E LE O OE O SE SULI MONI - Vaega XX

Na ona uma lava o tala ia a le tamaloa o Meki sa lafo atu i le fafine saua o Mekala, faliu loa ma toe savali i le pito o lo o paka mai ai le la ta’avale, ma la tulioso ai loa ma lona to’alua ma la o ese atu loa. “Aisea ua ta vave o ese ai ao fea o i ai si a’u tama o Ianeta”, o le fesili fia malamalama atu lea a le fafine faiaoga o Lucy, peita’i na o le atili ai ona alu saoasaoa le ta’avale a Meki e aunoa ma se tupu na tali ane ai. Ua iloa e le fafine o Lucy e i ai le mea ua tupu ia Ianeta, fua i le ita o lona to’alua ma le fia tautala ane ia te ia. Na ona fa’asasa’o atu lava o le ta’avale a le ulugali’i ma aga’i sa’o atu loa i le Ofisa tutotonu latou te vaaia ma tausia tamaiti o lo o avea ma pologa i totonu o le malo lenei o Aferika. “Fa’atali atu i le ta’avale, se’i o’u alu atu i totonu o le Ofisa e logo i ai le mataupu e fa’atatau ia Ianeta ona ou toe fo’i mai ai lea, ou te vave mai lava”, e fai lava tala ia a Meki ma savali telea’i aga’i atu i le Ofisa.

Pe tusa o le 30 minute talu ona alu ese atu le tamaloa, ae vaaia loa e Lucy le latou savavali mai ma ni ali’i tino lelei se to’afa, e eseese uma a latou toniga o lo o fai mai, ona ia vaaia loa le tu’u atu e Meki o se pepa i le isi ali’i o le to’afa lea, ona ia toe savali mai loa lea i le la ta’avale ua fa’aola ma la aga’i ese atu loa. “Vaai oe si o’u to’alua pele, aua e te ita ina ua ou le tali atu i lau fesili, sa mafatia lava lo’u loto i lo’u alofa ia Ianeta, ona ou te iloa, e i ai le nofoaga fou lea ua ave i ai e le fafine saua lenei o Mekala ma lona to’alua i so’u afafine o Ianeta, lea la ua uma ona fai atu i ai la’u fa’atonuga, o le itula e 6:00 i le afiafi nei ta te toe asia ai le fale po o i ai Ianeta, afai loa e leai, ona ou logoina loa lea o ali’i Leoleo nana e to’afa ia sa matou talanoa ana nei, mo le suesueina o le mataupu ma faila ni moliaga fa’asaga ia Mekala ma lona to’alua”, o le talanoa atu lea a le tamaloa o Meki na vaaia ai foliga fiafia o le fafine faiaoga o Lucy, ona o lea ua vavala mai e i ai le avanoa e mafai ai ona la toe feiloa’i ma Ianeta.

Se’i o tatuo liliu atu lava i le nofoaga fou lea ua ave i ai Ianeta e le fafine saua o Mekala. Na ona savali atu lava o le teineititi i totonu o le potu lea na fa’asino atu ia te ia, tatala le faitoto’a ma ulufale loa i totonu, ona ia taoto ai loa lea i luga o le moega o lo o i totonu o le potu ma moe gase ai loa. Na fai le miti a le teineititi i le po, fai mai ua ala ane i le leva o le po o lo o siomia o ia e le ulugali’i o Meki ma lona toalua faiaoga o Lucy, ma talatalanoa atu ia te ia e fa’atatau i le la fuafuaga ua i ai mo ia, o le aveese mai lea o ia mai le nofoaga o lo o i ai tamaiti pologa, ae o le a suia le nofoaga e ave o ia e nofo ai, ina ia maua ai pea se salolotoga mo lona lumana’i. A o fa’agasolo le miti a le teineititi pologa, na pei o se tagata e tago atu ma sii mai o ia i luga lana fa’alogo lea ua i ai, na mafua ai loa ona te’i valevale i luga ma ia iloa ai le susulu malosi o le mata o le la o le aso fou, ae ua ese lana vaai i le siosiomaga lea ua alafa’i mai ai. O le te’i o le tama’ita’i na mafua ai ona tu i luga ma autilo solo, i lona fia iloaina o le nofoaga fou lea ua oo mai ai, ae fa’afuase’i ai loa ona tau atu lana vaai i le isi itu o le fale lea sa moe ai, i se vaega toatele o tagata uli o lo o galulue mai ai i le fa’atinoina o galuega i se togalaau, o fafine, tamaloloa faapea ai fo’i ma tamaiti laiti.