavea ae o loo fa’afofoga le mamalu o le atunu’u.

Ae na taua e le afioga i le ali’i faipule ia Kitara Vaiau e fa’apea, e lagona fo’i lona fa’anoanoa i le tula’i soo mai o lenei uiga le lelei i le taimi o iloiloga a komiti, ma, atonu o le mafua’aga lea e fa’aigoa ai e le to’atele le maota o sui, “o le maota o tamaiti”, ae atou e taua fautuaga e toe fuata’i ai se isi suiga fou.

Na tula’i fo’i le afioga i le tama’ita’i faipule ia Vui Florence ma fa’aleo lona lagona fa’anoanoa i lenei lava mataupu, ona o le itumalo o Tualauta le isi itumalo e pei e mamafa i ai le tele o fa’auilavea, pe a oo i le taimi e maua ai lona avanoa e saunoa pe fesili ai fo’i i se molimau.

Na lagolagoina e Savali le fautuaga a le sui fofoga fetalai, i le tulaga le manuia o le fetotoa’i o afioga i faipule i taimi o iloiloga ao fa’afofoga le atunu’u, ma ua ia maitauina le tula’i soo mai o lenei fa’afitauli, ae tatau lava ona tu’u tasi le fa’aiuga e fai e le ta’ita’i komiti o loo fa’atautaia le iloiloga.