Talosaga Toeaina mo se Komiti e ta’ita’i ai afioga Afalava

O le tuana’i ai o aso e 2 talu na mae’a ma le taimi na fa’alauiloa ma pasia ai e le maota o sui, Komiti eseese e fa’atino ai ana galuega mo le nofoaiga lenei e 35 a le Fono Faitulafono ua nofoia, o le taeao ananafi na fa’aleo ai e le afioga i le ali’i Faipule mai Manu’a #2 sana talosaga i le Fofoga Fetalai, mo se komiti e tautua ai le afioga i le ali’i faipule ia Gafatasi Afalava.

I lana saunoaga i le taimi o folafolaga a le maota o sui ananafi, na taua ai e le afioga a Toeaina Faufano Autele le tatau lea ona tofu uma Ofisa eseese a le malo ma komiti i totonu o le maota o sui, mo le iloiloina lea aemaise ai o le talanoaina o le tele o mataupu taua e alia’e mai i totonu o le faigamalo.

“O se tasi o Ofisa taua o le malo e le o i ai se Komiti i totonu o le maota, o le Ofisa o le Vaega Tosova’a i Satala, ou te manatu e lava ai fo’i le agava’a o le sui mamalu mai le itumalo o Leasina/Atiulagi e tautua ai”, o le saunoaga lea a Toeaina.

Na taua fo’i e Toeaina i lana saunoaga e fa’apea, e le o sona mana’o na mafua ai ona tu’u fa’atasi Komiti e lua a le maota lea ua avea ai nei o ia ma Ta’ita’i, e pei ona fa’aalia e le sui fofoga fetalai i lana saunoaga, ae o le finagalo lava o le ta’ita’i o le maota o sui.

“E lagona ai le fa’anoanoa ona o se lagona ua folasia i luma o le maota i le vaiaso nei, ma ua foliga mai ai o a’u lea ua mana’o e fao ese mai Komiti, e leai se lagona fa’apena o ia te a’u”, o le saunoaga lea a Toeaina.

I le taimi o folafolaga a le maota o sui i le aso Lulu na te’a nei ao avea le sui fofoga fetalai ia Fetu Fetui Jr ma ta’ita’i o le maota, sa taua ai i se vaega o lana saunoaga le agaga fa’amalo i le afioga a Toeaina, ma le tulaga e pei ona talia ai e le maota lana fautuaga sa tu’uina atu, ina ia tu’u fa’atasi Komiti e lua a le maota lea ua avea ai nei o ia ma Ta’ita’i.

“Lau afioga Toeaina, o lea ua fa’atino le mea sa e finagalo i ai, ia tu’u fa’atasi Komiti ia e lua a le maota ina ia e ta’ita’i ai”, o le saunoaga lea a Fetui Jr.

O Komiti e pei ona taua o le Komiti o Tulafono lea sa ta’ita’i ai le afioga i le Tama’ita’i Faipule ia Vui Florence Saulo i le nofoaiga ua mavae atu, ma le Komiti o Fa’amasinoga lea sa ta’ita’i ai Toeaina i le nofoaiga ua mavae atu, lea ua tu’u fa’atasi i le taimi nei ae avea ai Toeaina ma Ta’ita’i.

Na fa’afetaia e le fofoga fetalai ia Savali Talavou Ale le fautuaga sa tu’uina atu e Toeaina e tusa ai o se Komiti mo le Ofisa o Vaega Tosova’a a le malo, ae i lona talitonuga, o isi uma Ofisa o le malo e le o i ai ni komiti i totonu o le maota, o i lalo uma i latou i le fa’amalumaluga a le Komiti o le Fa’agaoioiga o le Malo, lea o lo o ta’ita’i ai le afioga i le ali’i Faipule ia Faimealelei Anthony Fu’e Allen.

“Ou te fa’afetai atu e tusa ai o le fautuaga sa tu’uina mai, o le agaga fo’i lena o le laulau, e taua le tu’uina mai o fautuaga e fesoasoani ai i le fa’afoeina o la tatou galuega, ae o le mea moni lava ia, o lea ua taoto tulaga mo le fa’atinoina o le tatou galuega i lenei nofoaiga, ae o le agaga taua, aua le taofia le tu’uina mai o fautuaga taua ma le aoga mo le fa’aleleia o la tatou galuega”, o le saunoaga lea a Savali.

Na taua e Toeaina i le Samoa News e fa’apea, o lona agaga atoa na mafua ai ona ia tula’i ma fa’aleo lenei mataupu, ia i ai se komiti e avea ai le afioga i le ali’i faipule matua ia Gafatasi ma Ta’ita’i.

Mai Komiti e 19 a le maota o sui ua mae’a ona fa’alauiloa ma pasia, e na o le afioga i le ali’i faipule ia Gafatasi e leai se komiti o avea ai o ia ma Ta’ita’i, se’i vagana ai komiti e 2 o lo o avea ai o ia ma Sui Ta’ita’i, o le komiti o Galuega Lautele a le malo, ma le Komiti o Tulafono ma Fa’amasinoga.