Tala otooto o Fa’amasinoga

MEL KATRINA WELLS

O le aoauli o le aso Tofi o le vaiaso fou, Tesema 22 i le itula e 1:00 lea ua fa’atulaga e faia ai le ulua’i iloiloga o le mataupu a Mel Katrina Wells, mo le iloiloina lea e le fa’amasinoga o fa’amaumauga a le malo e tusa ai o tu’uaiga fa’asaga ia te ia.

O lo o tu’uaia e le malo ia Wells i le moliaga o lona umia fa’asolitulafono lea o vaega o le pauta fa’asaina o le aisa, e mafua mai i le fa’alavelave lea na tula’i mai i le Falemeli i Fagatogo, ina ua alu atu le ua molia e piki mai lana afifi sa aumai i lana pusa meli ae maua ai vaega o le pauta oona o le aisa, e pei ona taua i le pepa o tagi ua faila e le malo fa’asaga ia te ia.

O le taeao ananafi na tula’i ai Wells i luma o le fa’amasinoga fa’aitumalo, ma talosagaina ai loa e lana loia fautua ia Sharron Rancourt le fa’atulaga o se aso e faia ai le iloiloga fa’apitoa o lenei mataupu, lea fo’i na talia e le afioga i le Tama’ita’i Fa’amasino ia Gwen Tauiliili-Langkilde.

O tu’uaiga fa’asaga ia Wells na alia’e mai i le fa’alavelave lea na tula’i mai i le Falemeli i Fagatogo i le amataga o le vaiaso nei, ina ua alu atu le ua molia e piki mai lana afifi sa aumai i lana pusa meli, ae fa’ailoa ane ai e sui o le Ofisa o Tiute, o lo lo o masalomia le i ai o fualaau fa’asaina i totonu o le afifi.

Ina ua fa’aauau su’esu’ega a sui o le Ofisa o Tiute, na maua ai se vaega tele o le pauta oona o le aisa, ma logoina ai loa le Ofisa o Leoleo mo le su’esu’eina atili o lenei mataupu.

E $25,000 le vaega tupe na manatu le fa’amasinoga e totogi ona fa’atoa mafai lea ona tatala le ua molia i tua, ae talu ai o talosaga a loia ina ia fa’aitiitia lea vaega tupe, na talia ai loa e le fa’amasinoga le suia o le tupe e tatala ai le ua molia i le $20,000.

Afai ae mafai ona tatala o ia i tua, ua fa’asa ona ia taumafai e tuua le atunu’u, pe na te toe soli se isi tulafono, a ia tu’uina atu lona tusi folau e taofi e le malo, ao fa’agasolo ai taualumaga o lana mataupu i luma o le fa’amasinoga.

REUBEN FAOASAU

O le ali’i e 20 tausaga le matua lea ua ta’usala e le fa’amasinoga fa’aitumalo i le moliaga mama o le fa’ao’olima i le tulaga tolu, e mafua mai i le fa’alavelave lea na fa’aaoga ai se pate tapolo e fa’ao’o ai manu’a i se ali’i e 15 tausaga le matua, ua fa’anofovaavaaia nei o ia mo e 12 masina i lalo o poloaiga e ao ona ia usita’i i ai.

O ni isi o tuutuuga o le nofovaavaaia a Reuben Faoasau e aofia ai lona totogi o le salatupe e $100, ae fa’amalumalu le isi $900, auai i aoaoga e fa’atonutonu ai le tulaga o le ita, ma ia aua fo’i ne’i ona toe solia se tulafono.

E 5 aso na manatu le fa’amasinoga e taofia ai le ua molia i le toese i Tafuna, peita’i ua fa’amalumalu lona tuliina o lea fa’asalaga, fuafua lava i lona usitaia o poloaiga a le fa’amasinoga.

O le talia ai e le afioga i le Tama’ita’i Fa’amasino ia Gwen Tauiliili-Langkilde o le maliliega na sainia e le ali’i o Faoasau ma le malo, e pei ona ia tali ioe ai i le moliaga mama o le fa’ao’olima i le tulaga tolu, na solofua ai loa e le fa’amasinoga isi moliaga na totoe ai i le pepa o tagi sa fa’aulue le malo.

Na fa’ailoa e le fa’amasino ia Faoasau le matuia o le gaioiga sa ia faia, e le gata sa ia fa’aaoga se a’upega e fa’aoo ai manu’a i le ali’i na a’afia, ae o le ali’i fo’i na a’afia o se tama e talavou i lalo o le tulafono.