Tala I Vaifanua

OSOFA’IA FALE AOGA TAFUNA HIGH SCHOOL

O le vaveao o le aso Lulu na osofa’ia ai nisi o fanau talavou le potu fa’apitoa mo le ofisa o le Aoga Maualuga i Tafuna High ma sa fa’afetaia lava le tulaga o mea pu’eata ua maua fa’atula’ia i totonu o le a’oga, aua na maua lelei ai foliaga o le na faia lea galuega.

Sa fa’ailoa mai e le tama’ita’i pule aoga, Beauty Tuiasosopo, “E fa’afetaia lava mea pu’eata nei, aua ua maua lelei lava foliga o le sui, ma ua fa’ao’o fo’i i le Vasega o Leoleo mo a latou suesuega.”

Fa’ailoa mai e Tuiasosopo, e leai ni mea na avea pe ua fa’aleagaina, peita’i, ua leaga le loka o le faitoto’a.

O le isi itu, ua iloa fo’i e le o se tamaititi e a’oga i Tafuna High lea sa faia lea tulaga. O lo’o faia pea suesuega a leoloe i lenei fa’alavelave.

2 FA’ASA TUMAU A LE DMWR

Ua mae’a fa’atalanoa tulaga o Fa’asa Tumau a le Matagaluega o Vaomatua ma le Gataifale [DMWR] ma au fa’ailoa mai, “E moni lava, e le o tatalaina nei fa’asa, ona o aiaiga tamau a le Feterale lea e fa’atupea nei polokalama.”

O le fa’asa muamua o le taofiga lea o le tafaina o Pe’a, e ui ina ua va’aia le fa’ateleina o le faitau aofai o nei meaola ma ua matauina e lua lelei nofoaga ua avea ma latou taulaga, lalo ane o le Maota o le Kovana ma motu tuufua o Fatumafuti.

Saunoaga a Ace Avele o le Fa’asa i le Vaomatua a lea matagaluega, “I le taimi nei, ua va’aia le fa’atuputeleina o Pe’a talu mai ona amata le fa’asao lea ina ua mae’a le afa o Ofa ma Valelia i le 1990-199a. Ae oo mai lava i le taimi nei, e le’i atoa le ta’i 10,000 o pe’a e tusa ai o le ala e faitauina ai i matou nofoaga e fa ua mae’a faatula’ia mo lea fa’amoemoe. I le taimi nei, ua matauina ua i le va o le 6,000 i le 7,000 i le nofoaga e tasi.”

Ina ua fesiligia le fa’asalaga, ae fa’ailoa mai, “O lo ua mae’a fa’atulaga lava e le feterale ana fa’asalaga e oo i le $25,000 le mamafa pe afai e fa’amaonia lou fa’atama’ia o Pe’a i laueleele o Amerika Samoa.”

O le fa’asa lona lua, o lo’o ua mae’a fa’asalalauina lava le “Fa’asa ona maulu se tasi e fa’aaoga ai tane okesene ma fagota e fa’aaoga le matatao.”

O lea fo’i fa’asa e sau sa’o mai le feterale lea e fa’atupea lea fo’i polokalama i totonu o le teritori. E afua lea fa’asa, ona o le tulaga o le tausiga o le saogalemu o tagata maulu Scuba Diving. Pe afai e a’otauina oe i le Maulu lea, e tatau lava ona fa’atulaga le taimi po’o le ami e te maulu ai i lalo i le alititai o le sami, ona e toe sau lea i luga.

“Pe afai ae maulu se tasi ma fagota, o loo ia te ia se fa’anaunauga e umi se taimi e maulu ai, pe a’afia foi i se fetauiga ma se i’a tele ma saisaitia ai lona sui i fa’ai’uga e ono lamatia ai lona soifua.”

O nei aiaiga uma, ua maea sainia ma malamalama i ai tagata ua a’oina mo lea tomai fa’apitoa iinei ma au alagatatau lava ona toe fa’amanatu ia i latou, ia le solituina, aua e mamafa lava faasalaga o lea solitulafono a le feterale.

Peita’i, o le maulu o le tagata fagota e le o fa’aaogaina tane ea ma mea manava, e le o fa’atulafonoina, o lo’o maulu lava le tautai ia ma fagota e pei o tulafono o le tetele o i’a e fa’ataga ona fagota, ma ia faia foi lou laisene fagota mo le tausaga atoa e $10.

AMATA LESITALA FANAU AOGA ASCC

O le aso 11 o Ianuari e oo atu i le aso 13, o aso fa’atulaga ia e lesitala ai fanau aoga mo le Kolisi Tu’ufaatasi a Amerika Samoa.

O mea masani lava e ao ina taua’aoina, e afua mai i Lipoti Mulimuli ma pepa fa’amaonia o togi o le fanau fia lesitala mai tausaga atoa na a’oga ai i aoga maualuluga.  Pepa fa’amaonia o le Nofomau ai i Amerika Samoa, mo le fanau e soifua a’e i atunu’u ese mai Amerika Samoa ma le Iunaite Setete o Amerika, aemaise foi, numera saogalemu ma pepa fanau. O isi mea uma e ao ina tapena le fanau ulufale mo suega lava a le Kolisi Tu’ufa’atasi, ma e totogia fo’i lea suega.

Mo tamaiti aoga tuai sa mua’i avea latou mataupu i le Kolisi, e le tatou ona aofia i lenei lesitala mo fanau a’oga fou ae ua tatau foi ona mae’a lesitalaina i latou i luga o so’otaga fa’ainiteneti. Pe afai ua misia lou avanoa, e mafai ona oo ane pea ina ia sailia sou avanoa ina ia le motusia au a’oa’oga.