Tala otooto o Fa’amasinoga

CHRISTINA MALAUULU

O le vaiaso na te’a nei na taofia fa’apagota mai ai e Leoleo se Tina mai Amouli, ona o tu’uaiga i lona fa’alala lea o se fana i ni ali’i sa ta’alao otaota i luga o le alatele i lea itu o le atunu’u.

O moliaga mama e lua ua tu’uaia ai e le malo ia Christina Malauulu poo Chrissy e pei ona valaau ai o ia e le to’atele, e aofia ai le moliaga o le fa’atupu vevesi i nofoaga faitele, atoa ai ma le moliaga o le fa’ao’olima i le tulaga tolu.

Na teena e Malauulu tu’uaiga fa’asaga ia te ia ina ua tula’i i luma o le fa’amasinoga fa’aitumalo i le vaiaso na te’a nei, ma ua toe tatalaina nei o ia i tua e aunoa ma se tupe na totogi e fa’atali ai le aso 9 Fepuari lea ua fa’atulaga e toe valaau ai lana mataupu i luma o le fa’amasinoga.

O ni isi o tuutuuga ua tatala ai Malauulu i tua e aofia ai le fa’asa lea ona ia toe taumafai e fa’afeso’ota’i ali’i na a’afia, aua ne’i ona toe solia se tulafono, aua fo’i ne’i ona umia ni a’upega mata’utia, a ia avea o ia ma tagatanu’u e tausisi i tulafono a le malo i taimi nei.

O le mataupu lenei na tofu atu i le Ofisa o Leoleo i Fagaitua, ina ua talosagaina e se tasi o ali’i na a’afia i lea fa’alavelave le Ofisa o Leoleo mo se fesoasoani, ina ua ia lagona le fefe atoa ai ma lona popole i lona saogalemu, ona o se fafine sa ia tu’uaia le tago fa’alele atu se fana ia te ia ma ni isi o ali’i sa latou i ai fa’atasi, ma tofia ai loa le ali’i Kapeteni ia Capt. John Cendrowship na te su’esu’eina lenei mataupu.

E tusa ai ma fa’amaumauga a le Fa’amasinoga Fa’aitumalo, e to’atolu ali’i na a’afia i lenei mataupu, o i latou fo’i ia na fesiligia e Leoleo mo le tu’uina atu o ni fa’amatalaga e uiga i lenei fa’alavelave.

Na taua uma e ali’i na a’afia i Leoleo e fa’apea, ao latou galulue ai e fa’amama le otaota i tafatafa o le alatele i Amouli, sa fa’afuase’i ona latou vaaia se ta’avale lapo’a lanu enaena, le ituaiga o le SUV ua sosolo atu ma tu i o latou tafatafa, ona tatala lea o le faitoto’a o le ta’avale ma latou iloa atu ai se fafine, ua ia fa’alala atu se tama’i fana ia tei latou ma palauvale atu i upu mataga eseese uma o lenei olaga, ma fa’afefe i latou i le fana, ona fa’afuase’i lea ona toe alu ese le ta’avale a le fafine.

Na taua e molimau i Leoleo e fa’apea, e lei umi ona alu ese atu le ta’avale a le ua molia ae latou toe vaaia fo’i le toe sosolo atu, ona toe fai fo’i lea o le amio a le ua molia, o le tatala o le faitoto’a ae lafo atu upu palauvale ia te i latou.

Na taua e le molimau lona lua e fa’apea, ina ua toe alu atu fa’alua le ta’avale a le ua molia, sa ia toe tatala le faitoto’a ma fesili atu i lona igoa, o lea sa ia tali i ai e fa’ailoa i ai o ia tonu lea o loo ia tau sailia, ae sa fa’asaga atu le ua molia ma ta’i atu le fana ia te ia ma fai mai, “aisea e te alu ai ma fa’asalalau tala o la’u tama teine lea e faia fualaau fa’asaina”.

Na taua e le molimau lona fefe ma le le mautonu, peita’i sa fa’aauau pea ona ta’i atu e le ua molia le fana ma lafo atu upu palauvale ia tei latou, ona toe alu ese ai lea o lana ta’avale.

Na su’e e Leoleo le ta’avale a le ua molia, ma maua i ai se fana o le ituaiga o le .45 i lalo o le nofoa o le ta’avale. E lei mana’o fo’i le ua molia e fai sana fa’amatalaga i Leoleo, se’i vagana ua talanoa i se loia.

STEPHEN MC RAW

O le ali’i papalagi lea na tu’uaia e le malo i le vaiaso na te’a nei i lona gaoia lea o se pepa fao e na o le $1.75 le tau mai le faleoloa o le Tools Shop i Tafuna, ua molia nei o ia e le malo i le moliaga mama o le gaoi, ma ua toe tolopo lana mataupu e toe fofogaina i luma o le fa’amasinoga i le aso 31 o Ianuari i le itula e 8:30 i le taeao.

E ui e na o le tasi le moliaga mama lea ua tu’uaia ai e le malo le ali’i o Stephen Mc Raw, ae na poloaina lava e le afioga i le ali’i Fa’amasino ia Fiti Sunia le tupe e $200 e totogi ona fa’atoa mafai lea ona tatala le ua molia i tua, ina ua musu le ua molia e saini le pepa sa tu’uina atu e le malo e fa’ailoa atu ai le mafua’aga o le tagi ua faia fa’asaga ia te ia.

Na taumafai Mc Raw e fa’atoese i le fa’amasinoga e tusa ai o lana gaioiga sa faia, atoa ai ma lona fa’ailoa i le ali’i fa’amasino, “e na o le $1.75 le tau o le pepa fao sa ia aveeseina”, peita’i na taofi e le ali’i fa’amasino le ua molia mai lona faia o soo se fa’amatalaga, ae lelei pe a talanoa i lana loia o Kate Hannaher e tusa ai o le mataupu ua tu’uaia ai o ia.

Na finau Hannaher i le fa’amasinoga ina ia tatala Mc Raw i tua e aunoa ma se tupe e totogi, peita’i sa tete’e i ai le itu a le malo, ona o popolega i le saogalemu o tagata lautele atoa ai ma le ua molia. Na taua atili e le itu a le malo e fa’apea, talu ai o le ua molia o loo vaaia le nofonofo solo i nofoaga eseese i fanua a le malo i Tafuna, ma e le o mautinoa lelei poo fea lona aiga, o le mafua’aga lea e tatau ai lava ona fa’atulaga se tupe e totogi e mafai ai ona tatala o ia, ina ia mautinoa ai e auai mai lava o ia i taimi uma e valaau ai lana mataupu.