Maliu le ali’i lona tolu o le fa’alavelave na tula’i mai Manu’a Store

O le vaveao ananafi, le aso 22 Ianuari, 2017 na fa’amaonia mai ai le i’u o le soifua o le ali’i lona tolu lea na manu’a mai i le fa’alavelave sa tula’i mai i le Manu’a Store i le aso To’onai i ona tua atu, i le silia ai i le vaiaso o finau ma tiga o manu’a sa a’afia ai lona tino, e mafua mai ina ua a’afia o ia ma isi ali’i e to’a 5 i se uaea eletise malosi na motu ao fa’atinoina sa latou galuega i luma o le faleoloa o le Manu’a Store i Tafuna.

O le maliu ai o le susuga ia susuga a Toese Ume, o se sui o le Ami Fa’aleoleo a Amerika Samoa, ua atoa ia te ia le to’atolu o soifua ua ma’imau talu mai lenei fa’alavelave mata’utia.

Na fa’amaonia mai e le Tina o le susuga ia Ume i le Samoa News le maliu o si ona alo pe tusa o le itula e 3:00 i le vaveao o le aso Sa na te’a nei.

Na taua e ni isi o le aiga i le Samoa News le lolofi atu o le to’atele o le aiga i le falema’i ina ua maua le tala fa’anoanoa e fa’atatau i le i’u ai o le soifua o le ali’i o Toese.

O le aso Tofi o le vaiaso na te’a nei na matua fa’atumulia ai le falema’i i Faga’alu i uo ma aiga o le ali’i o Ume, atoa ai ma lana aufaigaluega sa lolofi atu e asia o ia, i le mae’a ai lea ona maua o fa’amatalaga e uiga i le tulaga vaivai ua oo i ai lona tino, peita’i na toe taape le to’atele sa tumutumu ai i le falema’i i lea aso, e aofia ai ma sui mai le Ami Fa’aleoleo ina ua maua se ripoti mai sui o le aiga, o lo o tulaga malosi pea lava le tata o lona fatu.

Na taua e ni isi i luga o a auala o fesootaiga e pei o le “Facebook” i le taeao ananafi lagona fa’anoanoa ma le misia o le susuga ia Toese, ina ua maua tala ua i’u lava lona soifua ao finau ai ma tiga o le tino i totonu o le falema’i i Fagaalu.

Mai ali’i e to’a 6 na a’afia i le fa’alavelave na tula’i mai i le Manu’a Store i Tafuna, o le to’atolu o i latou sa taofia i le potu tigaina ua fa’amaonia nei le maliliu uma, se’i vagana ai le isi to’atolu sa taofia ona o manu’a o le tino ua fa’amaonia le te’a uma i tua ina ua mae’a togafitiga a foma’i.

O le ali’i o Iosefa Elia na maliu i le aso lava na tula’i mai ai le fa’alavelave, ae o le susuga a Saito Paulo na fa’atoa maliu ina ua tuana’i aso e 5 talu ona tuana’i le fa’alavelave.

Na molimauina e le Samoa News i luma o le nofoaga autu o le Manu’a Store i Tafuna le i ai o teu fugalaau ma tusitusiga mai ni isi o uo ma aiga, e aualofa ai i aiga o nai ali’i ua a’afia i lenei fa’alavelave.

Na taua e le sui sooupu o le Matagaluega o Leipa a le malo tele o Amerika (USDOL) ia Jose Carnevali i le Samoa News, le mae’a lea ona silafia e le latou Ofisa o le mataupu e pei ona tula’i mai, ma ua amata i le taimi nei ona faia su’esu’ega a le Ofisa e tusa ai o le fa’alavelave.

“E le mafai ona matou tu’uina atu ni isi fa’amatalaga e uiga i lenei mataupu ona o loo fa’aauau pea su’esu’ega e le’i mae’a”, o le saunoaga lea a Carnevali i le Samoa News.

Ia fa’amaise le Atua i aiga fa’anoanoa ona o lenei fa’alavelave matuia ua fa’afuase’i ai ona motusia mafutaga ma i latou e pele i loto ma agaga.