Manumalo Au Volleyball Mai Samoa - Ipu Samoa Challenge

Ua mae’a sailia le Siamupini o le U19, ae maise o le Itupa o Alii i le ta’amilosaga Volipolo a le Samoa Challenge lea na fa’atoa sailia i le aso afiafi o le Aso Tofi ma taua’ao aloa’ia ai loa fa’ailoga i ‘au e lua a Samoa na masi’i mai, ua toe taliu ma Ipu e lua o le Manumalo.

O le All Stars U19 lea ua siamupini nei, na latou fa’atoilaloina le ‘au malosi a le Laumuatasi mai Pago Pago, ina ua mae’a malolo le ‘au a le Mizuno Boys i le latou fetauiga mata’ina i le to’afa maualuga i le latou ta’amilosaga.

Ina ua mae’a sa fetaui loa le ‘au a le Dirty Affairs ma Sea Breeze mai Vaitogi e saillia ai se ‘au e ta’a’alo ma Samoa Laumua o Tuma, ina ua malolo i ai le ‘au malosi a Pavaiai Mens Team, i le fetauiga o le 4 ‘au maualuluga i le Mens Division.

I le ta’aloga lea a Sea Breeze ma le Dirty Affairs, na oo lava i le toe ‘ai o le ta’aloga, o finau lava. E le’i fa’avaivai itu e lua o lenei finauga, peita’i, na i’u ina malolo le Dirty Affairs ae tuu loa le Sea Breeze mo le ta’aloga su’e siamupini ma le Laumua o Tumua.

E ui ina finau tele le ta’aloga, ae oo lava i toe ‘ai o le ta’aloga o lo’o finau ‘au e lua, ae na fai si malolosi lava a le ‘au masi’i mai Samoa, ma i’u ai ina manumalo i le latou ta’aloga faitaulia mo le ulua’i Ipu o le Samoa Challenge mo le Men’s, lea sa saunia e le susuga Ed Imo ma le Faletua, Peresetene o le MASI, Meafou Imo.

O le ipu mo le U19 na saunia fa’apitoa e le susuga Johnthan Fanene, ona o le naunau o le fa’atonu o le Matagaluega o Tupulaga & Tina a le malo, ina ia matua mafuli le tupulaga e sailia a latou taleni e fa’aaoga e agava’a ai mo ni a latou filifiliga tatau e saili ai latou lumana’i manuia i ta’aloga ma so’o se matata e agava’a ai. Ua fa’amautu mai e le Failautusi o le Asosi Volleyball a le atunu’u, Jose Afu Muasau, “O lenei foa’i e fa’aauau i tausaga ta’itasi o le a fa’atautaia ai lenei Liki a le Samoa Volleyball Challenge, o le tapena pea e nei sui iloga o le atunu’u i ta’aloga nei Ipu.”

O lo’o ua malaga atu nei lea Ipu i Samoa ma le Laumua o Tumua, ma ua fa’aopoopo ai fo’i manumalo i lea ‘au Volleyball males, aua o i latou fo’i nei o lo’o avea le Siamupini o le Tutoatasi 2016 fa’apea ma le Liki Volipolo o le Teuila a Samoa 2016.

Na auai atu le tama’ita’i lalelei o Amerika Samoa, Ms Antonina Lilomaiavamo, le taua’aoina atu o fa’ailoga i ‘au na lautogia, ma sa sausaunoa fo’i ina ia fa’amau fa’ailoga le afiafi a tamali’i mo nei tupulaga talavou, e fa’ailo ai fo’i le aloa’ia o a latou taumafaiga i lenei fa’agatama.

O isi fa’ailoga ma Ipu sa taua’aoina i lea lava afiafi e aofia ai le Ipu mo le Liki a le President’s Cup lea na maua e le Mizuno Boys le Ipu mo le U19 Division ae na taua’aoina i le Laumuatasi le Ipu o le Mens Division.

O fa’ailoga tupe mo le Laumua o Tumua fa’alauiloa e $700 ae o le ‘au a le All Stars, Mizuno ma le Laumuatasi sa fa’ailo fo’i latou fa’ailoga tupe e ta’i $100 fa’apea ai ma ‘au sa malolo i le sailliga o le siamupini, le Sea Breeze ma le Laumuatasi.

O nei ‘au Volipolo e lua mai Samoa, o lo’o ta’ita’ia mai lenei aumalaga ma Faia’oga e le susuga Leu Falefituomalietoa Banse.

E ta’ito’alua MVP o le ta’amilosaga i vasega o Alii Ta’a’alo i ‘au na sailia siamupini o le Samoa Challenge, e taito’atasi mai i ‘au e lua na fetaui. O sui o tatou tama ta’a’alo mo le ta’aloga a le U19, ua tulai ese mai ai le ali’i talavou o Matuu Toeaso mai Nuuuli, ma e ‘ai sili fo’i o ia i le ta’amilosaga atoa a le Samoa Challenge 2017, ma le talavou mai Samoa o Liua Kaisa.

O MVP e to’alua mo le Men’s Division o Nonu Aliavu mai Samoa ma Junior Muaga mai le ‘au a le Sea Breeze mai Vaitogi.