Tala otooto mai le Fa’amasinoga

BRIAN BENJAMIN LOMA

O le masina o Me 2018 lea ua fa’atulaga e faia ai le fa’amasinoga autu a le ali’i o Brian Benjamin Loma i luma o le vaega iloilo iuga, i le mae’a ai lea ona teena e le fa’amasinoga maualuga o se maliliega na latou sainia ma le malo ma le fa’amoemoe e fa’amuta ai taualumaga o lana mataupu.

O le fa’aiuga o le tausaga na te’a nei na tu’uina atu ai e le malo ma le itu a Loma sa latou maliliega ua mae’a ona sainia, ma le fa’amoemoe e fa’amuta ai taualumaga o le mataupu o lo o tu’uaia ai Loma e le malo, ae i le mae’a ai ona iloilo e ali’i fa’amasino o aiaiga uma o le maliliega fa’apea ai ma isi mau fa’amaonia mai iloiloga sa faia fa’asaga i lenei mataupu, na tu’uina mai ai loa e le afioga i le ali’i fa’amasino sili ia Michael Kruse lana fa’aiuga e teena ai le maliliega, ae tu’u sa’o atu loa le mataupu e fa’atulaga se aso e iloilo ai e tagatanu’u se fa’aiuga amiotonu.

O ulua’i iloiloga o le mataupu a Loma na fa’atautaia lea i luma o le afioga i le ali’i fa’amasino sili lagolago ia Lyle L. Richmond, ae talu ai ona ua le atoatoa le malosi o le ali’i fa’amasino, o le mafua’aga lea ua se’e atu ai loa le mataupu e iloiloina e le afioga i le fa’amasino sili ia Kruse ma ana fa’amasino lagolago, le afioga ia Mamea Sala Jr ma Fa’amausili Poumele.

O lo o tu’uaia e le malo ia Loma i le moliaga mamafa e tasi o lona umia fa’asolitulafono lea o vaega o le laau fa’asaina o le mariuana, le moliaga e mafai ona fa’asala ai se tasi i le toese mo le umi e le itiiti ifo i le 5 tausaga, pe fa’asala fo’i i le salatupe e le itiiti ifo i le $5,000.

O lea moliaga na alia’e mai i le fa’alavelave lea na tula’i mai i le po o le aso 11 Setema 2016, ina ua malaga mai Loma i le va’alele a le Hawaiian Air mai Honolulu ae maua ai e sui o le Ofisa o Tiute vaega o le laau fa’asaina o le mariuana, i totonu o ni oloa sa ia taumafai e fa’aulufale mai i le atunu’u.

O ni isi o oloa na taumafai le ua molia e fa’aulufale mai i le atunu’u e aofia ai lole suamalie ma mea fai ti, lea na su’e e Leoleo ma fa’amaonia ai, o lo o i ai i totonu o ia oloa le vailaau lea o lo o maua i le laau fa’asaina o le mariuana.

O lo o tumau pea tuutuuga o lo o tatala ai i tua le ali’i o Loma e fa’atali ai le aso lea ua fa’atulaga e fa’ataunu’u ai lana iloiloga autu.

VILIAMU OTTO

O le masina fou lea ua fa’atulaga e tu’uina atu ai le fa’aiuga a le fa’amasinoga maualuga fa’asaga i le ali’i o Viliamu Otto, i le mae’a ai lea ona fa’amaonia o tu’uaiga o lona le usitaia lea o poloaiga o lana nofovaavaaia e 5 tausaga sa tu’uina atu e le fa’amasinoga maualuga e usita’i ma tausisi i ai.

O ni isi o tuutuuga o le nofovaavaaia a Otto ina ua ta’usala o ia i le moliaga o le fa’ao’olima i le tulaga lua, o le fa’asa lea ona ia toe tagofia le ‘ava malosi poo fualaau fa’asaina, totogi le salatupe e $1,000, totogi le tupe mo le taui o mea sa fa’aleagaina e $430, ma ia asiasi i le Ofisa Fa’anofovaavaaia i masina ta’itasi.

Na taua e le Ofisa Fa’anofovaavaaia i sa latou ripoti ua mae’a ona tu’uina atu i luma o le fa’amasinoga maualuga, e le gata e leai ma se tupe ua totogi e Otto e pei ona fa’atonuina ai o ia e le fa’amasinoga, ae atoa fo’i le tausaga e 2016 na te’a nei e lei oo atu o ia e asi le Ofisa Faanofovaavaaia.

O le suega fo’i sa faia i le tino o le ua molia i le fa’aiuga o le tausaga na te’a nei, na fa’amaonia ai le i ai o le vailaau o loo i totonu o le pauta fa’asaina i lona tino, ma ua taofia nei o ia i le toese i Tafuna e fa’atali ai le aso lea ua fa’atulaga e toe valaau ai lana mataupu.